Ka Sulat ni Lukas ki Tiopilu tongod to
Mgo Hinimuan
to mgo Suguanon ni Hisu Kristu
1
1-2 Tiopilu, soini ka igkaruwa no sulat ku koykow. Ka an-anayan no sulat ku, dio ku bunsura ka nangnangonon to mgo hinimuan woy ka mgo pig-anad ni Hisu Kristu. No dio ku matamani to sikan no allow no nabatun on si Hisus dio to Langit. Di ko waro pad nabatun, duon pad insugu din to sikan no naalam din no mgo suguanon. No ka mgo sugu din kandan, nigligkat to Gimukud to Magboboot.
3 Pogkaponga to pogkamatoy ni Hisus woy to pogkouyag din, duon kohop-atan no allow no malasi niglibuwas to mgo suguanon din. Woy mohon-ing ka hinimuan din no igmalogot to nouyag on ian ka lawa rin ligkat to kamatayon din. Woy malasi innangonnangon ni Hisus kandan ka ogtumanon to Magboboot to pandatuan din.
4 Nò, to sagboka no poglimud ni Hisus woy ka mgo suguanon din, pigbangkuk din sikandan to, “Kono kow pad og-awo to soini no lunsud to Hirusalim. Di tagad kow pa to ogkabogayan kow on to Gimukud to Magboboot su sikan ian ka innangon ku kaniu nokani no impasabut to Amoy ku no dio to Langit kaniu.a 5 Nokani, nigbautismuan kow ni Huan dio to woig. Di waro malugoy no ogbogayan kow on to Gimukud to Magboboot.”
Ka Pogkayow ni Hisus dio to Langit
6 No to poglimud man do si Hisus woy ka mgo suguanon din, nig-insoinso dan kandin to, “Og-inso koy ko kuntoon nu ro ogpoulia dini to kanta ka katondanan ta no naagow?” b 7 Kagi ni Hisus no intabak to mgo suguanon din to, “Ka Magboboot no ian Amoy ku dio to Langit, kono din oghitagoon sikaniu ko kon-u rin on ogtumanon woy ko songo monu kalugoy ka pogtuman din to mgo hinimuan din, su katondanan din do ka oghimuon din. 8 Dokad di ko ogdatong kow on to Gimukud to Magboboot, ogbogayan kow on to kabogbogan, no oghimuon kow on no mgo talagmalogot to igpaanad ku kai to soini no lunsud to Hirusalim, woy dio to tibo to sikan no Probinsia to Hudia woy ka dio to Samaria, woy dio to mgo katamanan to soini kalibutan.” 9 Pogkaponga ni Hisus to sikan no innangon din kandan, nabatun on sikandin dio to Langit. Nakabantoy ka mgo suguanon din to pogkayow rin taman to naatangan on to salagapun.
10 Nò, poglonghag pad to mgo suguanon ni Hisus to langit su ogpitow ki Hisus no nabatun, natokow sikandan to duon on daruwa no otow no nakapanabinit to manggad no mapoti no duon do ogmanasindog to longod dan. 11 No kagi to sikan no daruwa kuwo kandan to, “Sikaniu no mgo taga Galilia, manio to ungod now oglonghaga ka langit to oglibong dod man si Hisus dini to tano? Ogkounawa ro ka pogkabayow rin no pigkita now ka lawa rin. No ko oglibong si Hisus kai to tano, songo sikan dod ka lawa rin no ogkakitaan tanow.”
12 Pogkaponga, namang-awo on ka mgo suguanon ni Hisus to sikan bubungan no oghingaranan to Olibu no marani to lunsud to Hirusalim. Tigbal do no songo pamalatow ro ka igkariù. 13 No pog-uli dan dio to lunsud to Hirusalim, namanoik on to nig-ugpaan dan no baloy woy nigsolod on to songo sinabong duon to ampow to sikan no baloy. Ka nigsolod no mgo otow si Pedro, si Huan, si Santiago, si Andris, si Pilipi, si Tomas, si Bartolomi, si Matiu, woy ka sangoy ni Santiago no anak ni Alpiu. Duon pad si Simon no oghingaranan dan ki Siloti. Woy duon dod si Hudas no anak to dangob no Santiago. 14 Maam-amutoy ro ka tibò, no sagboka ro ka goinawa ran. to og-ungod ogman-ampu to tangkaan to Magboboot. Duon mgo boi no nan-amut kandan to pog-ampu woy nigduma ka inoy ni Hisus woy ka mgo hari rin no lukos.
15 Waro do malugoy no nalimud man do nighutuk ka mgo otow no nigtuu ki Hisus. Duon buwa songo gatus woy kaluwaan no mgo otow no nan-amut. No nigsasindog on si Pedro. 16 Kagi rin to, “Mgo sulod, kono ogkohimu ko kono ogkatuman ka Tahan no Kasulatan no kinagian to Magboboot. Ian su si Dabid no talagnangon dongan to kinagian to Magboboot, nigbobootan on to Gimukud to Magboboot no impanoy rin pignangon si Hudas, no ian ka nigbulig to mgo otow no nigdakop ki Hisus. 17 Di duma ta rod nokani si Hudas no songo nig-amut to katondanan ta no mgo suguanon ni Hisus. Ian su agad nokoy no imbogoy ni Hisus kanta no mgo hinumuan, songo ingkasalig din dod ki Hudas,” kagi ni Pedro.
18 Pogkalugoy, duon songo luti no tano no nabolion to salapi no imbogoy to mgo otow ki Hudas, ka imbayad to maroot no nohimu rin ka impanabod din si Hisus. Di nighondio si Hudas to matikang no dalama no nig-ogot to lawa rin. Nabalbalintuad sikandin no naladlaran on ka gotok din no nanlopow on ka bituka rin no namatoy on. 19 Kagi tibo no mgo taga Hirusalim, nakarinog on to noumonu si Hudas. Sikan ian no ka tano no nabolion to salapi din, nighingaranan on to Akildama. Ian su to kinagian dan ka lituk to sikan no ngaran, tano no oglangosa su tano no naboli to salapi no imbayad to langosa to otow. 20 Ian su duon ingkasulat ni Dabid dongan tongod ki Hudas to:
‘Balagad ko ogkoongkoran on ka ugpaan din oyow waro otow no ogpokougpo duon,’ Woy kagi rin to, ‘Balagad ko songo otow on ka ogpurut to katondanan din.’” c
Pogkaponga, kagi ni si Pedro to, 21-22 “Sikan ian to og-awoson to duon sagboka no otow no og-alamon ta no ogpakatimul kanta no suguanon ni Hisus su oyow sikandin on ka ogbulig kanta to ogmalogot to pogkouyag ni Hisus ligkat to kamatayon din. No ian ta do og-alamon ka otow no songo nigdumaruma kanta no nigluyudluyud to Lagboy no Igbuyag ta no si Hisus ligkat to pogbautismu ni Huan taman to allow no pogkayow on ni Hisus.” Sikan do ka kagi ni Pedro kuwo to mgo duma rin.
23 Sikan ian, ka mgo otow no nan-amut, nig-alam pad to daruwa no otow. Ka ngaran to sagboka, si Husi Hustu no ian angga din, si Barsaba. Nò ka ngaran dut dangob si Matias. 24 No nig-ampu pad ka mgo otow. Kagi ran to, “Buyag noy no dio to Langit, natagaan nu ka goinawa to tibo no otow kai to tano. Kuntoon, ipapitow nu kanami ko hondoi to soini no daruwa ka pig-alam nu. 25 No igliwan to katondanan woy mgo hinimuan ni Hudas. Ian su suguanon din dod porom ni Hisu Kristu sikandin di pig-ongkoran din ka katondanan din no nakaparagas no oghondio to ugpaan no ogpakalogpad kandin.” 26 No pogkaponga ran on to pog-ampù, ingpangolisan dan ko hondoi ka ogkaalam dan, no duon intagu dan to taguanan su ka ogkakulisan no ngaran, ian ka ogkaalam. Si Matias no ngaran ka napurut no sikan ian ka naalam no suguanon no igliwan ki Hudas. Nò nakaamut on si Matias to tahan no sampulu woy sagboka no suguanon ni Hisus.