9
Ka Pogtuu ni Saulo
1 Di si Saulo, nigparagas ka igkabolu din no ungod ogpasait to ogpanhimatoy to mgo otow no ogtuu ki Hisus. Sikan ian to nighondio sikandin to sikan no Labow no Talagpanubad to sikan no Dakol no Ampuanan dan no dio to Hirusalim. 2 No nigbuyu to mgo sulat no og-alapon din dio to mgo igbuyag to mgo anaranan to mgo Hudiu no dio to lunsud to Damasku oyow ko duon nig-amut to Dalan to pogtuu ki Hisus, igbogoy ran ki Saulo oyow ogdakopon din on sikandan, ka mgo lukos woy ka mgo boi. No ogbanggutan din woy og-alapon din dio to Hirusalim su igpapirisu rin on. 3-4 Pogkaponga, nighipanow on woy si Saulo no oghondio to lunsud to Damasku. No to marani ran on to Damasku, natokow sikandan to layag no nigligkat to langit. No si Saulo, napolod do duon to sasindogan din. No duon pigdinog din no nigkagi kandin to, “Wow Saulo, manio to ogbaybayaran a nu?” 5 Kagi ni Saulo to, “Buyag, hontow ka?” Nigtabak ka nigkagi to, “Sikanak, no si Hisus no ogbaybayaran a nu. 6 Nò, onow kad on. Paragas kad on no ogsolod to lunsud to Damasku. Ognangonan kad dio ko nokoy ka igpohimu ku koykow,” kagi ni Hisus. 7 Ka mgo otow no nigduma ki Saulo, duon do nansasindog to nigsasindogan dan no warad mogkagi su duon ogdinogon dan no kagi di waro ogkitoon dan no otow.
8 Pogkaponga to nig-onow on si Saulo no poghimata rin, kono ogkita. Sikan ian to piggongonan dan ka bolad din no nigkitkit dan sikandin dio to lunsud to Damasku. 9 Tatolu on no allow si Saulo dio to Damasku no kono ogkita woy waro nigkoon woy waro nig-inum to agad nokoy.
10 Nò, duon dio to Damasku no sakup ni Hisus, no ogkohingaranan ki Ananias. Duon impapitow kandin no nigpaatawan. No nigkita rin to Lagboy no Igbuyag ta no si Hisus. Kagi ni Hisus kandin to, “Ananias.” No nigtabak si Ananias to, “Lagboy no Igbuyag ku, soini a.” 11 Kagi to Lagboy no Igbuyag ta kandin to, “Sasindog kad on. Hondio kad to dalan no oghingaranan to Matul-id. Pamanghaan nu ka baloy to songo otow no oghingaranan ki Hudas su duon otow no nig-datong to baloy rin no taga Tarsu. Ka ngaran din si Saulo. No og-ampu kanak. 12 Nigpaatawan sikandin no pigkita ka nikandin no ogtorongan nu sikandin to bolad nu. Woy og-ampuan nu oyow ogpakagimulat on ka mata rin,” kagi ni Hisus. 13 Kagi ni Ananias, “Buyag, mohon-ing ka ogdinogon ku to mgo maroot no nighimu to sikan no otow no nigbayadbayad to mgo otow no nigtuu koykow no dio to Hirusalim. 14 Woy ian to inhongkai ni Saulo su duon katondanan din ligkat to mgo igbuyag to mgo talagpanubad to oyow ogpandakopon din ka tibo no mgo otow kai no ogsampit to ngaran nu.” 15 Di kagi to Lagboy no Igbuyag ta no si Hisus to, “Hondio kad on su si Saulo, ian ka pig-alam ku no ogpatokod to ngaran ku dio to mgo otow no kono no Hudiu, woy dio to dakol no mgo igbuyag to mgo dakol no mgo ugpaan. Woy songo ignangonnangon din dio to mgo Hudiu no ian pinanganak ni Israil. 16 Woy oghitagoon ku si Saulo ko songo monu ka ogpokouma kandin to igkabaybayari no ogligkat to pogtuman din kanak,” kagi ni Hisus.
17 Sikan ian to nighipanow on si Ananias no oghondio to baloy no nig-ugpaan ni Saulo. Pogsolod din, nigtorongan din si Saulo ka og-ampuan no nigkagi rin to, “Sulod, ian inhonkai ku su pigsugu a ni Hisus no ian Lagboy no Igbuyag ta. Sikandin ka niglibuwas koykow dio to dalan. Woy pigsugu a rin kai su oyow ogpakagimulat on ka mata nu woy oyow ogbogayan kad on to Gimukud to Magboboot.” 18 Inogo on no duon naragdag no nigligkat to mata ni Saulo ka ogkoiling to mgo durulison. No nakagimulat on ka mata rin. Pogkaponga, nigsasindog woy nigpabautismuan on. 19 Pogkaponga, nigkoon on woy nouli on ka dayagang din.
No to pila pad no allow to pog-ugpo ni Saulo dio to lunsud to Damasku, nigluyudluyud on to mgo otow no nigtuu ki Hisus. 20 Magaan nigsolod si Saulo dio to anaranan to mgo Hudiu no dio to Damasku. Woy innangonnangon din on ka tongod ki Hisus. Kagi rin, “Si Hisus, ian ka Anak to Magboboot.” 21 Nabolongbolong ka tibo no mgo otow no nakarinog to kagi ni Saulo. Nigmoin-insooy sikandan to, “Inat to soini ka nigbayadbayad to mgo otow no nigtuu ki Hisus no dio to Hirusalim? Nahan ta no ian inhongkai rin su oyow ogdakopon din on ka mgo otow no nigtuu ki Hisus oyow ogkaalap din sikandan dio to Hirusalim no igpatangko sikandan to mgo igbuyag to mgo talagpanubad to dakol no Ampuanan ta.” kagi to mgo otow. 22 Di nasi imbaghot ni Saulo ka ignangonnangon din su igmalogot din lagboy to si Hisus, ian ka Im-imanan to mgo Koot-otawan no ogkohingaranan ki Kristu. No ka mgo Hudiu no dio to Damasku, warad makatabak.
23 Pogligad to pila pad no allow no nigbabantaan on ka mgo Hudiu to oghimatayan dan si Saulo. 24 No to maallow woy to marusilom, ogbantayan dan ka mgo gumawan to lunsud. Di nangonan on si Saulo to tuud dan to oggopasan porom sikandin oyow oghimatayan porom, 25 Di pogkamarusilom on, ka mgo otow no nigtuu ki Hisus, impatagu dan si Saulo to ogkoiling to langkap no intuntun dan dio to tano dio to limang to sikan no matikang no alad no inlingut to lunsud oyow ogpakapallaguy on. a
Ka Poghondio ni Saulo to Hirusalim
26 Pogkouma ni Saulo dio to Hirusalim, nig-amut on poron to mgo otow no nigtuu ki Hisus diò. Di waro mogpaagad-agad sikandan su natibo nahallok ki Saulo, su waro dan tuui to songo nigtuu on ki Hisus. 27 Di si Birnabi atag, pighinggat din si Saulo dio to mgo suguanon ni Hisus. No innangonnangon ni Birnabi kandan ka sikan no inhipanow ni Saulo ka nighondio to Damasku woy ka impapitow kandin to Lagboy no Igbuyag ta no si Hisus no niglibuwas kandin dio to dalan. Woy innangon din to nigkagi si Hisus kandin woy to waro mahallok si Saulo no ognangonnangon to mgo taga Damasku tongod ki Hisus. 28 Sikan ian to nakarumaruma on si Saulo to mgo otow no nigtuu no dio to Hirusalim. 29 Woy waro mahallok si Saulo to ognangonnangon to mgo otow tongod to ngaran to Lagboy no Igbuyag ta no ni Hisus. Pig-al-alukuy rin ka mgo Hudiu no ogkagi to kinagian no Ginirigu woy nig-apulan din sikandan tongod to pogtuu ki Hisus. Di noiniatan dan no oghimatayan sikandin. 30 No ko nataga ka mgo nigtuu to oghimatayan porom si Saulo to mgo Hudiu no ogkagi to Ginirigu, pighinggat dan sikandin dio to lunsud no Sisaria, woy impohondioon dan on sikandin to lunsud to Tarsu.
31 No ka mgo otow no nigtuu ki Hisus no nan-ugpo dio to mgo Probinsia to Hudia, woy ka Galilia, woy ka dio to Samaria, nigmaroyow on to pog-ugpo dan su warad og-ogot kandan. Nohirosonan on ka pogtuu ran ki Hisus. No agad nokoy no oghimuon dan, og-ayunon dan on ka batasan dan to pogtahud dan ki Hisus. Woy nigbuligan to Gimukud to Magboboot ka goinawa ran woy natimtimulan on ka mgo otow no nigtuu.
32 Si Pedro, nighipanow on no ogpanlouy to mgo otow no nigtuu ki Hisus. Pogkalugoy, nokouma on dio to mgo nigtuu no dio to lunsud to Lida. 33 No dio to Lida, nokogkita si Pedro to otow no ogkohingaranan ki Inias. No taman to wawalu no tuid, waro mokoonow su nigkolog ka lawa rin. 34 Kagi ni Pedro kandin to, “Inias, si Hisu Kristu ka og-uyag to lawa nu. Onow kad on. Woy tapirad ka pighibatan nu.” Inogo on no nokoonow woy nakasasindog on. 35 No ka tibo no mgo taga Lida woy ka mgo taga Saron, nakakita to sikan no otow no noulian on, woy nigtuu on to Lagboy no Igbuyag ta no si Hisus.
36 Nò, dio to lunsud to Hupi duon boi no tahan on no nigtuu ki Hisus. Ka ngaran din to Hinibriu si Tabita. Di ko Ginirigu, si Dorkas. No ko kanta pà, ka lituk to ngaran din, Usa. Maroyow no boi si Dorkas, su dakol ka igkohoy-u rin to mgo otow woy magaan ogbogoy ko duon og-awoson.
37 No dio pad si Pedro to Lida, nigdaralu on si Dorkas no dio to Hupi woy namatoy on. Pogkaponga to nigpanarapu to mgo boi ka lawa ni Dorkas no namatoy, pig-alap dan on dio to songo sinabongan dio to ampow to baloy no impohibat dan on.
38 Nò, su marani ro ka lunsud to Hupi to lunsud to Lida, nanangonan on ka mgo otow no nigtuu ki Hisus no dio to Hupi to duon si Pedro dio to Lida. Sikan ian to pigsugu dan ka daruwa no lukos dio ki Pedro no nigbuyu dan kandin to, “Agpas ka no ogduma kanami dio to Hupi.” 39 Sikan ian to nigsasindog on si Pedro, no nigduma kandan. Pogkouma ran dio to baloy ni Dorkas, nighinggat dan si Pedro dio to sikan no sinabong no dio to ampow. Ka tibo no mgo boi no nabalu, nigsasindog to longod ni Pedro no ogmaninsinogow. Woy impapitow ran kandin ka mgo sabinit dan no nighimu ni Dorkas no manokal pad. 40 Di impalibuwas on ni Pedro ka tibo no mgo otow. No nigluhud on sikandin no nig-ampu to Magboboot. Pogkaponga, nigtangkaan din ka lawa to namatoy no kagi rin kandin to, “Tabita, onow kad on.” Inogo on no nighimata on si Dorkas. No pogpitow rin ki Pedro, nigpinpinnuu on. 41 Nigtinawo ni Pedro ka bolad ni Dorkas no nigpasasindog din on. Woy pig-umow rin ka mgo otow no nigtuu lagkos to mgo balu, no impapitow rin on si Dorkas no nouyag on.