Wenten cerita sujati saking Cakepan Sucine indik I Kain lan I Abel.

Risampune Adam lan Hawa puniki kausir saking taman Eden, ipun maduwe oka kalih, sane mapesengan "Kain" lan "Abel." Gaginan ipune makakalih inggih punika: I Kain puniki dados patani lan I Abel puniki dados pengangon.

Tandina Kain ngaturang aturan ipune aparo marupa palewija ring ayun Sang Hyang Tunggale. Kenten pada Abel puniki ngaturang aturan sane marupa pianak kambing sane sulung lan ngaturin aparo sane pinih luwih ring ayun Sang Hyang Tunggal. Ring aturan Abele, Sang Hyang Tunggal kenak. Nanging ring aturan Kaine, Sang Hyang Tunggal nenten kenak. Punika mawinan Kain puniki mamedih.

Raris Sang Hyang Tunggal masabda ring I Kain sakadi puniki, “Wih Kain, nguda semun caine buram? Yaning cai malaksana ane patut, sinah cai katerima. Nanging yening cai tetep malaksana ane jaat, dosa bakal nguasen cai. Lawanja dosane ento!”

Nah gelisang cerita, raris Kain puniki ngajak Abel adin ipune luas ka tegale. Risampune rauh ring tegale punika, tandumade I Kain puniki nyagurin adin ipune, kantos padem.

Risampune Abel puniki padem, raris masabda Sang Hyang Tunggal sekadi puniki, “Wih Kain, dijake adin caine?”

Raris Kain matur sekadi puniki, “Titiang nenten uning. Titiang boyaja pengempun adin titiange.”

Raris Sang Hyang Tunggal masabda sakadi puniki, “Nguda cai malaksana ane jaat? Getih adin caine maura di tanahe. To pinaka bukti cai malaksana ane jaat.” Irika raris Sang Hyang Tunggal mastu I Kain sekadi puniki, “Sujatine tanahe ene tusing ja bakal ngemaang cai asil ane sapatutne. Cai bakal ngumbang kemu mai."

Irika raris Kain puniki matur ring Sang Hyang Tunggal, “Sujatine ukuman titiange punika kalintang abot. Kenten pada yening wenten anak sane kacunduk sareng titiang, sinah titiang jagi kapademang.”

Raris Sang Hyang Tunggal masabda, “Sujatine tusing ada anak ane bakal ngamatiang cai. Yan ada anak ane bakal ngamatiang cai, Nira bakal ngewales kanti ping pitung keti."

Raris Sang Hyang Tunggal ngicen tanda ring Kain mangda anake sane kacunduk sareng Kain, nenten wenten sane bani ngamademang. Raris, I Kain matilar saking genahe punika luas nganginang, ngadohang raga saking ayun Sang Hyang Tunggal.