Mgo Hinimuan 8

^1-2 Si Saulo, nig-uyun to kamatayon ni Istiban. Di duon mgo otow no dakol so goinawa ran to Magboboot. No nig-alap dan ka lawa ni Istiban woy dakol ka pogpandawot dan no inlobong dan on.

No ligkat to sikan no allow to pogkamatoy ni Istiban, nigbunsud on ka dakol no igkabaybayari. No ka mgo otow no nigtuu ki Hisus no dio to Hirusalim, nabaybayaran on to mgo otow no waro mogtuu. Sikan ian, ka mgo otow dio no nigtuu ki Hisus, nokogsuwoysuwoy on no dio mogdolog to agad hondoi no lunsud duon to Probinsia to Hudia woy dio to Probinsia to Samaria. No ian naan do nagalat dio to Hirusalim ka mgo suguanon ni Hisus. ³ Di si Saulo, pigbayadbayad to mgo otow no nigtuu ki Hisus. No niglusuran din on ka agad hondoi no baloy no duon nigtuu. No agad lukos to boi, pigdakop din woy impapirisu rin on.

⁴ No ka mgo otow no nanuwoysuwoy, agad hondoi makarolog sikandan, innangonnangon dan ka kinagian to Magboboot. ⁵ Si Pilipi, songo nighipanow on no oghondio to ugpaan to Samaria. No nignangonan din ka mgo otow dio to, “Si Hisus, ian ka Im-imanan to mgo Koot-otawan no ogkohingaranan ki Kristu.” ⁶ No ka mgo otow no mohon-ing, pogdinog dan to kagi ni Pilipi woy pogkita ran to mgo kabolbolonganan woy ka mgo indanan no igmalogot to ignangonnangon din, nigsagboka ro ka goinawa ran to ogpamminog kandin. ⁷ Ian su mohon-ing ka mgo busow no namanlibuwas on to lawa to mgo otow no tahan no nasoloran to busow. Namangiak on ka mgo busow to ogmanlibuwas on. Woy mohon-ing no mgo otow no napulid woy ka nigkolog to lawa ran no noulian on to goramon dan. ⁸ Sikan ian to dakol ka ingkarago to mgo otow dio to sikan no ugpaan.

⁹ Di duon sagboka no bailan dio no ogkohingaranan ki Simon. No to pila on no tuid, duon nohimu rin no mgo pamulinganon no ingkabolongbolong to mgo otow to sikan no lunsud woy to tibo to sikan no Probinsia to Samaria. No nignangonan ni Simon ka mgo otow to sikandin kun ka mamabogbog. ¹⁰ Ka tibo no mgo otow, agad ka daddakol woy ka malmalintok, nigpamminog ki Simon. No nigkagi ran to, “Sikandin ka ogkohingaranan to Mabogbog su sikandin ka nakaalap to kabogbogan to Magboboot,” kagi to mgo otow. ¹¹ Sikan ian to namminog on ka mgo otow ki Simon su nalugoy on no nabolongbolong sikandan to mgo pamulinganon no nohimu rin. ¹² Dokad di to pogdinog dan to kagi ni Pilipi, nigtuu on sikandan to sikan no Maroyow no Nangnangonon din tongod to pandatuan to Magboboot woy tongod to duon katondanan to ngaran ni Hisu Kristu. No nigpabautismuan on ka nigtuu on ki Hisus, lukos woy boi. ¹³ Agad si Simon no ka bailan, songo nigtuu on ki Hisus woy songo nigpabautismuan on to woig. Pogkaponga, nigluyud on ki Pilipi. Pogpitow ni Simon to oghimuon ni Pilipi no mgo mabogbog no kabolongbolonganan woy to mgo indanan no igmalogot to kinagian to Magboboot, noinuinu lagboy.

¹⁴ Nò, dio to Hirusalim, nigdinog ka mgo suguanon ni Hisus to duon mgo taga Samaria no nigtuu on to kinagian to Magboboot. Sikan ian to nigpohondio dan on si Pedro woy ki Huan dio to kandan. ¹⁵ Pogkouma dan on dio to Samaria, nig-ampuan dan ka mgo nigtuu ki Hisus su oyow ogkabogayan on sikandan to Gimukud to Magboboot. ¹⁶ Ian su nigpabautismuan on sikandan to ngaran ni Hisus no Lagboy no Igbuyag ta di waro pad mabogayi sikandan to Gimukud din. ¹⁷ No to pog-ampu woy ni Pedro mgo nigtuu no mgo taga Samaria, nigtorong to bolad dan. No niglonaan on sikandan to Gimukud to Magboboot.

¹⁸ Pogpitow ni Simon to oglonaan on to Gimukud to Magboboot ka mgo otow to ogtorongan on to bolad to mgo suguanon ni Hisus to og-ampuan on, ogbogayan poron ni Simon to salapì. ¹⁹ No kagi rin kandan to, “Bogayi a now kun to sikan no kabogbogan su oyow agad hontow no ogtorongan ku to bolad, songo ogkalonaan on to Gimukud to Magboboot.” ²⁰ Di nigtabak si Pedro ki Simon to, “Songo ogkalogparan ka rod no songo ogkoongkoran nu ro ka salapi nu. Nigmaroot to pogdoromdom nu su ogbolion nu porom ka igbogoy ro duon to Magboboot. ²¹ Waro labot nu ka soini no oghimuon noy su kono no maroyow ka goinawa nu to tangkaan to Magboboot. ²² Sonditi nud on ka soini no maroot lagboy no tuud nu woy ampui nu ka Lagboy no Igbuyag ta no si Hisus oyow, ko ogkohimu, ogpasayluan din on ka salo nu no ogligkat to soini no maroot no duon to goinawa nu. ²³ Ian su natagaan kud ka goinawa nu to dakol ka ogkoibogan nu to mgo salapi woy nakodkoran ka dod to mgo salo nu,” kagi ni Pedro. ²⁴ Nigtabak si Simon ki Pedro to, “Ampui a nu kun to Lagboy no Igbuyag ta no si Hisus oyow kono ad ogkoumaan to agad nokoy to soini innangon nu kanak.”

²⁵ Pogkaponga woy ni Pedro to ig-anad dan woy to igmalogot to kinagian to Lagboy no Igbuyag ta no si Hisus, nig-uli on dio to Hirusalim. Moon-ing ka nigsagpitan dan no mgo lunsud dio to ogkabayaan dan dio to Probinsia to Samaria. No innangonnangon dan ka soini no Maroyow no Nangnangonon tongod ki Hisus.

Si Pilipi woy ka Sinaligan no taga Etiopia

²⁶ Duon diwata to Lagboy no Igbuyag ta no nignangon ki Pilipi to, “Sasindog kad woy hipanow kad on. Dio ka ogbayo to dalan no ogligkat to Hirusalim no ogpohondio to lunsud to Gasa.” Ka sikan no dalan, dio ogpakabayo to holholawan.

^27-28 Inogo on no nigsasindog si Pilipi woy nighipanow on. Pogkalugoy no duon nabayaan din no otow no taga Itiopia no nakasakoy to kalisa. Dakol ka ngaran to sikan no otow su ian ka ogtalipun to mgo salapi to igbuyag dan no boi ogkohingaran dan si Kandas. Ka sikan no taga Etiopia, dio mogligkat to Hirusalim. No ian din inhondio su oyow ogsimba. No kuntoon to pog-uli din, duon pigbasa rin no ingkasulat dongan to talagnangon to kagi to Magboboot no si Isaias. ²⁹ Kagi to Gimukud to Magboboot ki Pilipi to, “Dio kad on ogsakoy to sikan no kalisa.” ³⁰ No nigpallaguy si Pilipi no ogluyud on to sikan no kalisa woy nigdinog to ogbasa ka otow to sikan no sikan no ingkasulat ni Isaias. Kagi ni Pilipi kandin to, “Og-inso a koykow ko ogpakasabut ka to sikan no ogbasoon nu?” ³¹ Kagi to taga Itiopia, “Ogmonuon ku to ogsabut su waro man og-anad kanak?” No impasakoy rin on si Pilipi no ogpinpinnuu to longod din. ³² No soini ka ogbasoon din to ingkasulat ni Isaias to Tahan no Kasulatan to kinagian to Magboboot to:

“Ian din ogkounawaan ka karniru su kono ogngangang ko oghimatayan.

Woy songo ogkounawaan ka nati to karniru su agad ogkagisan ka bulbul, di kono ogkakagi.

³³ Agad waro salo din, nigpasiporan woy niglogparan.

Waro pinanganak din su nighimatayan dan.”

³⁴ Kagi to taga Etiopia ki Pilipi to, “Hontow ka ogkatuon to sikan no innangon to sikan no talagnangon to kagi to Magboboot -- ka kandin no lawa woy ko songo otow?” ³⁵ Nò, duon do ian bunsuri ni Pilipi ka poglituk din to sikan no pigbasa to sikan no taga Itiopia to Tahan no Kasulatan. No innangonnangon din ka soini no Maroyow no Nangnangonon tongod ki Hisus.

³⁶ No to dio pad sikandan to dalan, nakabayo sikandan to songo woigan. Kagi to taga Itiopia to, “To, duon woig. Manio to kono a nu ogbautismuan” ³⁷ [Kagi ni Pilipi, “Ogkohimu, ko ogtiboon nu ka goinawa nu to ogtuu ki Hisus.” Kagi to taga Itiopia to, “Ogtuu a ian to si Hisu Kristu, ian ka Anak to Magboboot.”]

³⁸ No nigpasagdokon on to taga Itiopia ka sakayan no nanlogsad on ka daruwa. Nanopak sikandan duon to woig no nigbautismuan ni Pilipi ka taga Etiopia. ³⁹ Poggakap dan on, pigsakolow to Gimukud to Magboboot si Pilipi no warad kitaa to taga Itiopia. Di nigparagas on to taga Itiopia ka poghipanow rin no ungod nigsayo-sayo su narago lagboy. ⁴⁰ Di si Pilipi atag, diad on makita to lunsud to Asutu no nigparagas to poghipanow rin no oghondio to Sisaria. No innangonnangon din ka Maroyow no Nangnangonon tongod ki Hisus dio to tibo no mgo lunsud dio to ogkabayaan din.