Wenten cerita sujati saking Cakepan Sucine indik Hyang Yesus nyeneng.

Risampune sawan Hyang Yesuse kakubur ring kuburan gua sane anyar, malih kalih rahinane, ring rahine Redite semengan, wenten anak isteri sane sampun pracaya ring Hyang Yesus mrika ka kuburane punika. Anak isteri punika jagi ngaminyakin sawan Hyang Yesuse nganggen minyak sane miyik, sekadi pula-pali anak Yahudine. Risampune anake isteri punika rauh ring kuburane, dapetanga guane sampun mabukak.

Rika raris anake isteri punika gelis-gelis ngrereh para sisian Hyang Yesuse. Risampune rauh ring genah para sisian Hyang Yesuse, rika raris anake isteri punika matemu sareng dane Petrus lan dane Yohanes. Raris anake isteri punika nyeritayang indik sawan Hyang Yesuse sampun ical.

Mireng paindikane punika, dane Petrus lan dane Yohanes malaib-laiban mamargi ka kuburan punika. Risampune rauh ring kuburan, raris dane Petrus macelep ka tengah kuburan guane punika, dapetanga kain pengaput sawan Hyang Yesuse sampun ring tanahe. Raris dane Yohanes pada macelep ka tengah kuburan guane punika. Nyaksiang paindikane punika, raris dane Yohanes pracaya wantah Hyang Yesus sampun nyeneng sekadi jati mula. Risampune punika, raris dane Petrus sareng dane Yohanes budal.

Nah kacerita mangkin, ring rahine wengi para sisian Hyang Yesuse samua ring kamare sane makunci, krana ajerih kapinin para pamimpin agama Yahudine. Risedek para sisia ring tengah kamare sane makunci punika, tandumade ngadeg Hyang Yesus ring arepan ipune. Saha Ida nunjukin tangan lan cokor Idane sane matatu, muktiang wantah Ida nyeneng sekadi jati mula. Kenten pada, petang dasa rahine suwennyane Hyang Yesus sering nyinanyang raga ring sisian-sisian Idane muktiang Ida nyeneng.

Raris, Hyang Yesus masabda sapuniki, “Cening lakar nerima kuasa saking Roh Sang Hyang Tunggal apanga cening dadi saksi di gumine.” Raris Sang Hyang Yesus munggah ka swarga nenten tios wantah genah Sang Hyang Tunggale. Nah, irika raris, sisian-sisiane lunga ka kota nyantosang kuasan Roh Sang Hyang Tunggal.