Hyang Yesus Kagoda
Wenten cerita sujati saking Cakepan Sucine indik Hyang Yesus kagoda olih ratun buta kalane.
Risampune Hyang Yesus kalukat, Hyang Yesus kakuasain olih Roh Sang Hyang Tunggal. Irika raris Roh Sang Hyang Tunggal nuntun Hyang Yesus ka karang embang sane linggah tur tuh gersang turmaning adoh kapinin desa. Ring genahe punika, Hyang Yesus kagoda olih Ratun Buta Kalane kantos petang dasa rahina suennyane. Selamine irika Hyang Yesus nenten ngajeng napi-napi, raris Hyang Yesus luwe.
Rika raris Ratun Buta Kalane matur ring Hyang Yesus sekadi puniki, “Yening sujati Ragane Putra Tunggal Sang Hyang Tunggal, dadiang ja batu ene ajengan!”
Nanging Hyang Yesus ngandika sekadi puniki, “Tusing patut buka keto, krana ada sabda uli Cakepan Sucine, ‘Manusane tusing ja idup ulian ajengan dogen, nanging uli sekancan sabdan Sang Hyang Tunggale.’”
Raris Ratun Buta kalane ngajak Hyang Yesus ring puncak gununge sane duur. Ring puncak gununge punika, Ratun Buta Kalane ngedengin sekancan karajaan gumine, lan matur sekadi puniki, “Saluwirin kaagungan lan kaluwihan jagi serahang tiang teken Ragane, yening Ragane nyembah tiang.”
Nanging Hyang Yesus ngandika, “Tusing ja patut buka keto, krana ada sabda uli Cakepan Sucine, ‘Kita patut nyembah Sang Hyang Tunggal dogenan.’”
Raris Ratun Buta kalane ngajak Hyang Yesus ring genah utama wangsa Yahudine mabakti ring Sang Hyang Tunggal. Ring duur enebe, Ratun Buta Kalane matur malih ring Hyang Yesus sekadi puniki, “Yening saja Ragane Putra Tunggal Sang Hyang Tunggal, macebur ja uli duur enebe, krana ada sabda uli Cakepan Sucine, ‘Malekate bakal nulungin ragane apanga tusing sengkala.’”
Nanging Hyang Yesus ngandika sekadi puniki, “Tusing patut buka keto, krana ada sabda uli Cakepan Sucine, ‘Eda ja kita mintonin Sang Hyang Tunggal sasembahan kitane.’”
Nah irika raris, Ratun Buta Kalane magedi saking arepan Hyang Yesus. Nanging ia ngrereh galah sane becik jagi malih ngoda Hyang Yesus.