13
Ka Pogsobsob to Tano to Canaan
1 Nigkagi ka Magboboot ki Mosis to 2 “Pa-aap ka to mgo otow odyow to pogsobsob to tano to Canaan, ian ka tano no igbogoy ku to koot-otawan to Israil. Aam ka to sagboka no igbudyag to kara lunggunan to Israil.”
3 No sikan ian sumao to sugu to Magboboot inpa-aap ni Mosis sikandan ligkat to han-hanawan to Paran. Tibo sikandan mgo igbudyag to koot-otawan to Israil. 4 Soini ka mgo ngaran to inpa-aap no mgo otow; Ligkat to lunggunan ni Riubin, si Sammua no anak ni Sacur. 5 Ligkat to lunggunan ni Simion, si Sapat no anak ni Hori. 6 Ligkat to lunggunan ni Juda, si Kalib no anak ni Yipuni. 7 Ligkat to lunggunan ni Isakar, si Yigal no anak ni Yosip. 8 Ligkat to lunggunan ni Ipraim, si Hosia no anak ni Nun. 9 Ligkat to lunggunan ni Binyamin, si Palti no anak ni Rapu. 10 Ligkat to lunggunan ni Sibulun, si Gaddiil no anak ni Sodi. 11 Ligkat to lunggunan ni Manasi (no songo lunggunan ni Jose), si Gaddi no anak ni Susi. 12 Ligkat to lunggunan ni Dan, si Ammiil no anak ni Gimali. 13 Ligkat to lunggunan ni Asir, si Situr no anak ni Mikail. 14 Ligkat to lunggunan ni Naptali, si Nabi no anak ni Bopsi. 15 Ligkat to lunggunan ni Gad, si Guil no anak ni Maki. 16 Sikan ian ka mgo ngaran to mgo otow no inpa-aap ni Mosis odyow to pogsobsob to tano. (Pighingaranan ni Mosis ki Josue si Hosia no anak ni Nun.)
17 To pogpa-aap ni Mosis kandan odyow to pogsobsob to tano to Canaan pignangonan din sikandan to “Hondio kow to Nigib woy ogparagas kow pohondio to mgo bubungan. 18 Pitowa now ko mo-omonu ka tano woy pitowa now to mgo otow no nig-ugpo duon ko mabuut woy ko maotoy, ko moon-ing sikandan ko manalimboka ro. 19 Mo-omonu ka tano no pig-ugpaan dan? Marodyow woy ko maroot buwa? Mo-omonu ka mgo ugpaan dan no mgo lunsud? Nalingkusan to aad no batu woy ko waro? 20 Mo-omonu ka tano to mgo kamot? Maambog buwa woy ko magaso? Duon buwa mgo kadyu ko waro? Poomot kow no duon ogka-aap now no mgo bogas ko og-uli kow kai.” (Ian ka buwan to an-anadyan no noinug no mgo ubas poghondio dan.)
21 No sikan ian no nigtakorog sikandan no nigsobsob sikandan to tano ligkat to Han-hanawan to Sin taman to Rihob pohondio to Gomawan to Hamat. 22 Nigtakorog sikandan no nigbadyo to Nigib taman to Hibron no ian ka ugpaan ni Ahiman, ni Sisay woy ni Talmay no mgo kapunganan ni Anak. (Woy on ikapos-ok ka Zoan no taan lagboy no ugpaan to Ehiptu ko napos-ok on to papitu no tuid ka Hibron.) 23 To poglopow ran to Aug to Iskol, nig-abat sikandan to sagboka no sugpang to ubas no duon sagboka no umpung to ubas. Pigloung to daruwa kandan ka sikan no mgo ubas duma to mgo granada woy mgo igira no napurut dan. 24 Pighingaranan dan ka sikan no aug no Aug to Iskol no to kanta pad ‘Umpung’ tongod to umpung to ubas no pigpurut to mgo otow to Israil dio.
25 Takas to kohop-atan no allow nig-uli sikandan ligkat to pogsobsob dan to tano.
Nignangon-nangon Ka mgo Nigsobsob ko Nokoy ka Nabadyaan Dan
26 Niglibong sikandan dio ki Mosis woy ki Aaron woy to tibon koot-otawan to Israil duon to Kadis to Han-hanawan to Paran. Dio to tangkaan to tibon mgo otow nignangon-nangon sikandan ko nokoy ka nabadyaan dan woy inpapitow ran ka mgo bogas no napurut dan. 27 Soini ka ingkagi ran ki Mosis kagi “Nighondio koy to tano no innangon nu kanami, woy maugot ian no ogpuunan to gatas woy tonob no dakol! Soini ian ka mgo bogas no no-utol noy dio. 28 Di mabogbog ka mgo otow no nig-ugpo dio. Dagdakol ka mgo lunsud dan woy makopal ka mgo aad no nakalingkus to mgo lunsud. Woy nokoy pad nakita noy ka mgo kapunganan ni Anak duon. 29 Ka nig-ugpo to Nigib ian ka mgo kapunganan ni Amalik, ka dio to mgo bubungan ian ka mgo kapunganan ni Hit, ni Yibus woy ni Amor, woy ka mgo kapunganan ni Canaan ian ka nig-ugpo to marani to dagat woy dio to ilis to Jordan no woig.”
30 No inpahagtong ni Kalib ka mgo otow dio to tangkaan ni Mosis no nigkagi sikandin to “Oghondio ki porom no ogtagtuunon ta ka tano su ogkohimu ta ian.”
31 Di ka duma no mgo otow no nigsobsob to tano duma kandin nigkagi to “Kono ta ogkagoon to pogmangadyow to sikan no mgo otow; mabbuut pad sikandan kanta.” 32 No sikan ian nigpatangkap sikandan to maroot no nangnangonon duon to mgo otow to Israil tongod to tano no pigsobsoban dan. Kagi ran to “Ogpang-aboong ka tano no pighondiaan noy to mgo otow no og-ugpo dio. Dagdakol ka tibon mgo otow no tag-inugpo dio. 33 Nakita noy ka mgo pagpagamadyan no otowadio (hoo su puun to mgo pagpagamadyan no otow ka mgo kapunganan ni Anak.) To pogpitow noy inat mgo taangas koy ro no maintok, woy songo sikan ka pogpitow ran kanami.”