20
Woig Ligkat to Batu
1 To an-anadyan no buwan to tuid, niglopow ka tibon koot-otawan to Israil dio to Han-hanawan to Sin, woy nig-ugpo sikandan to Kadis. To dio sikandan, namatoy si Miriam woy inlobong sikandin. 2 No kuntoon waro woig no ogko-inom to koot-otawan, woy niglimud-limud ka mgo otow no nig-atu ki Mosis woy ki Aaron. 3 Nig-ogot sikandan ki Mosis no kagi ran “Madmarodyow nasi porom ko nammatoy ki duma to mgo suod ta no nammatoy to tangkaan to Magboboot! 4 Manio to pig-aap nu ka koot-otawan to Magboboot kai to soini no han-hanawan odyow ro no ogkammatoy koy duma to mgo adyam noy kai? 5 Manio to pig-aap koy nu ligkat to Ehiptu pohondii to soini no dorooti no ugpaan? Waro bogas kai, waro mgo pinamua no mgo igira, mgo ubas woy mgo granada. Woy nokoy pad, waro woig no ogko-inom ta!”
6 Pig-ongkoran ni Mosis woy ni Aaron ka nalimud no mgo otow woy nighondio sikandan to gomawan to Tukbung to Pogtangko woy niglangkob sikandan duon to tano, woy inpakita to Magboboot ka kabantug din kandan dio. 7 Nigkagi ka Magboboot ki Mosis to 8 “Puruta nu ka tukod, woy limura now ni Aaron no suod nu ka tibon koot-otawan. Kagii nu soodyo batu to tangkaan to pogpitow ran woy ogtu-aug ka woig ligkat to sikan. Ipalibuwas nu ka woig ligkat to batu woy ogpaka-inom ka koot-otawan duma to mgo adyam dan.”
9 No pigpurut ni Mosis ka tukod ligkat to tangkaan to Magboboot unawa to insugu din kandin. 10 Inpalimud ni Mosis woy ni Aaron ka koot-otawan to tangkaan to batu, di nigkagi si Mosis kandan to “Pamminogi a now no mgo taag-atu kow no mgo otow. Ogkapogos koy buwa to pogpurut kaniu to woig ligkat to soini no batu?”
11 No inkawoy ni Mosis ka boad din woy kararuwa rin lamposi ka batu pinabadyo to tukod. Nigtu-aug ka mabolbol no woig ligkat to batu woy nig-inom ka mgo otow woy mgo adyam dan. 12 Di nigkagi ka Magboboot ki Mosis woy ki Aaron to “Waro makalitos ka pogtuu now no waro a now ilaa no in-oog lagboy to tangkaan to pogpitow to mgo otow to Israil, woy tongod to sikan kono kow on ogpaka-aap to soini no koot-otawan pohondio to tano no igbogoy ku kandan.”
13 Sikan ka pighingaranan no mgo woig to Miribaasu nig-atu ka mgo otow to Israil to Magboboot dio woy dio nigpo-ila ka Magboboot no in-oog lagboy to taliwaro kandan.
Nig-atu ka mgo Otow to Edom duon to mgo Otow to Israil
14 Nigpa-aap si Mosis to mgo otow ligkat to Kadis odyow to pognangon to hari to Edom to “Soini ka kinagian to suod nu no si Israil: Nataga ka to tibon mgo ingkabaybadyari no naligaran noy. 15 Nighondio ka mgo kabuybudyagan noy to Ehiptu woy dio koy nig-ugpo to moon-ing no mgo tuid. Piglo-loigan koy woy ka mgo amoy noy to mgo otow to Ehiptu, 16 di to pogpangiak noy duon to Magboboot, nigpamminog sikandin to pog-umow noy, woy nigpa-aap sikandin to diwata rin no nig-angoy kanami ligkat to Ehiptu. No, kuntoon, kai koy on to Kadis no songo lunsud to oatan to tano nu. 17 Ogpamudyu koy ro koikow no ogligad koy ro to tano nu. Kono koy ogbadyo to mgo kamot now woy ko mgo pinamua-an now to ubas, woy kono koy og-inum to woig to mgo sakuganan now. Oghipanow koy ro duon to daan to hari no kono koy ogsuwoy pohondio to kawanan woy ko pohondio to gibang taman to ogkaligaran noy on ka tibon tano nu.”
18 Di nigtabak si Edom to “Kono ka ogpakabadyo kai. Ko og-ol-oog ka to pogligad, oglibuwas koy no og-atuan noy sikaniu pinabadyo to kampilan.”
19 Nigtabak ka mgo otow to Israil to “Oghipanow koy ro to dakol no daan, woy ko duon otow woy ko adyam noy no og-inum to woig now, ogbadyaran noy ian. Ogkoiniat koy ro to pogligad no oghipanow ro. Waro loin no tuud noy.”
20 Nighutuk sikandan to pogtabak “Kono kow ogpakaligad kai.” No niglibuwas si Edom no nig-atu kandan pinabadyo to dakol no puntuk to mgo mabuut no bagani.
21 No tongod su nigligal si Edom to pogpaligad kandan to tano dan, nigliku ka mgo otow to Israil.
Pogkamatoy ni Aaron
22 Nighipanow ka tibon koot-otawan to Israil ligkat to Kadis woy niglopow sikandan to Bubungan to Hor. 23 To Bubungan to Hor no marani to oatan to Edom, nigkagi ka Magboboot ki Mosis woy ki Aaron to 24 “Ogpaka-agpot on si Aaron to mgo kabuybudyagan din. Kono ogpakasood sikandin to tano no igbogoy ku to mgo otow to Israil, hoo su nig-atu kow daruwa to sugu ku dio to mgo woig to Miriba. 25 Umowa nu si Aaron woy ka anak din no si Iliasar woy aapa nu sikandan dio to ampow to bubungan to Hor. 26 Luunga nu ka mgo kinabo ni Aaron woy isau-ub nu ki Iliasar no anak din, hoo su ogpaka-agpot si Aaron to mgo kabuybudyagan din su ogkamatoy sikandin dio.”
27 Pigtuman ni Mosis ka insugu to Magboboot; nigtakorog sikandan to Bubungan to Hor to pogpitow to tibon koot-otawan. 28 Pigluung ni Mosis ka mgo kinabo ni Aaron, woy insau-ub din to anak din no si Iliasar. No, namatoy si Aaron dio to ampow to bubungan. No niglogsad si Mosis woy si Iliasar ligkat to ampow to bubungan, 29 woy to nakarinog on ka tibon koot-otawan no namatoy on naan si Aaron, nigpandaawit ka tibon lunggunan ni Israil sood to 30 no allow.