3
Ka Pogkoulii to Napulid
1 Songo allow no marani on ogmanalinga ka allow, nighondio si Pedro woy si Huan dio to Dakol no Ampuanan to mgo Hudiu su tig-ampu dan. 2 No duon otow no napulid ligkat to ingkabato din no pighon-at to mgo duma rin. Allow-allow ran alapa sikandin dio to sikan no ampuanan woy dio dan ipohibat to gumawan no ogkohingaranan to Maroyow no Gumawan su oyow ogpakabuyu sikandin to salapi to mgo otow no ogmanligad no ogsolod to sikan no Dakol no Ampuanan.
3 No ka sikan no napulid, pogpitow rin ki Pedro woy si Huan no ogsolod to ampuanan, nigbuyu kandan. 4 No songo nigpitow ni Pedro daruwa ki Huan ka napulid. Kagi ni Pedro kuwo to napulid to, “Pitow ka kanami.” 5 No songo nigsagman ka napulid kandan su nokoiman to duon buwa igbogoy ran kandin. 6 Di kagi ni Pedro to, “Agad bulawan woy ko uru, waro salapi no igkabogoy ku koykow. Di duon dod soini no igkabogoy ku. Su duon katondanan to ngaran ni Hisu Kristu no taga Nasarit, ognangonan ku sikoykow to sasingdog kad woy hihipanow kad on.” 7 Woy nigtinawo ni Pedro ka kawanan no bolad to napulid no impasasindog din on. Inogo on no nigmanokal on ka mgo paa rin woy ka mgo bukubuku rin. 8 No niglapognat to pogsasindog din woy nokohihipanow on. No nigduma on woy ki Pedro to ogsolod to sikan no Dakol no Ampuanan. Songo kuwo no oghihipanow sikandin woy songo kuwo no ogpakasayowsayow on no ungod din sayaa ka Magboboot. 9 Ka tibo no mgo otow, nakakita on to nokohiphipanow on ka sikan no otow woy to ogsayoon din ka Magboboot. 10 Woy nigtokod to sikan ian ka otow no napulid no ungod do duon ogpakapinpinnuu dio to Gumawan no Maroyow no ogbuyu to salapi dio to sikan no Dakol no Ampuanan dan. Nabolongbolong on lagboy sikandan to noulian on ka sikan no napulid. 11 No sikandin, ungod niggogongon ki Pedro woy ki Huan su ogkaragò. No ka tibo no mgo otow dio to sikan no ampuanan, nammallaguy on to ogdalapak kandan dio to holonganan to mgo otow no oghingaranan dan to Balukon ni Solomon su nabolongbolong lagboy.
12 Pogpitow ni Pedro to nabolongbolong ka mgo otow, kagi rin kuwo kandan to, “Mgo pinanganak ni Israil, manio to ogkabolongbolong kow to noulian on ka soini no otow? Woy manio to ogkatotongtongan koy nikaniu? Bak nigligkat to kanami no kabogbogan woy ko nigligkat to madmaroyow koy to songo otow, bali to wa man. 13 Di nigligkat atag to Magboboot ka impokohipanow din. Sikan dod ka Magboboot to mgo kaap-apuan ta dongan no si Abraham, si Isaak, woy si Hakob. No ka Magboboot, ian ka nigpohipanow on to soini no otow su oyow ogkasayo si Hisus no pigsugu din kai to tano. Di sikaniu atag, nigdakop now on si Hisus no imbogoy now on dio ki Gobirnador Pilatu woy nigbayungan now on. No ko impalibuwas din on porom si Hisus, nig-atangan now on. Waro now palibuwasa. a 14 Si Hisus, ka oghingaranan to Maroyow woy ka Matuwarong su waro batasan din no maroot. Di nigligalan now ro sikandin woy nigbuyu kow ki Pilatu oyow ian din igpalibuwas ka talagbunu no tahan on no napirisu. 15 Nigpohimatayan now on si Hisus no ian talag-uyag to tibo. Di nig-uyag to Magboboot sikandin ligkat to kamatayon din. No sikanami ka ogpakamalot to sikan. 16 Ka kabogbogan woy ka pogtuu noy to ngaran ni Hisus, ian ka immanokal to soini no no otow no ogkitoon now woy tahan now no natagaan no napulid. No noulian on ian to sikandan kai to taliwaro now su nigligkat ki Hisus ka sikan no pogtuu noy.
17 Di mgo sulod,” kagi ni Pedro, “natagaan kud to ian now impohimatoy si Hisus su waro kow mataga ko hondoi nigligkat woy songo waro tokora to mgo igbuyag now. 18 Di ko namatoy on si Hisus, natuman on ka impanangon to Magboboot to bo-bo to tibo no mgo talagnangon din dongan to ogkabaybayaran ka pig-alam din no ian ka Im-imanan to mgo Koot-otawan no ogkohingaranan ki Kristu,” kagi. 19 “Sikan ian mgo sulod, sondita now on ka mgo batasan now no maroot woy halina now ka goinawa now dio to Lagboy no Igbuyag ta no si Hisus oyow ogkaawo on ka mgo salo now woy to oyow ogkabogayan kow to maawang no goinawa now no ogligkat to ogdanian kow nikandin. 20 No uromò, ogpalibongon to Magboboot si Hisus kai to kaniu no ian ka Im-imanan to mgo Koot-otawan no oghingaranan ki Kristu. 21 Di dio pad ogpokougpo si Hisus to langit taman to ogkatuman on ka tibo no impanangon to Magboboot dongan to bo-bo to mgo maroyow no talagnangon to kagi rin. 22 Sikan to ian to kagi ni Muisis to,
‘Duon uromo talagnangon to kagi to Lagboy no Igbuyag ta no Magboboot no ipohondio din to kaniu no ogkounawa kanak. Pamminog kow kandin ko nokoy ka ignangon din kaniu. 23 No ko duon otow no kono ogpamminog to sikan no talagnangon to kagi ku,’ kinagian to Magboboot, ‘Kono ogkalagkos to mgo sakup ku di ogkalogparan to waro katamanan.”’ b Sikan ka ingkasulat ni Moisis.
24-25 No kagi ni Pedro to, “Tibo no mgo talagnangon to kagi to Magboboot ligkat dongan ki Samuil lagkos to mgo sunud no mgo talagnangon to kagi rin, nakanangon to soini no oghimuon to Magboboot kai to kanta kuntoon. Ian su sikanta ka mgo pinanganak to sikan no mgo talagnangon to kagi rin, songo ogpakalagkos kid on to sikan no insabut to Magboboot kandan dongan no nigkagi ka Magboboot ki Abraham dongan to,
“Duon uromo pinanganak nu no ogbogoy to karoyawon dio to tibo no kapunganan to soini no tano.” Ian ka kagi to sulat. c
26 Kagi ni Pedro to, “Sikan ian no impohondini to Magboboot si Hisus no Suguanon din kai to tano. No nighunnaan din sugua kai to kanta no mgo Hudiu oyow ogkohunnaan kid ogkabogayan to karoyawan su tongod to og-ongkoran tad on ka mgo maroot no batasan ta.”