30
Koudyagan woy ko Kamatadyon
11 No kuntoon ka sugu ku kaniu kono’n mabogat no kono now ogkagoon, woy kono’n mariu no kono now ogkoumaan. 12 Ka sugu ku kono’n dio to langit odyow no og-inso kow to “Hontow ka ogpakahondio dio to langit odyow to pog-angoy to sugu, odyow no ogkarinog ta woy ogbabalion ta?” 13 Ka sugu ku konon dio to diipag to dagat odyow no ognangon kow to “Hontow ka ogtalipag to dagat odyow to pog-angoy to sikan, no ognangon to kanta odyow no ogbabalion ta?” 14 Marani kaniu atag ka kinagian ku; duon on to mgo bobo now woy dio to goinawa now odyow no ogbabalion now.
15 Pitow kow, kuntoon igtaruwoy ku kaniu ka og-aamon now. Duon koudyagan woy kabuungan to limang woy duon kamatadyon woy kaogonan to limang. Og-aamon now ko hondoi kow. 16 Hoo su ogsuguon ku sikaniu kuntoon to pogdakol to goinawa now duon to Magboboot no Igbudyag now, no oghipanow kow to mgo daan din, woy ogbabalion now ka kandin no mgo sugu, mgo udlin woy tuaro; no ko sikan ka oghimuon now ogpalinggaat kow no manokal woy ogmoon-ing kow woy ogboligan kow to Magboboot no Igbudyag now duon to tano no ogsooran now odyow to pogtagtuun. 17 Di ko ogsuwoy ka mgo goinawa now no ogligal kow to pogbabali, woy ko ogka-aap kow to pog-unduk to tangkaan to duma pad no mgo tinuuhan no ogsadyoon now, 18 no ognangonan ku sikaniu kuntoon panoy no ogkagugus kow ian. Kono kow ogmaugoy to pog-ugpo to tano no ogsooran now odyow to pogtagtuun ko ogtalipag kow to Jordan.
19 Kuntoon ipakita ku to langit woy to tano no intaruwoy ku kaniu ka koudyagan woy ka kamatadyon, ka mgo pogbolig woy ka mgo tungadyow. Kuntoon, aama now ka koudyagan odyow no ogpalinggaat kow no manokal duma to mgo anak now 20 woy odyow no ogdakolon now ka goinawa now duon to Magboboot no Igbudyag now, woy ogpamminog kow to lagong din woy kono now ogloka-an sikandin. Hoo su ka Magboboot ian ka pigligkatan to koudyagan now, woy ogbogadyan kow rin to moon-ing mgo tuid to tano no inpangulibot din no igbogoy rin to mgo kabuybudyagan now no si Abraham, si Isaak woy si Jacob.