6
Ka Papitow no Talagbulig
1 Waro malugoy no ogmoon-ing on ka ogtuu on ki Hisus, duon mgo nigtuu no Ginirigu ka kinagian dan, di ka duma, Hinibriu atag ka kinagian dan. a No ka mgo Girigu, ogsilag on to mgo Hibriu. Ian su allow-allow no ogkatalaran ka mgo boi no nabalu to koonon, dakoldakol ka ingkabogoy dio to mgo balu no Hibriu. Di mamalintok ka ingkatalad dio to mgo balu no Girigu.
2 Sikan ian to nigpalimud on to mgo suguanon ni Hisus ka tibo no mgo otow no nigtuu kandin. No kagi ran to mgo otow to, “Kono no litos no ogkatalantan koy no ogpanalad to koonon, su ogkoongkoran noy ka soini no igpan-anad noy no kinagian to Magboboot. 3 Sikan ian, mgo sulod, pitawa now ka duma now woy alam kow to papitu no otow no natagaan now to maroyow ka batasan dan, woy to namootan on sikandan to Gimukud to Magboboot, woy to duon ian katouan dan to ogpanalad. 4 Di sikanami atag, ian noy ogtumanon ka pog-ampu noy to tangkaan to Magboboot woy ka pog-anad noy to kinagian to Magboboot,” kagi ran.
5 Nò, maroyow to tibo no mgo otow ka kagi to mgo suguanon ni Hisus. No nig-alam dan si Istiban. Sikandin, dakol ka pogsalig din ki Hisus woy lagboy din ogpaboot to Gimukud to Magboboot. Woy naalam dan si Pilipi, si Prokuru, si Nikanur, si Timun, si Parminas woy si Nikulas no taga Antiokia. Si Nikulas, kono no Hudiu di tahan on no nighalin to tinuuan to mgo Hudiu no waro pad nigtuu ki Hisus. 6 Pogkaponga, no impasasindog on sikandan dio to tangkaan to mgo suguanon ni Hisus. No nigtorongan to bolad dan ka nig-ampuan dan on.
7 Sikan ian no nigtangkap on ka kinagian to Magboboot no nigmoon-ing on ian ka mgo otow no nigtuu ki Hisus no dio to Hirusalim. Woy mohon-ing no mgo talagpanubad to mgo Hudiu no songo nigtuu on ki Hisus.
8 No si Istiban, nigkohoy-uan to Magboboot woy nigbogayan to dakol no kabogbogan. Moon-ing ka nohimu rin no mgo kabolongbolonganan woy ka mgo indanan no igmalogot to ignangonnangon din.
9 Di duon duma no mgo otow no nig-atu to kagi ni Istiban. Ka sikan, tahan no nan-amut to anaranan no nighingaranan dan to Anaranan to Konad on no Uripon. Sikandan, mgo taga Sirini, mgo taga Alisandria, woy ka duma, dio nigligkat to mgo probinsia to Silisia woy ka Asia. No nigpaap-apuloy sikandan ki Istiban. b 10 Di waro makaroog to kagi rin su pigbogayan si Istiban to katouanan woy to kabogbogan no nigligkat to Gimukud to Magboboot.
11 No ka sikan no mgo otow no nigpaap-apuloy ki Istiban, nigtongop to ogpamangho to mgo otow no ubaton to og-iling ka ogpamalogot to ogkagion dan to nigdinog dan (kun) si Istiban no pigdoot din ka kaap-apuan dan no si Moisis, woy songo pigdoot din (kun) ka Magboboot. 12 Sikan ian to nanasasow on ka mgo otow lagkos to pogbuyagon to lunsud woy ka mgo talag-anad to Balaod dan. Woy pigdakop si Istiban no pig-alap dan on dio to Dakol no Ampuanan. Pinasasindog dan sikandin dio to tangkaan to mgo pogbuyagon to mgo Hudiu.
13 Pogkaponga no impoumow woy impasasindog dan on ka mgo ubaton no ognangon to malogot to igbayung dan ki Istiban. Kagi ran to mgo pogbuyagon dan to, “Ka soini no otow, og-ungod din ogdoot to soini no Dakol no Ampuanan no nig-indanan to Magboboot. Woy ogdooton din ka Balaod ta no niggalat ni Moisis.” 14 Ian noy ignangon to sikan su nigdinog noy ka ignangonnangon ni Istiban, no nahan din no oggulakon ni Hisus ka soini no ampuanan ta woy ogbalbalawon din on kun ka mgo Balaod no imbogoy ni Moisis kanta,” kagi to sikan no mgo ubaton. 15 Di nakatotongtong ka mgo pogbuyagon su ka langlanguwan ni Istiban, nigmalayag on no ogkoiling to langlanguwan to diwata.