Myìdàm Sàksé Zúm Má Noqkuq É Hkyô
9
Sânghi lhê é dangshikaq gi,
noqkuq râ htûng târâ pé eq noqkuq râ myìdàm sân-yúng dik wàp bo é nghut ri.
2 Saî tô é sàksé zúm é sânghi wàp má gi,
haû myibung tsûng jang,
mùkgyàp eq haû ting tô é mùk jòq mù,
haú wàp lé gi,
Chyoiyúng Jowò ga myhîng ri.
3 Í dang nghû râ wàp pán-gyâng é ahkaû mâ é wàp lé gi,
Chyoiyúng Htâng é Jowò gâ é nghut lhê.
4 Wàp haû má gi,
namngón jung nyhé hîng hkungga gyàp eq hîng shup dangshikaq sidèk jòq ri.
Dangshikaq sidèk haú má gi,
mannaq mùk bo é hîng yam,
ahaq nyún tô é,
Arun é dumbáng eq,
dangshikaq lùqlong pé bo tô ri.
5 Dangshikaq sidèk é ahtoq má gi,
shîhtaí gùnglik hkungga byi jang htoq má wùp tô é,
Hpungwup shingkang bò Sû é hkerubima pé jòq tô ri.
Nghut kôlhang,
ngá-mòq gi,
ahkuî haú pé lé jíhkúm nùqgùq a wó taî san kyô é nghut lhê.
6 Haû dông jung hkangmó ban lajâng tô é hkûn,
hkyangjông pé gi,
ayang sânghî wàp má wàng mù,
yhángmòq é dójaú múzó lé wùn wàq bekô nghut ri.
7 Nghut kôlhang,
ahkaû wàp má gi,
hkyangjong mó za,
yhânggùng é matú le,
a sê é za byu pé kut shut é marâ é matú le,
nhông byi râ sui chûng mù,
razàn má radàm za wang é nghut lhê.
8 Haû Chyoiyúng Sô gi,
haú pé dông mai,
sânghî é sàksé zúm ru jòq nyì nyì,
haû Chyoiyúng Htâng é Jowò wàng hkyô a hpông shit shî é lé,
tûn shit nyi ri.
9 Haû gi,
i-pyàt shi é matú tûn shit é azòng nghut mù,
nhông byî é chyûnghuq pé eq shigu hkungga pé gi,
dójaú su é i‑myìt lé a wó lhoq sân-yúng byî é hkyô lé taí nau é nghut lhê.
10 Haú pé gi,
zôjung,
shuq jung eq chî san chî séng hking ahú hú eq za sêng é nghut mù,
htûngli asik,
lé jòq é ahkyíng jé shoq za tô tô é gùngsho eq sêng é târâ pé nghut ri.
Hkrisidùq É Sui
11 Hkrisidùq gi,
shî má jòq to gù nghut é gè hkyô pê é hkyangjong mó dông lé jé é hkûn,
hpan tô é má a lòm nghû nau é,
byu èq saî é a nghut é,
je kô é eq je gúmjùp é sàksé zúm mai wang lai bê nghut lhê.
12 Yhang gi,
Chyoiyúng Htâng é Jowò má wang é hkûn,
bainám eq nojûng zô pê é sui lé chûng mù wang é a nghut é za,
Yhâng é suî èq yhang bànshoq é matú radàm za ahtum abyùq é hkyi yù hkyô wó yû bê nghut ri.
13 Htûngli dông agòt a‑û dùt é bang lé lhoq sân-yúng râ matú,
bainám eq nohtó zô pê é sui eq no-pyâ é myi-mhop lé,
yhángmòq é ahtoq má hpyûn gyûn é hkûn,
yhángmòq gi,
ahtoq gùngsho pyâm wó lhoq sansêng yù kô é nghut lhê.
14 Haû nghut jáng,
Garai Gasâng é hí má ra a bo é Yhânggùng lé,
ahtum abyùq é Sô dông mai nhông byî é Hkrisidùq é sui gi,
rû dui nyi é Garai Gasang lé ngá-nhúng wó dójaú sháng gàq ga,
shi é hkyô shut shuî jé é nyì yàp sâmlai mai ngá-nhûng é myìt sôn sê é hkyô lé,
je riyhang wó lhoq sanséng yu rî-nhung mhaî!
15 Haû nghut é yánmai,
Hkrisidùq gi,
danghtum htûm tô é,
ahtum abyùq é muìzè lé,
ji yù huî é bang wó hàp yù kó sháng gàq ga,
dangshikaq asik é gyoro sô xoq byi sû nghut nyi ri.
Haû su wó kut é gi,
sânghi lhê é dangshikaq ahkaû má mara kut shut é bang lé lhoqlhut yû râ matú,
yubàk chyîn xap zê ralhum dông,
Yhang shî hkám byî é yánmai nghut ri.
16 Madàt dang eq séng luî ga jang,
madàt dang taí sû haû shî bê hkyô sàksé shit râ lhê.
17 Haî mù gâ le,
madàt dang gi,
rayùq yùq shî jáng za shèq lichyúm htoq é nghut lhê.
Madàt dang taí sû rû dui nyì nyì,
haû gi,
hkâ-nhám le lichyúm htoq râ a nghut.
18 Haû nghut é yánmai,
sânghi lhê é dangshikaq lháng gi,
sui a bo lòm jáng lichyúm a htoq é nghut lhê.
19 Mosheq gi,
haû jep é târâ má bo é hkunmó hkangmó lé,
shiwa byù bànshoq bang lé ban taî pyo é hkûn,
zam zam ne é saumaú eq jàm kyâng lé yù mù,
nojûng zô é sui,
bainám sui eq wuì nyhô tô é lé,
chyúmding má le,
shiwa byù bànshoq bang lé le,
hpyûn gyûn é nghut ri.
20 Yhang gi,
“Sui shî gi,
núngmòq cháng râ matú,
Garai Gasang,
hkunmó hkyô to bê nghut é,
dangshikaq tô tô é sui nghut lhê.”b
ga taî ri.
21 Yhang gi,
sàksé zúm eq dójaú é má chung é zè pé má le,
haû eq rajung za sui haû hpyûn gyûn ri.
22 Gè gè gi,
haû jep é târâ má bo é dông ga jang,
azíng zê alùq bànshoq gi,
suî èq lhoq sân-yúng é hui râ dùt é nghut mù,
sui htoq hkyô a jòq jáng,
mara hkyut byi hkyô le jòq é a nghut.
23 Haû mù,
mauhkûng zè pê é azòng pé gi,
hkungga haú pê èq lhoq sân-yúng é hui râ é nghut lhê.
Nghut kôlhang,
mauhkûng zè pé yhang gi,
haú pê htoq je ge é hkungga pê èq lhoq sân-yúng é hui râ dùt é nghut lhê.
24 Hkâsu mù gâ le,
a-kyîng lhûm é azòng za nghut é,
byu èq saî é chyoiyúng dik é jowò má Hkrisidùq wang é a nghut é za,
Yhang gi,
mauhkûng má yhang wang é nghut mù,
ahkuî gi,
ngá-nhûng é matú Garai Gasâng é hí má bo yàp byî nyi é nghut lhê.
25 Yhang gi,
haû hkyangjong mó mai yhûmsing é sui a nghut é sui lé chûng mù,
Chyoiyúng Htâng é Jowò má zàn wuì wàng luî kut é su,
yhâng gùng lé dum nhông byi byi kut râ matú mauhkûng má wang é le a nghut.
26 Haú dông ru nghut le gi,
Hkrisidùq gi,
mau htoq xâng hkun mai shî hkâm é adàm myo myo nghut berâ nghut lhê.
Nghut kôlhang,
ahkuî,
Yhang gi,
yubàk mara huî sêng pyám byi râ matú,
yhâng gùng lé hkungga nhông byi râ ga i-pyàt pé ló htâng ló nyi é má,
bànshoq é matú radàm za htoq shit bê nghut ri.
27 Byù gi,
radá za shî râ nghut mù,
hau htâng má târâ jéyáng é hui râ nghut é eq rajung za,
28 Hkrisidùq gi,
byù myo myô é yubàk mara lé yu pyám byi râ matú,
radá za hkungga nhong é hui bê nghut ri.
Haû mù,
Yhang gi,
yubàk mara wun pyám byi râ a nghut lô é za,
Yhang lé láng nyi é bang lé hkyi yù hkyô yu lé byi râ matú,
htâng má í dâm nghû râ dàm htoq shit râ nghut lhê.