Wenten cerita sujati saking Cakepan Sucine indik Sang Hyang Tunggal nyiptayang manusa lanang lan isteri.

Sang Hyang Tunggal nyiptayang langit lan gumine nganggen sabdan Idane. Salanturnyane Sang Hyang Tunggal nyiptayang manusa manut sekadi gambar praragan Idane. Manusane punika, kawangun saking tanah buk, raris Sang Hyang Tunggal ngupin song irung manusane punika mangda dados urip. Nah manusa kapertama sane kaciptayang Ida anak lanang sane kawastanin "Adam."

Raris Sang Hyang Tunggal nyiptayang taman sane kalintang luwih. Ring tamane punika makeh wenten papayonan sane wohnyane ngenyudin manah. Kenten pada Sang Hyang Tunggal nyiptayang kakalih pepayonan ring tengah-tengah tamane punika. Sane kapertama, papayonan kaidupan. Yening ipun ngajeng saking woh-wohan papayone punika, ipun jagi idup salamin-laminnyane. Sane kakalih, papayonan pengetahuan, nenten tios indik pengetahuan jele kalawanin melah.

Nah irika manusane kagenahang Ida, mangda ipun ngutsahayang lan miara tamane punika. Irika raris Sang Hyang Tunggal masabda kapinin manusane, “Makejang buah ane ada di tamane ene, dadi kita naar, nanging buah ane di tengah-tengah tamane ento, unduk buah pengetahuan jele kalawan melah, da kita naar. Yaning kita naar buahne ento, pedas kita lakar mati.” Kenten Sang Hyang Tunggal masabda, yaning manusane nglanggar titah Sang Hyang Tunggal, ia pedas lakar mati.

Nah kacerita mangkin, Sang Hyang Tunggal masabda, “Tusing melah anake muani ene padidiane."

Raris, risampune kenten, manusane nguehin adan ring saluwirin beburonanne, nanging nenten wenten sane cocok kapinin dewek ipune. Irika raris manusane punika kadadosang sirep aris olih Sang Hyang Tunggal. Risampune manusane punika sirep aris, Sang Hyang Tunggal ngambil tulang igan manusane punika kadadosang anak istri. Irika raris anake lanang punika bangun saking sirepne, laut ngraos, “Bih, ne suba anake ane paling cocok teken dewek tiange krana ia kawangun saking tulang tiange.”

Nah irika raris makadua manusane punika idup ring tamane. Lan ipun nenten mapengangge, nanging nenten ja kimud.