Mgo Hinimuan 4

Ka dio si Pedro woy si Huan to tangkaan to mgo Pogbuyagon

¹ Nò, sikan pad ka innangonnangon woy ni Pedro to mgo otow no noumaan on sikandan to mgo talagpanubad, woy ka kapitan to mgo talagbantoy to sikan no Dakol no Ampuanan to mgo Hudiu, woy ka mgo Sadusiu. ² Naaras-aras sikandan su og-anaran woy ni Pedro ka mgo otow woy su ognangonan dan sikandan to duon pogkouyag uromo to mgo nammatoy su ogligkat to nouyag on si Hisus ligkat to kandin no kamatayon.

³ Sikan ian to pigdakop dan on si Pedro woy ki Huan no impapirisu ran on tagood to ogkapawo on su mahapun on puruta. ⁴ Di to sikan no mgo otow no nakarinog to kinagian to Magboboot, mohon-ing ka nigtuu on ki Hisus. No ko nasool pa ka mgo lukos do, duon buwa lalimma no malan ka nigtuu.

⁵ Pogkapawo on, nanlimudlimud on ka mgo pogbuyagon to mgo Hudiu, woy ka mgo otow no tahuronon, woy ka mgo talag-anad to Balaod dan. ⁶ Woy songo nig-amut si Anas no ian Labow no Talagpanubad to sikan no Dakol no Ampuanan to mgo Hudiu. Duon dod si Kaipas, woy ka sangoy ni Huan, woy si Alihandru, woy duon duma no mgo sulod ni Anas. ⁷ No nigpataliwaro dan on si Pedro woy si Huan, no pig-insoinso dan sikandan ko, “Hondoi now kua ka kabogbogan no ingkoulii now ka soini no napulid? Woy hontow no ngaran ka nakabogoy kaniu to katondanan now?” kagi ran.

⁸ No niglonaan on si Pedro to Gimukud to Magboboot, no nigtabak si Pedro kandan to, ⁹ “Mgo pogbuyagon woy mgo tahuronon to mgo otow, ko og-inso kow kanami to soini no karoyawan no nohimu to soini no napulid, woy ko og-inso kow ko hondoi nigligkat ka ingkoulii to lawa rin, ¹⁰ soini ian ka igtabak noy kaniu oyow ogkatagaan now woy ka tibo no mgo pinanganak ni Israil, to si Hisu Kristu, ian ka ngaran to ingkouyag to soini no otow oyow ogpakasasindog kai to tangkaan now kuntoon to noulian on ian ka lawa rin. Sikan ian ka Hisus no taga Nasarit no impalansang now on dio to krus. Di nig-uyag on to Magboboot sikandin ligkat to kamatayon din. ^11-12 Si Hisus dod ka ingkatuon dongan to mgo talagnangon to kagi to Magboboot ko innangon dan to duon batu no ogkoongkoran on nikaniu, no ian ka mgo talaghimu to baloy. Di sikan dod ian no batu ka pig-alam to Magboboot. No ian on ka nohimu no unturanan to baloy no to sungguk, su si Hisus, ian ka nohimu on no Talagpangabang kanta to mgo salo ta. Ian su agad hondoi ka ogpakarolog, waro dangob no ngaran no litos to ogkasampit to mgo otow ko kono no si Hisus do ian ka ogpakapangabang kanta no makasasalò.”

¹³ Pogdinog to mgo pogbuyagon to mgo Hudiu to tabak ni Pedro daruwa ki Huan, nabolongbolong lagboy sikandan to kono ogkasipod woy si Pedro no ogtabak, woy su nataga to waro mokoungod to pog-iskuila ran, woy su kono no dakol so ngaran dan. Sikan ian to nigtokod to mgo igbuyag to mgo Hudiu to, si Pedro woy si Huan, nakarumaruma nokani ki Hisus. ¹⁴ Di waro makakagi woy ka sikan no mgo igbuyag su nakakita ran on man ka sikan no otow no noulian on no duon do ian mogsasindog to tangkaan dan.

¹⁵ Nò, pigsugu to sikan no mgo igbuyag to oyow ogpalibuwason pad woy si Pedro. No nigmaal-alukuyoy pad to, ¹⁶ “Ogmonuon tad naan ka sikan no daruwa no otow, su tu-tuu ian to duon mabogbog no indanan no nohimu, woy natagaan on ka tibo no mgo otow kai to lunsud to Hirusalim. No kono ki man ogpakawaro-waro ko nohimu su tibo man mataga. ¹⁷ Di kuntoon, oyow kono tad ogparagason ka sikan no ignangonnangon dan, ogbohogon ta woy ogsaparan ta sikandan to, ‘Bunsud kuntoon, kono now on ignangonnangon ka nangnangonon tongod to ngaran ni Hisus.” ¹⁸ Pogkaponga to immaal-alukuyoy ran, impoumow ran on si Pedro daruwa ki Huan no nigsaparan dan sikandan to, “Soini ka ignangon noy kaniu -- kono now on ignangonnangon woy do kow on og-anaron ka agad hontow, tongod to ngaran ni Hisus.” ¹⁹ Di nigtabak si Pedro daruwa ki Huan kandan to, “Mgo amoy, doromdoma now ko nokoy ka maroyow to tangkaan to Magboboot, ko ogpaagad-agad koy ro kaniu di ogkabalagad noy on ka sugu to Magboboot kanami. ²⁰ Ko sikanami, waro duma no ogkohimu noy ko kono no sikan do to ogpakanangonnangon koy ro man to sikan no mgo nigkita noy woy ka nigdinog noy.” No sikan do ka intabak dan to mgo igbuyag to mgo Hudiu.

²¹ Nò, nigpasait nighutuk ka mgo pogbuyagon ka nigsapad man do woy si Pedro, no impalibuwas dan on. Ian su waro makaroromdom ka mgo igbuyag ko ogmonuon dan to oglogpad kandan su ogkahallok to mgo otow su ka tibo no mgo otow, nigsayo to Magboboot su noulian on ka napulid. ²² Ian ingkasayo dan ka Magboboot su ka tuid to sikan no otow no nighimuan to sikan no kabolongbolonganan, nigsubla on kahop-atan on no tuid.

²³ Poglibuwas on woy ni Pedro, nanhondio sikandan to mgo duma ran no imbatbat dan on kandan ka insapad to mgo pogbuyagon woy ka mgo igbuyag to mgo talagpanubad. ²⁴ Pogdinog to mgo duma ran ka imbatbat woy ni Pedro, tibo nig-ampu to Magboboot. No kagi ran to, “Lagboy no Igbuyag noy no ian mabogbog, sikoykow ka nighimu to langit, woy ka tano, woy ka tibo kai to ampow to tano. Songo nighimu ka to dagat woy ka tibo no nakatagu to dagat. ²⁵ Woy ligkat dod to koykow no Gimukud, duon impanangon nu ki Dabid no kaap-apuan noy woy suguanon nu. No kagi rin to,

‘Manio naan ka mgo otow no kono no Hudiu no ogkabolu to Magboboot, woy ka doromdom to mgo Hudiu, no songo waro man pulus? ²⁶ Ian su ka mgo labow to mgo igbuyag to soini no tano, nigpanagana, woy nalimud on ka mgo igbuyag to mgo koot-otawan su og-atuan dan ka Magboboot woy ka Im-imanan to mgo Koot-otawan no pig-alam to Magboboot.’” Kagi to ingkasulat ni Dabid.

²⁷ “Nò,” kagi to mgo otow no nan-ampu to, “Tu-tuu ian, Magboboot, su nokani kaid ian to soini no lunsud to Hirusalim, nalimud on ka mgo igbuyag no si Hirodis, si Punsiu Pilatu, woy ka mgo Hudiu woy ka kono Hudiu. No ian to nalimud sikandan su og-ogotan dan ka waro salo no suguanon nu no si Hisus no ian pig-alam nu no Im-imanan to mgo Koot-otawan. ²⁸ Nig-uuy-uyunan dan ko nokoy ka oghimuon dan ki Hisus. Di ka pighimu ran kandin, ian do ka impanoy nu innangon dongan no igpatuman nu kandin. ²⁹ Kuntoon, Igbuyag noy no dio to Langit, doromdoma nu ka mgo impasait to soini no mgo igbuyag noy. Woy buligi koy ro ka mgo suguanon nu oyow kono koy ogkahallok to ognangonnangon to kinagian nu. ³⁰ Ogbuyu koy to oyow igtaruwoy nu ka bolad nu oyow duon ogkabulung to mgo masakit. Woy buligi koy oyow duon ogkohimu noy no mgo kabolbolonganan woy ka mgo indanan no igmalogot to kinagian nu su ligkat to kabogbogan to ngaran ni Hisus, no ian ka (maroyow no) suguanon nu no waro salò.”

³¹ Pogkaponga ran to nig-ampù, niglunggat to Magboboot ka baloy no piglimuran dan. No natibo on sikandan niglonaan on to Gimukud to Magboboot. Bunsud to sikan, nigpannangnangonan dan ka mgo otow to kinagian to Magboboot to waro igkahallok dan. ³² No ka tibo no mgo otow no nigtuu ki Hisus, nigsagboka ro ka goinawa ran woy nig-un-unawaan dan to pogdoromdom dan. Woy pigsasalupungan dan ka mgo kalaglagan dan su waro otow no ogkagi to, “Kalaglagan ku soini” ko kono tibo dan no kalaglagan. ³³ Sikan ian no nabogayan ka mgo suguanon ni Hisus to dakol no kabogbogan oyow ogpakamalogot sikandan to nouyag on ian si Hisus ligkat to kamatayon din. Woy dakol ian ka ingkohoy-u to Magboboot to tibo no mgo otow no nigtuu ki Hisus. ³⁴ Sikan ian to waro agad sagboka kandan no ogkohirapan, su ka duma no mgo otow no nigtuu, ko duon tano dan woy ko baloy, nigduwad dan on. No ko nokoy ka imbayad, nig-alap dan dio to mgo suguanon ni Hisus, ³⁵ no insabuk dan dio to tangkaan dan su igbogoy ran on. No ka mgo suguanon ni Hisus ka nanalad dio to agad hontow no duon og-awoson dan.

³⁶ Duon otow no nig-unug to sikan no batasan to ogduwad to tano. Ka ngaran din, si Husi no ian angga din si Birnabi su sikan ka inghingaran to mgo suguanon ni Hisus kandin. Ka lituk to angga din, talagbulig to goinawa. Pinanganak ni Libi si Birnabi no dio mootow to pulu Sipri. ³⁷ Duon songo luti no tano ni Birnabi no induwad din on. No ka salapi no imbayad to tano din, nig-alap din woy insabuk din to tangkaan to mgo suguanon ni Hisus.