34
Pogkamatoy ni Mosis
1 No nigtakorog si Mosis to Bubungan to Nibo ligkat to napu to Moab to ampow to Pisga no nigtangko to Jerico. To dio sikandin inpakita to Magboboot kandin ka tibon tano ligkat to Giliad pohondio to Dan, 2 ilagkos pad ka tibon tano to mgo lunggunan ni Naptali, ni Ipraim woy ni Manasi, woy ka tano ni Juda pohondio to dagat to ogsaopan, 3 ilagkos pad ka Nigib woy ka tibon aug to Jordan, ka Lunsud to mgo Palmira woy taman to Zoar.
4 No nigkagi ka Magboboot kandin to “Soini ka tano no inpangulibot ku ki Abraham, ki Isaak woy ki Jacob to pogkagi to ‘Igbogoy ku sikan to mgo tipouri now.’ Kuntoon inpakita ku koikow sikan di kono ka ogpakatalipag duon.”
5 No namatoy si Mosis no suguonon to Magboboot duon to Moab, sumao to innangon panoy to Magboboot. 6 Inlobong sikandin to Magboboot duon to Moab, to aug no nigtangko to Bit Pior, di taman kuntoon no allow waro otow no nataga ko hondoi ka lobong. 7 Songo gatus woy kawaan ka pannuigon ni Mosis to pogkamatoy rin, di waro pad nalaburan ka mgo mata rin woy manokal pad sikandin. 8 Nigpandaawit ka mgo otow to Israil tongod ki Mosis to 30 no allow dio to mgo napu to Moab taman to naponga on ka mgo allow to pogdamag woy pogsinogow.
9 No kuntoon naponu si Josue no anak ni Nun to Gimukud to katagaanan tongod su pigsampoongan sikandin to mgo boad ni Mosis. No nigpamminog ka mgo otow to Israil kandin, woy pigbabali ran ka mgo sugu to Magboboot ki Mosis. 10 Ligkat to sikan no allow waro taagtagna no nakalopow to Israil no unawa ki Mosis no nigpatang-tangkooy to Magboboot, 11 woy no nighimu to mgo ogko-in-inuan no mgo indanan no pig-aap sikandin to Magboboot dio to Ehiptu odyow to pogpakita ki Parao, woy mgo hibatoon din woy to tibon koot-otawan din dio. 12 Waro loin no otow ka nakapakita to dakol lagboy no kabogbogan woy mgo mokohinhinaat no mgo hinimuan no pighimu ni Mosis to tangkaan to tibon mgo otow to Israil.