Abraham Nerima Janjin Sang Hyang Tunggal
Wenten cerita sujati saking Cakepan Sucine indik Sang Hyang Tunggal masemaya ngemertanin dane Abraham.
Risampune I Kain ngadohang raga saking Sang Hyang Tunggal, manusane ngangsan ngakehang ring jagate. Saking anake akeh punika, wenten adiri sane mapesengan "Abraham." Ritatkala dane Abraham mayusa pitung dasa lima warsa, irika raris Sang Hyang Tunggal masabda ring dane Abraham sapuniki, “Luas ja cai ka negara ane Nira patujuhin. Nira bakal nadiang cai bangsa ane gede. Adan caine bakal kasub. Turmaning uling cai, Nira bakal ngemaang wara nugraha sid saluwirin bangsa di jagate.” Raris dane Abraham lan rabin danene mamargi ka negara sane kapituduhin olih Sang Hyang Tunggal.
Nah kacerita mangkin, dane Abraham sampun suwe ring negara sane kapituduhin olih Sang Hyang Tunggal. Irika dane sampun akeh maduwe arta brana, nanging dereng maduwe oka. Yadiastun dane Abraham dereng maduwe oka, dane tetep pracaya ring Sang Hyang Tunggal jagi ngicen oka. Nika mawinan Sang Hyang Tunggal nerima kapracayaan Abrahame, saha Sang Hyang Tunggal nadiang Abraham anak sane patut.
Risampune dane Abraham mayusa sia dasa sia warsa, wenten tamiu sane ngrauhin dane, saha mataken, “Dijake kurenan caine?”
Raris dane nyaurin, “Ipun ring jeroan tendane.”
Malih tamiune punika mabaos, “Buin atiban, kurenan caine Sara bakal nglekadang pianak muani.”
Mirengan paundukane punika, Sara kedek saha ngraos ring angen, “Sajake tiang bakal nglekadang pianak? Sawireh tiang suba mayusa sia dasa tiban tur suba layu; keto mase kurenan tiange sube tua.”
Sujatine tamiune punika nenten tios wantah Sang Hyang Tunggal. Lan Ida raris masabda, “Ngudake kurenan caine kedek? Sujatine tusing ja ada ane keweh di arepan Nirane.”
Nah gelisang cerita, risampune atiban, Sara nglekadang oka lanang sekadi janjin Sang Hyang Tunggale. Lan dane Abraham ngadanin okane punika "Ishak."