2
Ka Pogdatong to Gimukud to Magboboot
1 No kouma on ka allow no oghingaran dan no Pintikustis.a No ka mgo nigtuu, nanlimudlimud on dio to songo baloy.
2 Inogoon no natokow ka mgo otow to duon daging no nigligkat to langit no ogkoiling to maagbot no kalamag no ogsolod on dio to baloy no niglimuranan dan, no magulub on ka baloy. 3 No duon pigkita ran to ogkoiling to mgo logdog to hapuy no Nigtangkap on no dio nakalogob nokountud to mgo ulu to tibo no mgo otow no nalimud. 4 No ka Gimukud to Magboboot, nigsolod on to goinawa to tibo no mgo otow no nalimud. No nanakagi on sikandan to mgo nigloinloin no mgo kinagian no imbogoy to Gimukud to Magboboot kandan.
5 No ka sikan, duon mgo Hudiu no ogtahud to Magboboot no nan-ugpo dio to Hirusalim. Sikandan, nigligkat to mohon-ing no mgo mariu no ugpaan. 6 Pogdinog dan to sikan no daging, nandalapak woy nalimud on. Di natalap ka goinawa ran, su tag sagboka ka kandan, nakarinog to mgo otow no ogkakagi to kandin no kinagian. 7 Nabolongbolong lagboy sikandan su nahan dan ko nokoy buwa. Moin-insooy sikandan to, “Inat to mgo taga Galilia ro ka soini tibo no mgo otow no ogkakagi. 8 Di manio to ogdinogon ta sikandan no ian on ogkaalap dan ka mgo kinagian ta no ogloinloin? 9 Sikanta kai, mgo taga Partia mgo taga Midia, taga Ilam, taga Misopotamia, taga Hudia, taga Kapadusia, taga Pontu, woy taga Asia, 10 Taga Pirigia, taga Pampilia, taga Ehipto woy duon dod duma ta no dio mogligkat to mgo probinsia to Libia no marani to Sirini. Woy duon mgo agpot no taga Ruma no nan-amut to tinuuan to mgo Hudiu, woy ka mgo Hudiu no tu-tuu no dio mootow to lunsud to Ruma. 11 No songo duon mgo taga Krita woy mgo taga Arabia. Moon-ing ka pigligkatan ta no nigloinloin ka mgo ugpaan ta, di ogdinogon ta sikandan no ognangonnangon kanta to mgo kabolongbolonganan no nohimu to Magboboot. No ian kinagian dan to ognangon, ka mgo kinagian ta no ogloinloin.
12 Ka tibo no mgo otow, nabolongbolong on ian woy natalap ka goinawa ran. Moin-insooy ran to, “Nokoy buwa ka kalitukan to soini? 13 Di duon duma no mgo otow no nigsusumpalit, no kagi ran to, “A. Nalasing do duon nò.” 14 Di nigsasingdog on si Pedro longod to sikan no sampulu woy sagboka no duma rin no suguanon ni Hisus. No nigpaagbotan din on to nignangon to mgo otow to, “Sikaniu no mgo duma ku no mgo Hudiu woy tibo kaniu no mgo taga Hirusalim, pamminog kow to soini no ignangon ku kaniu oyow ogpakasabut kow. 15 Nahan now no nalasing koy di waro koy man malasing, su dini to kanta, kono ki pad man ogtinlasing to nokoy naan a las nuibi pad to masolom. 16 Dokad di, soini no ogkitoon now kuntoon, ian ka ingkasulat dongan ni Hoil no talagnangon to kagi to Magboboot. No nigkagi ki Hoil to:
17 “Kagi to Magboboot to, ‘Uromo to tipouri no otow, dio to agad hondoi kai to ampow to tano, ogpambogayan ku to Gimukud ku. No ka mgo anak now, agad lukos woy boi, ogpakanangonnangon to kinagian ku. No ka mgo lukos no kono pad amana no buyag duon igpapitow kandan no mgo ogpaatawan. No ka mgo lukos no buyagbuyag on, duon igpapitow kandan no mgo tagoinop. 18 Tu-tuu ian soini no ignangon ku kaniu. Ko ogpokouma on ka sikan no allow, ka mgo sakup ku, agad lukos woy boi ogpambogayan ku to Gimukud ku. No ogpakanangonnangon sikandan to kinagian ku. 19 No dio to Langit, duon igpapitow ku no mgo kabolongbolonganan. Woy kai to tano, duon igpapitow ku no langosa, woy hapuy woy ka mgo obol no dakol. 20 Woy ogpokouma ka allow to pogboboot ku to mgo otow, ogmarusilom on ka allow, no ka bulan, ogkoiling on to langosa. Sikan ka allow no igkabantug lagboy to mgo otow. 21 Di, agad hontow no ogpakasampit to ngaran to Lagboy no Igbuyag, ogkapangabangan sikandin.’” Ian ka kinagian to Magboboot no ingkasulat ni Hoil.b
22 No kagi ni Pedro to mgo otow to, “Sikaniu no mgo pinanganak ni Israil, pamminog kow to soini no ignangon ku. Nigsugu to Magboboot si Hisus no taga Nasarit kai to kanta. Woy impamalogot din kanta to si Hisus, ian ka pig-alam din. Ian su duon ka mgo kabolongbolonganan woy ka mgo indanan no igmalogot to kinagian din woy su duon ka mgo mabogbog no impohimu to Magboboot kandin kai to tangkaan ta. Nataga kow to soini no ignangon ku. 23 No soini dod si Hisus no imparakop no imbobogoy on to kaniu. Di ian su tahan no nataga ka Magboboot to ogmonuon now si Hisus. Woy pigtuud dod ian to Magboboot to oyow ogkatuman on ka sikan. No impohimatayan now on si Hisus to mgo otow no waro mogsimba to Magboboot woy inlansang dan on sikandin dio to krus. 24 Di pig-uyag on to Magboboot si Hisus ligkat to kamatayon din su kono man ogkohimu ko kono ogkouyag sikandin. 25 Ian su duon ingkasulat dongan ni Dabid tongod to kagi ni Hisus to:
‘Ungod ad ogtangko to Magboboot. No duon sikandin kai to kawanan ku no ogbulig kanak oyow kono ad ogkasasow.
26 Sikan ian to ogkarago a lagboy no ogpokouwang ad on to igkarago ku. Dakol ka im-imanan ku su, agad ogkamatoy a
27 di kono a nu og-ongkoran dio to Hadis no ian ka ugpaan to mgo nammatoy, woy su kono ka ogbogoy ko ogkamolu ka lawa ku no ian ka Matularong no Suguanon nu.
28 Intuon nu kanak ka dalan no ogpakabogoy to kouyagan no waro katamanan. Narago-dago ka goinawa ku su duon ka kai to kanak.’” c
29-31 No kagi ni Pedro to, “Nò mgo sulod, ogpakanangon a kaniu to waro igduwaduwa ku to si Dabid, namatoy on dongan no insabal on. No taman kuntoon, duon dod man ka sabalanan din kai to kanta. Di ian to innangon ni Dabid ka sikan, su dongan, talagnangon sikandin to kinagian to Magboboot. No nataga si David woy impanoy rin innangon ka pogkouyag ni Kristu uromo ligkat to kamatayon din. Ian su nataga rin ka insabut woy nigpangulibot ka Magboboot kandin to duon ogpokouma uromo no kapunganan ni din no ogkohimu on no lagboy no igbuyag woy ogkabogayan on to pandatuan din. Kagi rin to,
“Waro ongkori dio to Hadis no ian ugpaan to mgo nammatoy, woy songo waro mamolu ka lawa rin.” +30 Ogkabasa to 2 Samuel 7:12 woy Salmo 132:11.
32 No kagi ni Pedro, to “Sikan dod ka Hisus no nig-uyag on to Magboboot ligkat to kamatayon din. No tibo koy ogpakamalogot to sikan. 33 No kuntoon, diad on si Hisus to Langit to kawanan to Magboboot no ian Amoy rin no nabogayan si Hisus to dakol no ngaran din oyow sikandin ka ogbogoy kanta to Gimukud to Magboboot. No ian ka insabut din kanta dongan. No ka soini no ogdinogon now woy ogkitoon now kuntoon ro ogligkat ian to Gimukud din. 34 Kono no ka kandin lagboy no ka lawa ka ingkatuon ni Dabid to sikan no ingkasulat din su waro nabatun si Dabid dio to Langit. Di nigsulat si Dabid to,
Kagi to Magboboot kuwo to Igbuyag ku to, “Kai ka pa to kawanan ku ogpinpinnuu 35 ogtagood to ogdoogon ku ka mgo usig nu su oyow ogpakaluhud to tangkaan nu.”’ d
36 No kagi ni Pedro to ‘Nò sikaniu tibo no mgo pinanganak ni Israil, indani now to malogot ian ka ignangon ku kaniu. Ian su si Hisus no inlansang now dio to krus oyow ogkamatoy, ian on ka pighimu to Magboboot no Lagboy no Igbuyag ta woy sikandin dod ka. Im-imanan to mgo Koot-otawan no oghingaranan ta ki Kristu.” e
37 No pogdinog to mgo otow to sikan no innangon ni Pedro, lagboy nasugat ka goinawa ran. No kagi ran to, “Mgo sulod, ogmomonu koy on naan?”
38 Nigtabak si Pedro kandan to, “Og-awoson ka tag sagboka kaniu to ogsonditan woy ogkoongkoran now ka mgo batasan now no maroot woy ogpabautismuan kow on to woig on to ngaran ni ian ki Hisu Kristu. No og-awoon din on ka mgo salo now woy ogbogayan kow on to Gimukud to Magboboot. 39 Ian su ka Gimukud to Magboboot ka innangon to Magboboot no igbogoy rin kanta lagkos to innangon din to songo igbogoy rin dio to mgo pinanganak ta. Woy kono no sikan do ka ogkabogayan to Gimukud to Magboboot di agad ka mgo otow no mariu kanta, agad hontow no otawa no oghimuon to Lagboy no Igbuyag ta no ka Magboboot no sakup din, songo ogkabogayan to Gimukud din.”
40 No nig-ungod dod nigkagi si Pedro to igmalogot to ignangonnangon din woy nigtalosonon din ka mgo otow to, “Pangabangi now ka mgo lawa now su oyow kono kow ogpakalagkos to logpad no ogpokouma to soini kuntoon no mgo otow no kono ogpaagad-agad to Magboboot.”
41 Sikan ian to, ka mgo otow no nigtuu to innangonnangon ni Pedro, nigpabautismuan on to woig. No to sikan do no allow, duon buwa tatolu no malan no mgo otow ka nigtuu kandin no nokogdumaruma to mgo otow no tahan on no nigtuu. 42 Ungod nigpamminog sikandan to mgo ig-anad to mgo suguanon ni Hisus. Malasi nigparumdumooy sikandan woy niglimudlimud oyow ogkoon to harina no igparoromdom to pogkamatoy ni Hisus Woy malasi nan-ampu sikandan.
43 Moon-ing ka nohimu to mgo suguanon ni Hisus no mgo kabolongbolonganan woy ka igmalogot to sikan no nangnangonon tongod ki Hisus. No ka tibo no mgo otow, nakatahud to Magboboot. 44 No ka tibo no mgo otow no nigtuu ki Hisus, nigparumdumooy on sikandan woy nigsasalupungan dan ka kalaglagan dan. 45 Moon-ing ka nigduwad dan no kalaglagan dan woy ko tano dan. No nigtalaran dan ka mgo duma ran no duon og-awoson dan. 46 Allow-allow nigparumdumooy sikandan no nanhondio to Dakol no Ampuanan to mgo Hudiu. Woy niglimudlimud dio to mgo baloy ran oyow ogkokoon sikandan to harina no igparoromdom to pogkamatoy ni Hisus. Woy songo nigkokoon to koonon. Ko dakol ka pogpasalamat to goinawa ran woy ka ingkarago dan. 47 No nigsayo dan on ka Magboboot. No ka duma no mgo otow, nabantugan to sikan no mgo otow no nigtuu ki Hisus. Allow-allow nigtimtimulan on to Lagboy no Igbuyag ka mgo otow no ogtuu no ogkapangabangan to mgo salo dan.