Wenten cerita sujati saking Cakepan Sucine indik Hyang Yesus neduhang angin linus ring tengah danune.

Hyang Yesus puniki wantah guru sane ngajahin kapatutan indik Sang Hyang Tunggal. Ritatkala Hyang Yesus ngajahin, akeh pisan anake mirengin Hyang Yesus. Saking anake akeh punika, Hyang Yesus ngamilih aroras diri sane kadadosang sisia sane setata nyarengin Hyang Yesus.

Tandina, Hyang Yesus ngamanggil makaroras sisiane raris ngandika sekadi puniki, “Lan ja jani nyebrang danu Galileane.” Raris sisiane nyarengin Hyang Yesus nyeberang danune punika sane linggahnyane sawatara solas kilo.

Kacerita mangkin, sampun ring tengah danune. Ring tengah danune punika, Hyang Yesus sirep aris. Ritatkala Hyang Yesus sirep aris, tandumade wenten angin nglinus dados ombak ageng pisan. Toyan danune nglencok tambis-tambis ngabekin prahune. Irika raris para sisian Hyang Yesuse pada ajerih raris majeritan nangiang Hyang Yesus, “Guru! Guru! Iraga tambis-tambis kleb!”

Irika raris, Hyang Yesus matangi raris namprat ombak lan angin nglinuse punika. Nah, ombak lan angin nglinuse punika laut dedeh. Irika raris Hyang Yesus ngandika sakadi puniki, “Ngudiang ja ragane tusing pracaya teken tiang?”

Irika raris para sisiane punika anggob lan ajerih nyaksiang paindikane punika, raris mabaos, “Sujatine anake puniki anak sakti. Ombak lan angin jerih ring ragane.”