9
Ka Kasabutan To Magboboot Ki Noi
1 Nigbolig ka Magboboot ki Noi duma to mgo anak din no nignangon “Og-anak kow woy ogmoon-ing kow odyow no ogtangkap kow to tibon kalibutan. 2 Ogmoila on kaniu ka tibo no duon goinawa; mgo adyam, mgo magintaunan, mgo uod-uod, mgo manuk-manuk woy mgo ngaap to woig; sikaniu ka ogboot kandan tibo. 3 Ogpakakoon kow on to tibo no duon goinawa, iing to nokani pigbogadyan ku sikaniu to mgo pinamua, kuntoon igbogoy ku kaniu ka soini tibo.
4 Di dokow ogkoon to sapu no duon pad langosa, hoo su ka koudyagan nigpuun to langosa. 5 Woy ogboboot a tongod to langosa now. Ogbobootan ku ka mgo mananap no oghimatoy to otow woy songo ogbobootan ku ka otow no oghimatoy to songo otow. 6 Agad hontow no oghimatoy to otow songo ogkohimatadyan sikandin to otow; su pighimu to Magboboot ka otow no unawa to aung to Magboboot. 7 Di sikaniu, og-anak kow woy ogmoon-ing kow odyow no ogtangkap kow to tibon kalibutan.”
8 No nignangon ka Magboboot ki Noi woy dio to mgo anak din, no kagi 9 “Kuntoon oghimuon ku ka kasabutan ku kaniu woy dio to mgo kapunganan now, 10 woy dio to tibo no hinimuan no manokal; mgo manuk-manuk, mgo adyam woy mgo magintaunan no niglibuwas to arca duma kaniu; ian dio to tibo no duon to kalibutan no duon goinawa. 11 Oghimuon ku ka kasabutan ku duma kaniu no kono kud oghutukon to pog-awo to tibo no mgo duon goinawa pinabadyo to ugub; warad on ian ugub no oglogpad to kalibutan.”
12 Woy nigkagi ka Magboboot to “Soini ian ka tuus to kasabutan no oghimuon ku duma kaniu woy duma to tibo no duon goinawa taman to katamanan: 13 insabuk ku ka bangow ku dio to saagapun woy ogkohimu sikan no tuus to kasabutan ku dio to kalibutan. 14 Agad kon-u no ogpa-aap a to mgo kibol dio to kalibutan woy oglopow ka bangow dio to saagapun, 15 ogkaroromdom ku ka kasabutan ku duma kaniu woy dio to tibo no duon goinawa no warad on woig no og-ugub no og-awo to tibo no duon goinawa. 16 Agad kon-u no oglopow ka bangow dio to saagapun, ogkitoon ku sikan woy ogkaroromdom ku ka kasabutan no waro katamanan duon to Magboboot woy to tibo no manokal no nigkaloinloin no pighimu ku duon to kalibutan.”
17 No nignangon pad ka Magboboot ki Noi no kagi “Sikan ian ka tuus to kasabutan no nohimu ku dio to tibo no duon goinawa to kalibutan.”
18 Ka mgo anak no lukos ni Noi no niglibuwas to arca ian si Sim, si Ham woy si Yapit. (Si Ham ian ka amoy ni Canaan.) 19 Sikandan ian ka tatou no anak no lukos ni Noi, woy duon nigpuun to kandan ka tibo no mgo otow no nigtangkap kai to kalibutan.
20 Kuntoon, nigpamua si Noi to pamua-anan to mgo ubasasu matipamua ian sikandin. 21 No, niglopow no nig-inom si Noi to binu no nigligkat to pinamua rin no ubas, woy nalasing sikandin woy nighibat sikandin to sood to tukbung din no naluungan. 22 Nakakita si Ham, no amoy ni Canaan, to amoy rin no naluungan, woy nignangon-nangon sikandin to mgo suod din no dio to libuwasan. 23 Di, nigpurut si Sim woy si Yapit to kinabo, woy insampoy ran dio to mgo pamanadyon dan; woy nig-ituos to poghipanow no pigtol-oban dan ka amoy ran no naluungan. Nig-iniug sikandan odyow no kono ogpakakita sikandan to amoy ran no naluungan.
24 To na-alipapasan on si Noi woy pignangonan sikandin to pighimu to kimud din, 25 nignangon sikandin no
“Ogkatungadyawan si Canaan!
Ogkohimu sikandin no pinakamaupot no uripon dio to mgo suod din.”
26 Nigkagi pad si Noi no
“Ogkaboligan ka Magboboot no Igbudyag ni Sim!
Ogkohimu porom si Canaan no uripon ni Sim.
27 Ogparakoon porom to Magboboot ka tano ni Yapit;
og-ugpo si Yapit dio to mgo tukbung ni Sim woy ogkohimu si Canaan no uripon din.”