Wenten cerita sujati saking Cakepan Sucine indik Hyang Yesus ngubadin anak lumpuh.

Risampune Hyang Yesus ngubadin anak sane karasukin buta kala, raris Hyang Yesus lan sisia-sisiannyane nyebrang danu Galilea budal ring desa. Ring desane punika, sampun akeh wenten anak lan wenten taler guru-guru agama Yahudi drika. Nah kenten taler, wenten anak sane makta anak lumpuh mrika. Anake punika sampun maduwe kapracayaan ring Hyang Yesus prasida ngubadin anake sungkan. Kenten taler, Hyang Yesus uning anake punika maduwe kapracayaan. Raris Hyang Yesus ngandika ring anake lumpuh punika, “Jero, dosan ragane suba kaampurayang.”

Nah drika raris guru-guru agama Yahudine nyalahang Hyang Yesus ring manahnyane sekadi puniki, “Adi anake ene matuhang raga teken Sang Hyang Tunggal? Krana wantah Sang Hyang Tunggal sane sida ngampurayang dosa.”

Nanging Hyang Yesus uning napi isin manah guru-guru agama Yahudine punika. Raris Hyang Yesus ngandika, “Nguda ragane ngelah keneh jele tekening tiang? Tiang bakal muktiang, tiang ngelah kuasa ngampurayang dosa di gumine ene.” Raris Hyang Yesus ngandika tekening anak sane lumpuh punika sekadi puniki, “Jero, bangun ja jerone, gulung tikehe, laut mulih.”

Nah, rika raris anake sane lumpuh punika matangi tur ngulung tikehne luas budal. Akeh anake drika nyaksiang paundukan punika pada angob lan ngluwihang Sang Hyang Tunggal.