14
Nig-atu ka Mgo Otow
1 To sikan no maukilom nigmansinogow to maagbot ka tibon mgo otow to koot-otawan. 2 Nig-aaras ka tibon mgo otow to Israil tongod ki Mosis woy ki Aaron woy pignangonan sikandan to tibon koot-otawan to “Marodyow pad porom ko nammatoy koy dio to Ehiptu! Songo marodyow ko nammatoy ki kai poron to han-hanawan! 3 Manio to pig-aap koy to Magboboot kai to soini no tano odyow ro no ogkohimatadyan koy pinabadyo to kampilan? Ogkarakop ka mgo asawa woy mgo anak noy. Marodyow pad nasi buwa ko ogman-libong ki to Ehiptu?” 4 Woy nigmanang-nangonoy sikandan to “Og-aam ki to otow no og-aap kanta no ogmanlibong kinow to Ehiptu.”
5 No niglangkob si Mosis woy si Aaron no nigpakoid-u to Magboboot dio to tangkaan to tibon koot-otawan to Israil no nalimud dio.
6 Daruwa to sikan no nigsobsob to tano ian si Josue no anak ni Nun woy si Kalib no anak ni Yipuni woy pighigbitadan daruwa ka mgo kinabo dan 7 no nigkagi sikandan duon to tibon koot-otawan to Israil to “Marodyow lagboy ka tano no naligaran noy to pogsobsob noy. 8 Ko ogkarago ka Magboboot kanta og-aapon ki rin to sikan no tano no ian ogpuunan to gatas woy tonob no dakol, woy igbogoy rin kanta sikan. 9 Di dokow og-atu to Magboboot. Woy dokow ogkahallok to mgo otow to sikan no tano su unawa't og-aboongon ta ro sikandan. Warad on ogkaasag kandan, di sikanta atag pigdumaan ki to Magboboot. Dokow ogkahallok kandan.”
10 Di nigbabantaan ka tibon koot-otawan to pogdorogpak to mgo batu duon to kandan. No, niglogsad ka kabantug to Magboboot duon to Tukbung to Pogtangko dio to pogpitow to tibon mgo otow to Israil. 11 Nigkagi ka Magboboot ki Mosis to “Monu kaugoy no ogsamilion a to soini no mgo otow? Monu kaugoy no ogligal sikandan to pogtuu koddi agad takas to tibon mgo ogko-in-inuan no tuus no pighimu ku taliwaro kandan? 12 No kuntoon ogpa-aapan ku sikandan to mokohinhinaat no dau no og-awoon ku sikandan, di oghimuon ku ka mgo tipouri nu no songo koot-otawan no mabogbog woy mabantug pad kandan.”
13 Nigtabak si Mosis duon to Magboboot no kagi “No, ogdinog ka mgo otow to Ehiptu to sikan! Pinabadyo to kabogbogan nu pig-aap nud ka soini no koot-otawan nu ligkat to taliwaro dan. 14 Woy ognangonan dan ka mgo tag-inugpo to soini no tano tongod to sikan. Nakarinog on sikandan no pigdumaan nu, Magboboot, ka soini no koot-otawan, woy nakita ka langlanguan nu woy no nig-ampow kandan ka gaapun nu no nighun-a ka kandan pinabadyo to suwoy no gaapun to allow woy pinabadyo to suwoy no hapuy to maukilom. 15 Ko og-ubuson nu no ogpanghimatadyan nu sikandan to sagboka ro no allow, ognangonnangon ka mgo koot-otawan no nakarinog tongod koikow no kagi 16 ‘Waro naka-adyun naan ka Magboboot to pog-aap to soini no koot-otawan duon to tano no inpangulibot din kandan, no sikan ian no pigpanghimatadyan din sikandan duon to han-hanawan.’ 17 No kuntoon ipakita nu ka kabogbogan nu, iing to innangon nu nokani: 18 ‘Mananoy ogkabou ka Magboboot, woy dakol lagboy ka goinawa rin no mopo-iguon to mgo sao woy mgo pog-atu. Di kono din ogbaagaron ka nakasao; oglogparan din taman to igkatou woy ko igkohop-at no kapunganan ka mgo anak to mgo amoy no nakasao.’b 19 Sumao to dakol no goinawa nu ipo-igu nu ka sao to soini no koot-otawan unawa to pogpo-igu nu kandan ligkat to allow no nigpuun sikandan to Ehiptu taman kuntoon.”
20 Nigtabak ka Magboboot to “Inpo-igu kud on, unawa to inpamudyu nu. 21 Di ogligdongan ku no unawa to manokal a no naponu ka tibon kalibutan to kabantug ku no Magboboot a, 22 waro agad sagboka to mgo otow no nakakita to kabantug ku woy to mgo mokohinhinaat no tuus no pighimu ku duon to Ehiptu woy to han-hanawan, no nigligal sikandan to pogpa-agad-agad koddi to kasampuu 23 waro agad sagboka kandan ka ogpakakita to tano no inpangulibot ku to mgo kabuybudyagan dan. Waro otow no nigsamili koddi ka ogpakakita to sikan. 24 Di tongod su loin ka goinawa ni Kalib no ig-ubus din ka goinawa rin to pog-gaat koddi, og-aapon ku sikandin to tano no inlouy rin woy ogpakatagtuun ka kandin no mgo tipouri to sikan. 25 No kuntoon, tongod su nig-ugpo ka mgo kapunganan ni Amalik woy ni Canaan duon to mgo aug, asoom no allow ogliku kow no oglibong kow to han-hanawan to daan no pohondio to Malaab no Dagat.”
26 Nigkagi pad ka Magboboot ki Mosis woy ki Aaron: 27 “Monu kaugoy no og-aaras soini no maroot no koot-otawan tongod koddi? Nakarinog a to ig-aaras to soini no mgo kapunganan ni Israil no ungud og-aaras. 28 No nangoni now sikandan to “Unawa to manokal a, kagi to Magboboot, oghimuon ku ka mgo innangon now no narinog ku: 29 Ogkangkammatoy kow kai to soini no han-hanawan: kara sagboka kaniu no nakaligad to kawaan no tuid ka kabudyagi rin no nalagkos to pogsool no naka-aaras tongod koddi. 30 Waro agad sagboka kaniu ka ogpakasood to tano no inpangulibot ku no og-ugpaan now poron pinabadyo to inkawoy no boad ku, ko konon si Kalib no anak ni Yipuni woy si Josue no anak ni Nun do. 31 Di to sikan no mgo anak now no naan now ogka-agow, sikandan atag ka ogpaka-ugpo to marodyow duon to tano no pigsamilian now. 32 Di sikaniu, ogkangkammatoy kow to soini no han-hanawan. 33 Ogbabantoy ka mgo anak now to mgo karniru kai sood to kohop-atan no tuid, no ogkabaybadyaran sikandan tongod to kaniu no pog-atu, taman to ogkoubus ogkalobong ka mgo lawa now kai to han-hanawan. 34 Kohop-atan no tuid ian ka igkobaybadyari now tongod to mgo sao now, sagboka no tuid to kara sagboka to kohop-atan no allow to pogsobsob now to tano, woy ogpakagoram kow to pog-atu ku kaniu.’ 35 Sikoddi no Magboboot ian ka nigkagi, woy ogligdongan ku no oghimuon ku soini tibo to soini no maroot no koot-otawan no nasagboka to pog-atu koddi. Kai ro taman ka mgo ukul dan kai to soini no han-hanawan.”
36-37 No sikan ian piglamposan to Magboboot ka mgo otow no inpa-aap ni Mosis odyow to pogsobsob to tano no ian ka mgo otow no ian binunsuran to pog-aaras to tibon koot-otawan pinabadyo to pogpatangkap to maroot no kinagian tongod to tano. Pigbarasan sikandan to Magboboot no nammatoy sikandan to mokohinhinaat no darau to tangkaan to Magboboot. 38 To mgo otow no nigsobsob to tano, si Josue no anak ni Nun woy Kalib no anak ni Yipuni naan do ka nagaat no manokal.
39 To pognangon ni Mosis soini tibo duon to mgo otow to Israil, dakol ka pogpandaawit dan. 40 Masoom pad to pogkapawo nigtakorog sikandan pohondio to mgo bubungan. Nigkagi sikandan to “Nakasao ki. Ogtakorog ki pohondio to tano no inpangulibot to Magboboot.”
41 Di nigkagi si Mosis to “Manio to nig-atu kow to sugu to Magboboot? Kono kow ogpakatood! 42 Dokow ogtakorog su waro nigduma ka Magboboot kaniu. Ogkaroog kow to mgo usig now, 43 su ogpakatangko kow ian to mgo kapunganan ni Amalik woy ni Canaan dio. Kono ogduma ka Magboboot kaniu su nig-iniug kow kandin, woy ogkohimatadyan kow pinabadyo to kampilan.”
44 Di agad to sikan, tongod to pogparakol-dakol dan, nigparagas sikandan nigtakorog pohondio to mgo bubungan, agad to waro nigduma si Mosis, woy waro na-aap ka sooranan to Kasabutan to Magboboot ligkat to pig-ugpaan to mgo otow. 45 No nigtupang ka mgo kapunganan ni Amalik woy ni Canaan no nig-ugpo to sikan no tano, woy pig-atuan dan ka mgo otow to Israil no nig-ituos pohondio to Horma.