Koneli É Shing-rán
10
Ahkuî, Kesare wà mó má gyèzo rashô ùp é Koneli gâ é gyèzau rayùq nyi ri. Yhang gi, Itali gyèdap mâ é nghut lhê. 2 Yhang gi, târâ hkúngga myìt bò luî, yhâng é yhûmbyù bànshoq bang eq rahá Garai Gasang lé gyùq hkúnggâ nyi lhê eq, myùng bang lé alû myo myo byi uchyang, Garai Gasang lé hkâ-nhám le kyûdûng nyi ri. 3 Ra-nyí lé, myínhtâng sum hkyíng kô má, Garai Gasâng é maumang lagyo rayùq gi, yhâng chyáng jé mù, “Koneli ê.” ga luî, yhang lé wùt é lé, shing-rán mai de de myang ri.4 Haû mù, haú yùq lé wú tsuq to mù, “Yhûmsîng ê, hai hkyô nghut lhê lhú?” ga gyùq myìt eq myî ri.
Maumang kúm gi, “Náng é kyûdung dang eq alû byî é hkyô gi, Garai Gasâng é hí má, hkungga masàt dông hkyâng bê nghut ri. 5 Ahkuî, Yopa wà mó shut byù nhang kat mù, Petiruq gâ é sû Simun lé ê jì nhâng àq. 6 Yhang gi, wuimau yàm mâ é, sho-kuq hkyup zô é Simun yhûm má bíng nyi ri.” ga taî ri.
7 Koneli gi, yhang eq dang taî é maumang lagyo ló byùq jáng, duìnhâng zoshâng í yùq eq, yhâng chyáng hkâ-nhám le châng nyì bang mâ é, târâ hkúnggâ é gyèzo rayùq lé ji yù mù, 8 dùt laî lo é hkyô bànshoq, yhángmòq lé taî kyo luî, Yopa wà mó shut nhang kat ri.
Petiruq É Shing-rán
9 Htang nyí nyí-káng u lé, yhángmòq, Yopa wà mó jé ló yâm má, Petiruq gi, kyûdung râ ga, yhûmhkûng shut dòq ló ri. 10 Haú hkûn, yhang gi, zò-mut luî rajung jung zô nau nyi ri; nghut kôlhang, zoshuq ru gaí nyi ashî le, yhang mòq byùq ló mù myòqwùp shing-rán myang é gi, 11 mauhkûng bóng lô mù, hpajóng mó sû é lé, myi chyûn má zui luî myigùng shut lhoqhkyô kat é azíng lé myang ri. 12 Haú hkaû má, myigùng htoq mâ é hkyî myi hkyî dàp é jung gaunyhaú ahú hú eq dô yê é jung ahú hú, mau má dang é nghoq ahú hú, lúng tô ri. 13 “Petiruq ê, toq mù, sat zo aq.” gâ é danghtê le mying htoq lo ri.
14 Petiruq kúm gi, “Yhûmsîng ê, haû gi, a wó dùt, achaq achyut é eq a sansêng é zè lé, ngò hkâ-nhám le a zô wú.” ga tû taî ri.a
15 Haú hkûn, “Garai Gasang lhoqsan lhoqyúng bê zè lé, a sanséng hkâ-nghû.” ga luî, yhang lé dum taî kat ri.
16 Haû su ga sum dâm taî é htâng má, zè haû lé radá dâm mauhkûng shut wùp yu ló bê nghut ri.
17 Ahkuî, Petiruq gi, yhang myang é shing-rán lé haî wá nghut lhê lhú ga luî, myìt maú nyi é hkûn, haû Koneli nhang kat é bang gi, Simun é yhûm lé myang hô kômù, hkúmtot má yàp to luî, 18 Petiruq gâ é sû Simun, yhûm haú má nyì a nyi é lé, wùt myî wú akô.
19 Petiruq gi, shing-rán haû lé ru myìt wú nyi ashî le, Sô gi, “Wú aq, byù sum yuq nang lé ho nyi akô, toq mù gyó ló aq; 20 yhángmòq gi, ngò nhang kat é bang nghut é yánmai, myìt haî a uq-ô é za, yhángmòq eq rahá bo ló aq.” ga taî ri.
21 Haû mù, Petiruq gi, haú bâng chyáng gyó ló luî, “Núngmòq ho nyi é sû gi, ngò nghut lhê, haî ra luî lé kô é lhú?” ga myî ri.
22 Yhángmòq taî é gi, “Díngmán é, Garai Gasang lé gyùq hkúnggâ é, Yudaq a-myû lhúnglhâng bâng é hí má myòqdong wó é, shô ùp gyèzau Koneli gi, nang lé yhâng é yhûm má ji hâng yù mù, nàng taî é dang gyô yù râ matú, yhang lé chyoiyúng maumang lagyô èq taî shit kyô é hkyô lé wó yû luî, ngá-mòq lé nhang kat é nghut lhê.” gâ akô. 23 Haû mù luî, Petiruq gi, yhángmòq lé wùt hâng yù mù, bíng nhang ri. Hau htang nyi, yhang gi, toq mù, yhángmòq eq rahá bo ló ri; Yopa wà mó mâ é gu-mang wuì ra-am le châng akô nghut ri.
Koneli Lé Petiruq Huî É Hkyô
24 Hau htang nyí, yhángmòq gi, Kesare wà mó shut wang ló akô. Koneli gi, yhâng é gu-mang wuì eq buìnùm ji-myi wuì lé ji tsîng to mù, yhángmòq lé láng nyi ri. 25 Petiruq wang ló jáng, Koneli gi, te yù mù, yhâng é hkyîwang má paî gòp noqkuq ri. 26 Petiruq kúm gi, “Toq àq, ngò le byù ru nghut lhê.” ga luî, taí uchyang yhang lé tu toq ri.
27 Haû mù, Petiruq gi, yhang eq dang nyô uchyang wang ló wú le, byù myo myo zùp zîng tô bum é lé myang ri. 28 Haú hkûn, yhang gi, yhángmòq lé, “Yudaq byù rayùq gi, noqkuq htûng dông tûngbaù rayùq eq a wó zùm yàp é, htoq htoq wàng wàng a wó kut é hkyô lé, núngmòq sé lùgù nghut akô. Nghut kôlhang, ó yùq lé le achaq achyut dùt ri, a sanséng dùt ri nghû a ge taî é hkyô lé gi, Garai Gasang, ngo lé tûn shit bê. 29 Hau é yánmai, núngmòq ngo lé ji kat é hkûn, ngò a he pyâm é za châng lé lo é nghut lhê. Haû mù luî, haî ra kô é yánmai, ngo lé ji akô nghû ngò myí nau ri.” ga taî ri.
30 Haú hkûn, Koneli gi, “Laî lò bê myi nyí nyí, myínhtâng sum hkyíng má, ngá é yhûm má, ngò kyûdûng nyi le, dànso lòq, dùq bó é mèbu wùt é byù rayùq ngá é hí má yàp htoq shit mù, 31 ‘Koneli ê, Garai Gasang gi, náng é kyûdung danghtê lé le gyo byi bê; nàng alû byî é hkyô lé le, bun byi bê nghut ri. 32 Hau é yánmai, Yopa wà mó shut byù nhang kat mù, Petiruq gâ é Simun lé jì nhâng àq. Haú yùq gi, wuimau yàm mâ é sho-kuq hkyup zô é Simun yhûm má bíng nyi ri.’ ga taî ri. 33 Haû mù luî, haú hkûn jáng ngò náng chyáng byù nhang kat bê nghut lhê. Ahkuî, nàng jé é gi, gyai gê bê nghut ri. Yhûmsîng yhang nang lé taí nhang é gû bànshoq gyô yù râ matú, ahkuî ngá-mòq lhúnglhâng bang Garai Gasâng é hí má nghut nyi lhê.” ga taî ri.
Petiruq Hko Kyô É Mungdang
34 Haú hkûn, Petiruq dang-hi hpông é gi, “Garai Gasang, myòqdong a hkyin é hkyô lé, ahkuî ngò gè gè yhang sé bê. 35 Byù myû chângjup má, Yhang lé gyùq hkúnggâ é eq tengmán é múzó jizó saî é sû gi, Yhâng é hí má myòqdong wó nyi ri. 36 Nyì mî-nyì, jòq mîjòq é Yhûmsîng, Yesuq Hkrisidùq é yánmai, nguì ngón hkyô eq sêng é gabú danglù lé hko kyo sháng gàq ga, Isira-elaq byu pê chyáng Garai Gasang hun kat é mungdang eq rajung za, 37 baptisima hkyô lé, Yohan hko é htâng, Galile mau mai Yuda mau bànshoq má taî pyo ló é hkyô lé, núngmòq sé gû nghut nyi lhê. 38 Haû gi, Garai Gasâng èq Chyoiyúng Sô eq wum-o a-tsam byî to bê sû, Nazaret wà byù Yesuq é hkyô nghut nyi ri. Garai Gasang yhang eq rahá nghut nyi é yánmai, yhang gi, ge é múzó lé kut wún é eq, nàt èq zing-ri huî é bang bànshoq lé lhoqgê byî wún ri.
39 Haû mù, Yudaq byu pê é ming má le, Yerusalem wà mó má le, yhang zui saí bê múzó bànshoq é sàksê pé gi, ngá-mòq nghut nyi lhê. Haú yùq lé yhang, yhángmòq sik zîng má jén sat pyám bekô nghut ri. 40 Garai Gasang kúm gi, sum nyí nghû râ buìnyì má, haú yùq lé lhoqdui toq kat é nghut mù luî, byù bànshoq é hí má a nghut é za, sàksé kut râ matú Garai Gasang hkyin to gù nghut é bang ngá-mòq é hí má za htoq shit bê nghut ri. 41 Yhang shi é mai dum dui toq ló é htâng má, ngá-mòq yhang, Yhang eq rahá razo rashuq wó kut yu é nghut lhê. 42 Yhang gi, chyungxe dui é bang eq shî bê bâng é târâ agyì kut râ matú, Garai Gasâng èq Yhang lé hkyin tô é sû nghut é hkyô lé, byu pé lé hko kyo râ eq, sàksé hkám râ matú, ngá-mòq lé hkunmó hkyô to bê nghut ri. 43 ‘Yhang lé lùmjíng é bang yùq hkangmó gi, Yhâng é mying é yánmai, yubàk hkyut pyám byî é hui kôrâ nghut lhê.’ ga luî, taî é myìqhtoi bànshoq gi, Yhâng é hkyô lé sàksé hkám byî é bang nghut nyi akô.” ga taî ri.
Chyoiyúng Sô Lé, Tûngbaù Pé Wó Hàp Yu É Hkyô
44 Petiruq gi, haú hkyô lé ru taî nyi ashî le, dang haû wó gyô é bànshoq bâng ahtoq má Chyoiyúng Sô gyó jé lo ri. 45 Tûngbaù pê é htoq má lháng Chyoiyúng Sô gâ é chyûnghuq lé hut hkyô kat é yánmai, Petiruq eq rahá lé é, ahpyo-kuq hpyit bê é lùmjíng bang Yudaq byu pé gi, maú bum akô. 46 Hkâsu mù gâ le, yhángmòq gi, làklaí dáng nyo é lé le, Garai Gasang lé hkya-on kô é lé le, wó gyô bùm kô é yánmai nghut ri.
47 Haû mù, Petiruq gi, “Ngá-mòq su Chyoiyúng Sô hkâm yù bê bang lé, wuìmyhup a hkám byi nhâng râ gi, wuì lé ó yùq wó hkûm to râ lhú?” ga taî ri. 48 Hau htâng, yhang gi, yhángmòq lé Yesuq Hkrisidùq é myìng lang luî wuìmyhup hkâm yù râ matú pying tô ri. Haú hkûn, yhángmòq gi, Petiruq lé buìnyì ra‑í nyí, nyi gyó shi aq ga chôm hkûm akô.