Lùmjíng Myìt Mai
11
Lùmjíng myìt nghu é gi, ngá-nhúng myìt myòqbyu tô é lé hkyak wó râ nghu é eq ngá-nhúng a myàng shî é lé jòq lhê nghû hkyak sê é hkyô nghut lhê. 2 A-nham lhê bang gi, lùmjíng myìt haû mai Garaî èq owaq é hui kô é nghut lhê.3 Lùmjíng myìt mai, ngá-nhúng gi, nyì mî-nyî, jòq mîjòq lhúnglháng lé Garai Gasâng é hkunmó èq hpan tô é hkyô sê gyô é nghut lhê. Haû mù, myòq èq wó myang é pé gi, byu-myang é pé mai saî htoq tô é a nghut.
4 Lùmjíng myìt mai, Abelaq gi, Ka-in kut é htoq je ge é hkungga, Garai Gasang lé nhông byî é nghut ri. Lùmjíng myìt mai, yhang gi, yhâng é hkungga eq séng luî Garai Gasang hkya-ôn é hkûn, díngmán sû rayùq dông owaq é hui bê nghut ri. Haû mù, lùmjíng myìt mai, yhang gi, shi byùq bê nghut kôlhang, dang rû nyo nyi ashî nghut lhê.
5 Lùmjíng myìt mai, Enuk gi, shi é a hui zo shoq, chyungxe shî mai mauhkûng shut shuî yu é hui bê. Yhang lé, Garai Gasang shuî ló byùq bê nghut é yánmai, yhang lé a wó myâng lo nghut ri. Hkâsu mù gâ le, yhang gi, shuî yu é a hui shî é hí má, Garai Gasang lé nguì nhâng sû rayùq dông owaq é hui sû nghut ri. 6 Lùmjíng myìt a bo é nghut le gi, Garai Gasang lé a wó nguî nhang é nghut lhê. Haî mù gâ le, Yhâng chyáng shi-kùt luî lé jé é sû gi, Yhang nyi é hkyô lé le, lhumzui myìt mai Yhang lé hô bang lé, Yhâng èq shigyaú é lé le, lùmjíng râ dùt é nghut lhê.
7 Lùmjíng myìt mai, No-aq gi, a myang wú shî é hkyô pé eq séng luî sidìq byi huî é hkûn, yhâng é yhûmbyù wuì lé hkyî râ matú, gyùq hkúnggâ é dông mai wuìsanghpo saí bê nghut ri. Yhâng é lùmjíng myìt mai, mingkan lé mara byî é nghut mù, lùmjíng myìt mai lo é díngmán hkyo é jeju lé hkam yù sû dùt bê nghut ri.
8 Lùmjíng myìt mai, Abraham gi, yhâng é muìzè dông, htâng má yhang hàp yù râ nghut é, Garai Gasang byî é jowò shut e ló râ matú ji yu é huî é hkûn, jì-no gyo mù, yhang hká shut e ló é a sé kôlhang, ê bê nghut ri. 9 Lùmjíng myìt mai, yhang gi, gó-ming má nyi é byù bíng rayùq su, danghtum htûm tô é mau má nyì bê nghut ri. Yhang gi, zúm pé má lúng é nghut mù, rajung zâ é, danghtum htûm tô é muìzè lé hkam yu é Isak eq Yakup le, zúm pé má lúng bekô nghut ri. 10 Hkâsu mù gâ le, Abraham gi, Garai Gasâng èq azòng hên mù saî tô é, gîng é a-pûn awang pé eq mu é wà mó lé myìt myòqbyu nyi é nghut ri.
11 Lùmjíng myìt mai, Abraham gi, yhâng é chyungxe i-pyàt laî ló byùq é eq, Sara le baùdung nghut to kôlhang, haû danghtum htûm tô é Sû, lhumzui sû nghut lhê ga myìt sôn yu é yánmai, îwa rayùq wó dùt é hui bê nghut ri. 12 Haû mù luî, yhang gi, shî gùng dông nghut kôle, yhang rayùq mai lo é awùt ashín pé gi, mauhkûng mâ é kyî pé eq wuimau yàm mâ é a ung nghap é se-muî myhó myô lò bê nghut ri.
13 Byù haú bang bànshoq gi, yhángmòq shi é hkûn jé shoq lùmjíng myìt mai chyungxe dui nyì kô é nghut lhê. Yhángmòq gi, danghtum htûm tô é pé lé a hàp yù kó nghut ri; nghut kôlhang, haú pé lé myàng za myàng kômù, we mai te yu akô. Yhángmòq gi, myìdàm htoq má gó-mîng byu pé eq byù bíng pé nghut é lé yín yû bekô nghut ri. 14 Haû su yín yu é byu pé gi, yhángmòq yhûmsing é ming lé ho nyi é bang nghut é lé tûn shit é nghut akô. 15 Yhángmòq htoq lo é ming lé, yhángmòq myìt tuî nyì kô é ru nghut le gi, dum taû ló râ ahkáng wó kôrâ nghut lhê. 16 Ahkuî kúm, yhángmòq gi, je ge é ming nghut é, mauhkûng mîngdán lé myìt tuî nyi akô nghut ri. Haû mù luî, Garai Gasang gi, yhángmòq é Garai Gasang nghu é hui râ lé a hoq é nghut lhê. Hkâsu mù gâ le, Yhang gi, yhángmòq é matú wà mó ralhum lajâng to byi bê yánmai nghut ri.
17 Lùmjíng myìt mai, Abraham gi, Garai Gasâng èq yhang lé chyam é hkûn, Isak lé hkungga ralhum dông nhông byi bê nghut ri. Haû gi, danghtum htûm tô é pé lé hàp yu to bê sû gi, yhâng é yùqzo zote lé nhông byi râ haq htung é nghut lhê. 18 Garai Gasang gi, “Isak dông mai lo é lé, náng é awùt ashín nghû són byi râ nghut lhê.”a ga yhang lé danghtum htûm to bê nghut kôle, yhang haû su kut é nghut ri. 19 Abraham gi, shi é mai Garai Gasang wó lhoqdui toq lhê ga myìt yu ri. Taí sháng ga jáng, Isak lé, shi byùq bê mai, yhang dum wó hàp yu é nghut ri.
20 Lùmjíng myìt mai, Isak gi, Yakup eq Eso nhik é htângnùng lhê é matú, shimân byi bê nghut ri.
21 Lùmjíng myìt mai, Yakup gi, yhang shi ló râ u má, Yosep é yhang zô nhik lé shimân byi mù, yhâng é dumbáng‑u má ngè luî, noqkuq bê nghut ri.
22 Lùmjíng myìt mai, Yosep gi, yhâng é chyungxe htûm ló râ u lé, Isira-elaq byu pé Egutuq ming mai htoq lò râ eq séng luî taí mù, yhâng é showui pé eq séng luî hkâsu kut râ hkyô lé pying to bê nghut ri.
23 Lùmjíng myìt mai, Mosheq é yhâng nu eq yhâng wâ nhik gi, yhang hku lé é htâng má, yhang lé lha-mó sum hkyap haq to bekô nghut ri. Haî mù gâ le, yhángnhik gi, zoshâng haû yúng é myàng kômù, hkóhkam é mungdang lé a gyùq kó nghut ri.b
24 Lùmjíng myìt mai, Mosheq gi, yhang kô lo é hkûn, Hpara-uq é byìzô é yhang zo ga râ lé he-ngìk pyâm ri. 25 Yhang gi, yubàk marâ é ngón hkyô má rayòq zo ngón kún râ malaî Garai Gasâng é byu pé eq rahá hpuzô é hui râ lé shèq hkyin yù bê nghut ri. 26 Yhang gi, haû Hkrisidùq é matú rhoî huî é lé, Egutuq ming mâ é sùtzè htoq má je riyhang hpaudap lhê ga myìt sôn yu ri. Haî mù gâ le, yhang gi, yhâng é shigyaú chyûnghuq lé myìt myòqbyu nyì sû nghut ri. 27 Lùmjíng myìt mai, yhang gi, hkóhkâm hpó nhikjum yô é lé a gyùq é za, Egutuq ming mai htoq ló byùq bê nghut ri. Yhang gi, myòq èq a wó myang é sû Garai lé wó myang é sû dông, hkam jân é nghut ri. 28 Lùmjíng myìt mai, yhang gi, haû zo-mún lé sat é maumang lagyô èq Isira-elaq byu pê é zo-mún lé a wó záng sháng gàq ga, Lhoqlhai Poî eq sui hpyûn é hkyô le kut hî bê nghut ri.
29 Lùmjíng myìt mai, haû shiwa byu pé gi, Nhông Nè lé kyuq huî é myigùng htoq mai su laî byìt bekô nghut ri; nghut kôlhang, Egutuq byu pé le, haú dông laî shi-kùt wú kô é hkûn, yhángmòq gi, myùp shi byùq bekô nghut ri.
30 Lùmjíng myìt mai, shiwa byu pé, Yerihko wà mó mâ é wàhkûm lé nyhit nyí sô lhing é htâng má, wàhkûm haû lèq gyòp byùq bê nghut ri.
31 Lùmjíng myìt mai, shiwa myhí Rahap gi, haû Isira-elaq jó wú bang lé nguì ngón é eq lhom hkûlum yu é yánmai, jì-no a gyo bang eq rahá sat pyâm é a huî é nghut lhê.
32 Hau htoq lai luî, ngò haî taî jàt ra shirâ lhú? Gidon, Barak, Samson, Yephta, Dawiq, Samu-elaq pé eq myìqhtoî pê é hkyô lé taí râ ahkyíng ngò a wó. 33 Haú bang gi, lùmjíng myìt mai mîngdán pé lé wó zân ung yù bekô, tengmán hkyô lé chung jaì bekô, danghtum htûm tô é lé wó hàp yù bekô, hkanghkyi pê é nhut lé wó myhî pyám bekô, 34 myiduq myishâm lé wó sat pyám bekô, shámsó mai le wó hpang lùt bekô nghut ri. Yhángmòq é wum nyhóm hkyô gi, wum taû bo é dùt byùq bekô nghut ri. Yhángmòq gi, majan má a-tsam mó bò bang dùt mù, maigan gye pé lé wó ung pyám kô é nghut lhê. 35 Myiwe wuì gi, yhángmòq eq sêng é shi byùq bê bang chyungxe dum lhoqtui é hui bê hkyô lé, wó yû bekô nghut ri. Góbang gi, je ge é dui toq hkyô wó yû kó sháng gàq ga, lhoqlhut é hui râ lé he-ngìk pyám kômù, zing-rî é gyai yhang hui zo bekô nghut ri. 36 Ra-am gi, wuìzuì kut pyám byî é eq nhuq bàt é hui bekô, góbang gi, shâmtoq kyum hut huî é eq htóng lhûng é hui bekô nghut ri. 37 Yhángmòq gi, lùqgòk èq dú sat é, í túm dùt shoq yìk hpyit é, sham èq sat pyâm é hui bekô nghut ri. Yhángmòq gi, saukuq eq bainám-kuq wùt mù, htòt lhing wún luî, myung kyuq é, zing-rî é eq rhoi pyâm é hui bekô nghut ri. 38 Yhángmòq lhumzuî nyì kô é yánmai, mingkan gi, yhángmòq eq a gíngdán nghut ri. Yhángmòq gi, yòso pé má, bùm pé má, lùqhkyûng pé eq myìdong pé má nyi lhing wún bekô nghut ri.
39 Haú bang bànshoq gi, yhángmòq é lùmjíng myìt é yánmai, owaq é hui bê nghut kôle, yhángmòq ó yùq le, danghtum htûm tô é lé a myang hkam yù kó nghut ri. 40 Haî mù gâ le, ngá-nhúng eq rahá za nghut jáng shèq, yhángmòq lhoq gúmjùp é wó hui kó sháng gàq ga, Garai Gasang gi, ngá-nhûng é matú je ge é hkyô lajâng to byi bê nghut ri.