Wenten cerita sujati saking Cakepan Sucine indik Hyang Yesus ngubadin anake sane kakuasain buta kala. Sadurunge Hyang Yesus ngubadin anake punika, Hyang Yesus sampun polih namprat angin nglinus ageng ring tengah danune.

Kaceritayang mangkin Hyang Yesus lan para sisiane sampun rauh ring sisi kangin danune. Genahe punika nenten ja wewongkon jagat Yahudine. Risampune Hyang Yesus lan para sisiane rauh irika, rika raris Hyang Yesus kacunduk sareng anak sane kakuasain buta kala. Anake sane kakuasain buta kala punika, akeh pisan buta kala sane nguasain. Ipun setata meneng ring setrane, gelar-gelur, nigtig dewek nganggen batu, tur nenten mapengangge.

Raris Hyang Yesus ngandika ring buta kala punika sapuniki, “Magedi ja uli awak anake ento!”

Raris anak punika matimpuh lan matur sapuniki, “Sang Hyang Yesus, Putran Sang Hyang Tunggal Sane Agung. Sampunang ja siksana titiang!”

Rika raris Hyang Yesus mataken ring buta kalane punika, “Nyen ja cai?”

Lan buta kala punika masaur, “Titiang ‘Penyiuan’ sawireh titiang sareng akeh.” Kenten pasaur buta kala ring Hyang Yesus.

Nah, ring genahe punika, akeh pisan wenten bawi kaangonin olih pangangone. Nah rika buta kala punika mapinunas ring Hyang Yesus matur sapuniki, "Icen ja titiang ngrasukin bawi-bawine punika.” Rika raris Hyang Yesus ngisinin pinunas buta kalane punika. Raris buta kala sane wenten ring dewek anake punika pesu, ngrasukin bawi-bawine sane wenten irika. Lan bawi-bawine punika malaib ring sisin abingane, raris macemplung ring danune. Ring danune punika, bawi-bawine punika pada mati. Kirang-langkung wenten kalih tali bawi sane mati irika.

Nah, para pangangon sane wenten irika, raris matilar nuju kota nyeritayang napi sane kasaksiang. Rika raris akeh anake rauh nyaksiang paindikane punika. Raris nyingakin anake sane kakuasain buta kala sampun kenak tur sampun mapengangge. Raris anake akeh punika ajerih ring Hyang Yesus lan mapinunas mangda Hyang Yesus matilar saking desane punika.

Risedek Hyang Yesus munggah ring prahune, raris anake sane sampun kenak punika mapinunas mangda ipun prasida ngiring Hyang Yesus. Nanging Hyang Yesus ngandika sapuniki, “Kemu ja mulih ka desan ragane. Ceritayang welas asih Sang Hyang Tunggal tekening dewek ragane.”

Raris anake punika budal luas nuju desane, nyeritayang napi sane Hyang Yesus icen ring deweknyane. Lan anake akeh punika pada angob mirengin ceritannyane.