Petiruq, Htóng Mai Wó Lùt Htoq Lo É Hkyô
12
Haú u lé, Herot hkóhkâm gi, hpúng byû ra-am lé chyup yû mù, zing-ri râ ga ngantsâ nyi ri. 2 Haû mù, Yohan é yhang mang Yakuq lé sham èq sat pyám nhang ri. 3 Haú hkyô lé Yudaq byu pé wú gabú é lé myàng jáng, yhang gi, Petiruq lé le, jâng chyup yu ri. Haû dùt é gi, mún a kat é mùk zo poî u lé nghut ri. 4 Herot gi, Lhoqlhai Poî lai jáng shèq, mingbyû wui hí má jéyáng râ ga myìt tô é yánmai, yhang lé chyup yu é htâng má, htóng má lhûng to mù, yhang lé zúng râ matú, gyè myi yuq yuq kut myi hpúng lé àp tô ri.5 Haû mù, Petiruq gi, htóng má lúng tô ri; hpúng byû wuì kúm gi, yhâng é matú Garai Gasâng chyáng kyû gyai chôm dung byî nyi akô nghut ri.
6 Petiruq gi, Herot èq yhang lé jéyáng râ matú she htoq yû râ hî myìn lé, shâmtoq tui í hkat èq tuî é hui luî, gyèzo í yùq é gyoro má yhup myhî tô ri; zúng é bang le htóng hkum má zúng nyi bum akô. 7 Haú hkûn, Yhûmsing é maumang lagyo rayùq lé htoq shit mù, wàp haû má dùq bó lo ri. Maumang lagyo haû gi, Petiruq é nàmcham má ê hpùk kat mù, “Myàp toq wú aq.” ga nhaû ri; haú hkûn, Petiruq é lòq mâ é toqjâng tui pé le gyùt gyó ló bê nghut ri.
8 Maumang dum taî é gi, “Hpyihit hit mù, hkyî-tsung tsung aq.” gâ ri; Petiruq le taî é eq rajung za kut ri. “Náng é bumó wùt mù ngá htâng cháng aq.” ga yhang lé maumang lagyo dum taî ri. 9 Haú hkûn, yhang gi, htóng mai yhâng htâng châng htoq ló ri; nghut kôlhang, maumang lagyo kut é múzó haû gi, gè gè nghut é lé, yhang a sé mù, shing-rán myang é nghut ri ga myìt yu ri. 10 Ahkuî, yhángnhik gi, zúng tô é jowò í wô lai mù, wà má htoq é shâmtoq hkum má jé jáng, hkum haû le yhang baú bóng lô mù, yhángnhik htoq luî, wà hkyô rahkat má sô ló le, maumang lagyo gi, haú hkûn jáng, yhâng chyáng mai gâng ló byùq bê nghut ri.
11 Ahkuî, Petiruq gi, dum bûn gyîng lò jáng, “Yhûmsîng gi, Yhâng é maumang lagyo lé nhang kat mù, Herot é lòq eq Yudaq byu pé myìt myòqbyù tô é hkyô bànshoq mai, ngo lé hkyi yù bê nghut é lé, ahkuî ngò gè gè sé bê.” ga taî ri.
12 Haú hkyô lé myìt sê kat jáng, yhang gi, byù myo myo zing mù, kyûdûng nyi é jowò, Marikuq gâ é Yohan é yhâng nu Mariq é yhûm má jé ló ri. 13 Haû mù, yhang gi, yhûm wàng hkum lé ló bàt é hkûn, Roda gâ é duìnhâng zoshâng myiwe zo rayùq gi, gyô wú râ ga htoq lé lo ri. 14 Yhang gi, Petiruq é htê nghut é lé sê gyô kat jáng, lûm gabú luî hkum a hpóng byi shî é za, yhúmhkaû shut din wang ló mù, “Petiruq gi, hkum mhó lùt má lo yàp tô ri.” ga ló taî kyô ri.
15 Yhángmòq kúm gi, “Nàng na bê nghut ri.” ga yhang lé taî akô. Yhang gi, gè gè nghut ri ga ru taî nyi ri. Dum, yhángmòq gi, “Yhâng é maumang lagyo nghut âng ri.” ga taî akô.
16 Nghut kôlhang, Petiruq gi, hkum ru bàt nyî mù, yhángmòq hpông kat é hkûn, yhang lé myàng kôjáng, chôm maú byùq bum akô. 17 Yhang gi, yhángmòq lé zim za nyì keq ga lòq lìk shit mù, yhang lé Yhûmsing èq htóng mai hkâsu kut shuî htoq yu é hkyô lé taî kyo luî, “Shí hkyô lé Yakuq eq gu-mang wuì lé taî kyô kat keq.” ga taî ri. Hau htâng, yhang htoq ló luî, jowò gó shut e ló bê nghut ri.
18 Ahkuî, maubó jáng, gyèzô pé gi, Petiruq haî dùt byùq é hkyô lé a sé kô é yánmai, gyai maú gabyông bum akô. 19 Herot kúm gi, Petiruq lé ho wú le a myàng jáng, zúng é bang lé myî gôn wú mù, yhángmòq lé sat pyám râ matú hkunmó hkyô ri.
Herot Hkóhkâm Shi Byùq É Hkyô
Hau htâng, yhang gi, Yuda mau mai Kesare wà mó má gyó ló mù ló nyi nyi ri. 20 Haú gyoro má, Herot hkóhkâm gi, Turuq eq Sidon byu pé lé gyai nhik-yô nyi ri. Haû mù luî, yhángmòq gi, myìt rahkat zâ èq yhâng chyáng ê mù, Bilasitu gâ é, hkóhkâm hpó lum tô é sûwún hpó lé ê lûmhkaû mù, nguì ngón yùqyò hkyô ê dûng akô. Hkâsu mù gâ le, yhángmòq é zoshuq wó râ matú gi, Herot é ming lé lùmhkau nyì kô é yánmai nghut ri.
21 Haú hkûn, ding lhûm tô é buìnyì má, Herot gi, hkóhkâm hking wùt chûng mù, hkóhkâm tánghkuq má zùng luî, yhángmòq lé hkóhkâm mungdang byî ri. 22 Haû jáng, mingbyû wuì gi, “Htê shî gi, waxâng byu é htê a nghut, garai wá é htê shèq nghut ri.” ga garû bum akô. 23 Radá dâm, Herot gi, Garai Gasâng é hpungwup shingkang lé a tê byî é yánmai, Yhûmsing é maumang lagyo gi, yhang lé dàm byi luî, yhang gi, lùq èq hkê é hui mù, shi byùq bê nghut ri.
24 Haû Garai Gasâng é mungdang gi, sê é bang myô jàt lò mù, je riyhang byo myín lô bê nghut ri.
25 Baranaba eq Sholuq nhik gi, Yerusalem wà mó má yhángnhik saî tûm nyi é múzó ban saí jáng, Marikuq gâ é Yohan lé shuî chûng mù, Anti-oku wà mó shut taû ló bekô nghut ri.