9
Kono’n Tongod to Pogkamatuarong Now
1 Pamminog kow no mgo otow to Israil. Kuntoon ogtalipagon now ka Jordan no woig odyow to pogdogil to mgo koot-otawan no dakol-dakol pad to kaniu woy man-manokal to kaniu woy no nig-ugpo to mgo dakol no lunsud no nalingkusan to mgo aad no batu no titikangi. 2 Manokal woy matangkawal ka mgo otow duon; mgo tipouri ni Anak ian. Nataga kow tongod kandan woy nakarinog kow to nigkagi to “Hontow buwa ka ogpaka-atu to mgo tipouri ni Anak?” 3 Di tuu kow kuntoon no ka Magboboot no Igbudyag now ian ka ogtalipag hun-a kaniu unawa to ogsisilab no hapuy. Oglupoton din sikandan woy ogdoogon din sikandan to tangkaan now. Magaan kow ro ogpakadogil kandan woy ogpanghimatadyan now sikandan, sumao to inpangulibot to Magboboot. 4 Woy ko takas on no pigdogil sikandan to Magboboot no Igbudyag now to tangkaan now, dokow ogkagia duon to goinawa now to “Pig-aap a kai to Magboboot odyow to pog-ugpo kai tongod to pogkamatuarong ku.” Konon maugot sikan. Ogdogilon to Magboboot ka soini no mgo koot-otawan to tangkaan now tongod to karootan dan atag. 5 Konon tongod to kaniu no pogkamatuarong woy to kaniu no karodyowan no ogpakatagtuun kow to tano dan. Tongod to karootan to sikan no mgo koot-otawan atag, ogdogilon sikandan to Magboboot to tangkaan now odyow no ogkatood ka inpangulibot din to mgo kabuybudyagan now no si Abraham, si Isaak woy si Jacob. 6 Sabuta now ian no konon tongod to pogkamatuarong now no ogbogadyan kow to Magboboot no Igbudyag now to soini no marodyow no tano odyow to pogtagtuun, hoo su makogal ka mgo uu now atag no songo koot-otawan.