Wenten cerita sujati saking Cakepan Sucine indik manusane kaukum olih Sang Hyang Tunggal.

Risampune manusane punika ngajeng wohan sane kalarang olih Sang Hyang Tunggal, raris Sang Hyang Tunggal rauh ring taman Eden. Ritatkala manusane mirengin klesegan Sang Hyang Tunggale, raris ipun sareng kalih nyilibang raga. Irika raris Sang Hyang Tunggal masabda, "Ih Adam, dijake cai?"

Raris Adam matur sekadi puniki, "Titiang nyilibang raga sawireh titiang takut, krana dewek titiange malalung."

Raris Sang Hyang Tunggal malih masabda, "Nyen ngorahin cai malalung? Adake cai naar buahe ane Nira tombang ento?"

Raris Adam matur, "Anake istri sane I Ratu genahang ring sisin titiange, ipun sane nguwehin titiang wohan punika, raris titiang nunas."

Raris, Sang Hyang Tunggal masabda ring anake istri punika, "Ngudiang nyai malaksana buka keto?"

Anake istri punika raris matur ring Sang Hyang Tunggal, “I lelipi sane wenten ring tamane puniki, ipun mobabin titiang raris titiang nunas wohane punika."

Krana mobabin Imanusa, Sang Hyang Tunggal raris mastu I lelipi, "Cai kapastu dadi beburon ane paling nista uling seluwirin beburone. Katurunan anake luh ene bakal ngencak tendas caine, lan cai bakal ngenyagang tunggak batis katurunan anake luh ento."

Kenten pada Sang Hyang Tunggal masabda ring anake istri punika sekadi puniki, "Ritatkala nyai beling, liu sajan pakeweh nyaine lan nyakit nyai nglekadang pianak. Tur nyai bakal kakuasain olih kurenan nyaine."

Kenten pada ring anake lanang, Sang Hyang Tunggal masabda sekadi puniki, "Uling jani, tanahe kapastu krana cai nglanggar titah Nirane. Cai bakal keweh ngalih pangupa jiwa, krana tanahe ene bakal ngasilang bet lan ketket. Mapeluh cai ngalih dadaaran kanti cai mabalik buin dadi tanah, krana uli tanah cai kakardi."

Irika raris Sang Hyang Tunggal makarya penganggo malakar aji kulit beburon, kauwehin ring manusane. Raris Sang Hyang Tunggal nundung I manusa saking tamane punika. Lan Ida mrentahang malekate^a, nenten tios roh luwih utusan Sang Hyang Tunggal, mangda nyaga margi nuju tamane punika. Mangdane manusane punika nenten mawali ka tamane punika jagi ngalap wohan papayon kaidupan, sane ngicen urip salamin-laminnyane.