7
Ka Innangonnangon no Pogtabak ni Istiban
1 Nò, kagi ka Labow no Talagpanubad ki Istiban to, “Og-inso a koykow ko tu-tuu ian ka sikan no innangon dan?”
2 Kagi ni Istiban,. “Mgo amoy woy mgo sulod, pamminog kow to soini no igtabak ku kaniu. Dongan, ka Magboboot no ian ta oghingaranan to malayag, niglibuwas to kaap-apuan ta no si Abraham. Ka sikan, dio dod nig-ugpo sikandin to ugpaan to Misopotamia no waro pad moghalin dio to lunsud to Haran. a 3 Kagi to Magboboot kandin to, ‘Awo kad on to ugpaan nu woy to mgo sulod nu. Woy halin kad on dio to songo ugpaan no igpapitow ku koykow.’ b 4 Pogkaponga,” kagi ni Istiban, “no nighipanow on si Abraham ligkat to tahan no ugpaan din to Kaldia no nighalin on dio to lunsud to Haran. Pogkalugoy no namatoy on ka amoy ni Abraham, no pighutuk pahalina to Magboboot sikandin to pog-ugpo din kai to soini no tano no ogkougpaan ta kuntoon. c 5 Di waro pad mabogayi si Abraham to agad songo dangow no tano. Di nigsabut ka Magboboot kandin to, ‘Uromò, igbogoy ku koykow woy to mgo pinanganak nu ka soini no tano.’ Di ka innangonnangonan din ki Abraham to sikan, waro pad bato din. +5 Ogkabasa to Genesis 2:7 woy 13:15 woy 15:18 woy 17:8. 6 Di innangon to Magboboot ki Abraham to uromò, ogkohimu ka mgo pinanganak din no agpot dio to mariu no ugpaan dio to loin no mgo otow. No og-uriponon dan woy ogbayadbayad to mgo pinanganak din taman to hop-at no gatus on no tuid. 7 Di kinagian to Magboboot ki Abraham to, ‘Oglogparan ku ka mgo otow no og-uripon to mgo pinanganak nu. Pogkaponga, og-awo on ka mgo pinanganak nu woy ogpakalibong on to soini no tano to Kanaan. No og-ampuan a ran kai.’ d
8 Pogkaponga,” kagi ni Istiban, “insabut to Magboboot ki Abraham to og-awoson to ipatuli din ka kandin no lawa woy ka lawa to mgo anak din no lukos woy ogsugu to ogpatuli on ka uromo no mgo pinanganak din. Ko duon on bato ni Abraham, no si Isaak, no ko wawalu on ka allow ligkat to poglosut din, pigtuli din on. Pogkalugoy, songo nigtuli ni Isaak ka kandin no bato no si Hakob, woy songo pigtuli ni Hakob ka sampulu woy daruwa no bato din. No ian ka mgo kapunganan ta,” kagi ni Istiban. e 9 “Di ka sikan no mgo anak ni Hakob, nigsilag to hari ran no si Husi woy nigduwad dan on sikandin oyow nouripon sikandin dio to Ehipto. Di nigdumaruma ka Magboboot sikandin f 10 woy nigpangabangan din woy nohoy-uan din si Husi to tibo no ingkabayo din no igkabaybayari. Sikan ka ligkatan to nohoy-uan si Husi to igbuyag to mgo taga Ehipto no si Paraon woy nakatokod sikandin to mougsob si Husi. Sikan ian to pighimu ni Paraon si Husi no gobirnador. No ian on ka talagboot to tibo no kalaglagan woy ka mgo sakup ni Paraon. g
11 Pogkalugoy,” kagi ni Istiban, “no nigdatong on ka tigbitil dio to Ehipto lagkos to tibo no ugpaan to Kanaan no ian ugpaan ni Hakob. No nabaybayaran on ian ka tibo no mgo otow. Ka mgo kaap-apuan ta,” kagi, “waro ogkitoon dan ko hondoi ka ogkakoon dan. h 12 Di ko nakarinog si Hakob to duon koonon dio to Ehipto, impohondio din on ka mgo anak din no ian mgo kaap-apuan ta. Sikan ka an-anayan no poghondio dan to Ehipto. 13 Ka igkaruwa no poghondio dan, nigpatotokoroy si Husi to mgo kakoy rin. Songo impatokod din ki Paraon ka kandin no mgo kakoy. i 14 Woy impaangoy ni Husi ka amoy rin no si Hakob, mgo sulod din. Kapituan woy lalimma sikandan no mgo otow ka nanhondio to Ehipto. j 15 Dio nammatoy si Hakob. Woy pogkalugoy, songo namatoy on ka mgo anak din no ian mgo kaap-apuan ta,” kagi ni Istiban. k 16 No pogkalugoy, nan-alap dan on ka mgo bokog dan dio to kandan no ugpaan to Sikim. No inluglug dan to sabalanan no nigboli ni Abraham dongan to mgo anak ni Hamor. l
17 Pogkalugoy,” kagi ni Istiban, “to ogmarani on ogtuman to Magboboot ka impanoy din insabut ki Abraham,m no nigmoon-ing on ka mgo pinanganak ni Hakob no dio to Ehipto. Ka sikan, ogkabasa to Exodo 1:7. 18 No ka mgo igbuyag to Ehipto, nakaliwanliwan on taman to duon on ka waro mataga ko hontow si Husi. 19 No ka sikan no igbuyag, niggawayan woy nigbayadbayad to mgo kaap-apuan ta. Woy pigpogos din sikandan to oyow ogpoongkoran dan ka mgo anak dan dio to tano oyow ogkamatoy. n
20 Sikan ka igkabayo dan,” kagi ni Istiban, “no nootow on si Moisis. Maroyow ka pogpitow to Magboboot kandin. No taman to tatolu on no bulan nouyamu si Moisis dio to baloy to amoy rin. o 21 Di ko naang-anggaan on sikandin, nakita on to boi no anak to igbuyag to Ehipto. No pig-uyamu rin on si Moisis woy pig-iling din on to anak din on ian lagboy. p 22 Naanad on si Moisis to tibo no katouanan to mgo taga Ehipto. No nabantug sikandin su dakol ka katouanan din to mgo hinimuan woy to mgo kinagian.
23 No to kohop-atan on ka tuid ni Moisis, nakaroromdom sikandin to ogpanumbaloy dio to ugpaan to mgo duma rin no mgo pinanganak ni Israil. q No ka nigpanumbaloy si Moisis dio to kandan, 24 duon nabayaan din no otow no pinanganak ni Israil no nabaybayaran to otow no taga Ehipto. No nigpangabangan ni Moisis ka otow no nabaybayaran woy nighimatayan din on ka taga Ehipto. r 25 Nahan ni Moisis ko ogpakasabut buwa ka mgo duma rin no pinanganak ni Israil to nigtuud ka Magboboot to sikandin ka ogpangabang kandan no ogkabaybayaran. Di waro dan masabuti. 26 Pogkapawò, nighondio man do si Moisis to sikan no ugpaan to mgo duma rin, no nakabayo man do to dangob no daruwa no otow no ogpoog-ogotoy. Nigpoul-ulioy on porom ni Moisis sikandan no pigkagian din to, ‘Manio to ogpohisaksakitoy kow to sikan do ka apu now?’ 27 Di ka sagboka no otow no nakasalo to duma rin, pigkois din si Moisis to kagi rin to, ‘Manio to sikoykow ka ogboboot kanami? Bak ko sikoykow ka igbuyag noy bali to konò. 28 Koiniat ka buwa ko songo oghimatayan a nu unawa to pighimatayan nu ka taga Ehipto gabii,’ kagi to otow,” kagi ni Istiban.
29 “Pogdinog ni Moisis to sikan no kagi, nakapallaguy on no dio mokougpo to mariu no ugpaan to Midian. Dio nangasawa si Moisis. No pogkalugoy, daruwa on ka bato din no lukos.” s
30 Nigligad on ka kohop-atan no tuid. No songo allow, dio si Moisis to songo bubungan no ogkohingaranan dan to Sinai no dio to holholawan. No duon suguanon to Magboboot,t no nigligkat to Langit no niglibuwas ki Moisis dio to malopot no kayu no nalogdog. 31 Pogpitow ni Moisis to sikan, nabolongbolong. Di kagi to Lagboy no Igbuyag to, 32 ‘Sikanak ka Magboboot to mgo kaap-apuan nu, no ian dod ka Magboboot ni Abraham, woy ki Isaak, woy ki Hakob.’ Nigkolkol si Moisis ka nahallok no waro niglangob no ogpitow. 33 No kagi to Lagboy no Igbuyag ki Moisis to, ‘Awaa nu ka sapatus nu no itahud kanak su duon a kai to longod nu. 34 Nigkita ku ka igkabaybayari to mgo sakup ku no mgo pinanganak ni Israil no dio ogpokougpo to Ehipto. Woy pigdinog ku to ogpakapannanoy sikandan. Sikan ian to niglogsad ad on kuntoon su ogpangabangan ku sikandan. Nò, kai kad su ogsuguon ku sikoykow dio to Ehipto,’ kinagian to Magboboot.” u
35 Kagi ni Istiban to, “Si Moisis ka pigkois to mgo pinanganak ni Israil no nigkagi ran kandin to, ‘Manio to sikoykow ka ogboboot kanami? Bak ko sikoykow ka igbuyag noy bali to konò.’ Di pogkalugoy, ian on si Moisis ka pigsugu to Magboboot dio to Ehipto oyow sikandin on ka ogpangabang kandan no ogkohirapan, woy to oyow sikandin ka ogkohimu on no igbuyag dan. No ka sikan no suguanon to Magboboot no niglibuwas ki Moisis to sikan no malopot no kayu, ian ka impatuman to Magboboot to sikan no innangon din. v 36 Pighinggat ni Moisis ka mgo pinanganak ni Hakob to pogpaawo dan to Ehipto. Woy duon mgo kabolongbolonganan woy ka igmalogot to innangon to Magboboot no nohimu rin dio to Ehipto woy dio to sikan no Dagat no Malalab woy dio to ogkabayaan dan no holholowan to sikan no kohop-atan dan on no tuid to pogbayò. w
37 Si Moisis dod ka nignangon to mgo pinanganak ni Israil to, ‘Duon uromo talagnangon to kagi to Magboboot no igpohondio din no ogkounawa kanak no imbogoy rin dio to kaniu.’ +37 Ogkabasa to Deuteronomio 8:15 woy 18. 38 Nò, si Moisis ka nigduma to mgo otow no nalimudlimud no ogmanhihipanow to sikan no holholowan. No ka sikan no suguanon to Magboboot no niglibuwas woy nig-al-alukuy ki Moisis dio to Bubungan to Sinai, ungod nigdumaruma kandin woy to mgo kaap-apuan ta. Woy nabogayan si Moisis to sikan no kinagian to Magboboot no ogpakauyag woy kono ogkahalin oyow songo igkabogoy rin kanta no mgo Hudiu,” kagi ni Istiban. x
39 “Di ka mgo kaap-apuan ta, nigkois ki Moisis. Waro man mogpaagad-agad kandin. No ka goinawa ran, dio dod to Ehipto su ogkoiniat dan no oglibong. 40 No ka dio pad si Moisis to bubungan to Sinai, pigkagian dan si Aaron to, ‘Himui koy to mgo magboboot noy no ogdumaan noy su waro noy matagoi ko noumonu si Moisis no nighinggat kanami no nigligkat koy to Ehipto.” y
41 “Sikan ian,” kagi ni Istiban, “Pighimu ran ka inayam no noiling to nati to baka. Woy nighimatayan dan ka mgo ayam dan no igtubad dan to sikan no inayam. Narago ka mgo otow to sikan no pighimu ro to kandan do no bolad. 42 Sikan ian to pig-iniugan on to Magboboot sikandan no pinogbalagad on ko nokoy ka ogtubaran dan no layag dio to langit,” Kagi ni Istiban, “No ka sikan, nounawa rod to sikan no ingkasulat to mgo talagnangon to kagi to Magboboot dongan to,
“Sikaniu no pinanganak ni Israil, to sikan no kohop-atan no tuid now no nokohihipanow kow dio to holholawan, og-inso a kaniu ko sikanak ka nigtubaran to sikan no mgo ayam no nanhimatayan now?
43 Kono su ig-alap now ka baloybaloy no pigtaguan now to inotow-otow no nighingaran kow ki Molok no pigsimbaan now ka sikan no pighimu now no ogkoiling to bituon no nighingaran kow ki Ripan. Woy nigkagi ka Magboboot kandan to, ‘Sikan ian to ogdogilon ku sikaniu dio to madmariu to lunsud to Babilonia.’z
44 Kagi ni Istiban, “To dio dod ka mgo kaap-apuan ta to bayaanan dan no holholawan, songo pig-alap dan ka tagooran dan no ampuanan to tu-tuu ian no Magboboot. Ka sikan, in-ayun lagboy to sikan no innangon woy impapitow to Magboboot ki Moisis. a
45 No ka mgo kaap-apuan ta no nakasoip to sikan no nokohun-a no mgo kaap-apuan ta dongan, nig-alap to sikan no ampuanan ka nanhipanow ran no oghondio to ogkougpaan dan no tano. Ka sikan, si Husui on ka igbuyag dan. Pogsolod sikandan dio to sikan no tano, nakababantoy sikandan to pogdogil to Magboboot to mgo otow no tahan no nan-ugpo to sikan no mgo ugpaan dan, woy nanaagow on ka mgo tano dan. No ka sikan no ampuanan dan, dio dod kandan taman to si Dabid on ka nakaliwan no igbuyag dan. b 46 Nohoy-uan sikandin to Magboboot, no ian dod Magboboot ni Hakob. No nigbuyu si Dabid to Magboboot no ko litos no oghimuan sikandin to baloy no ogkougpaan din. c 47 Dokad di to si Solomon on ka nokohimu to sikan baloy. d 48 Di ka Magboboot no ian matikang, kono ogkoologan to baloy no oghimuon do duon to bolad to mgo otow. Ian su duon ingkasulat dongan to talagnangon to kagi to Magboboot. No kagi ka Magboboot to,
49-50 ‘Ka langit, ogkoiling to pinnuuanan ku to ogpandatuan. No ka tano, ogkoiling to diokanan ku su sikanak ka talaghimu to tibò. Sikan ian to kono ogkohimu no oghimu kow to baloy no ogkougpaan ku. Woy waro agad hontow no ogpokohimu kanak to himalayanan ku,’ kinagian to Magboboot.” e
51 “Nò” kagi ni Istiban, “Makogal on ian ka ulu now. Ogpabobongol kow ko nokoy ka igsugu to Magboboot kaniu. Ogkounawa kow to mgo otow no waro mataga to Magboboot su nasi kow og-atu to Gimukud din. Ka batasan to mgo apu now dongan, sikan dod ian ka og-unawaan now kuntoon. f 52 Waro agad sagboka no talagnangon to kagi to Magboboot dongan no waro mabaybayari to mgo kaap-apuan now. Woy pighimatayan dan on ka mgo talagnangon to kagi rin dongan no impanoy innangon to oghondinid on ka Matularong no Suguanon din no si Hisus. Sikan ian ka iam now on impanabod woy nigbunuan now. 53 Sikaniu ka makapurut to Balaod to Magboboot no impahatod to mgo diwata din, di waro now paag-agari.”
Ka Nigdogpakan si Istiban to Batu oyow Ogkamatoy
54 Nò, ka mgo pogbuyagon to mgo Hudiu, pogdinog dan to sikan no intabak ni Istiban, nigkakagot ka ngipon dan su lagboy on ian no nabolu kandin. 55 Di si Istiban atag, niglonaan to Gimukud to Magbobob-ot. No niglonghag si Istiban dio to langit no pigkita rin ka layag to Magboboot woy si Hisus no nigsasindog dio to kawanan to Magboboot. 56 Kagi ni Istiban to, “Pitow kow. Ogkita a to langit no naboklas on. Woy ogkitoon ku ka Otow no oghingaranan ta to Kakoy to mgo Koot-otawan no dio mogsasindog to kawanan to Magboboot.”g 57 Pogdinog to ka mgo otow to kagi ni Istiban, nigngangang on. No pigpanagpong dan ka talinga ran no naninagpoon dio ki Istiban. 58 Piggongonan dan woy pigganoy ran sikandin dio to libuwasan to lunsud to Hirusalim, woy pinandogpak dan on sikandin to dakol no batu oyow ogkamatoy. No ka mgo talagmalogot, impanwakdas ka kinabo dan no dio dan isabuk to paa to songo balubatò. Ka ngaran din, si Saulo. 59 No ka pigdogpakan pad si Istiban to mgo batu, nig-ampù. Kagi rin to, “Hisus no Lagboy no Igbuyag ku, alapa nu ka gimukod ku dio to koykow.” 60 No nigluhud on si Istiban woy nigpaagbot to nigkagi to, “Buyag ku no dio to Langit, kono nud baybayari ka soini no mgo otow tongod to soini no salo dan. Pogkaponga to kagi rin, namatoy on.