3
“Ngò gi, Ngá é lagyo lé nhang kat râ nghut lhê; yhang gi, Ngá é hí má hkyô hen lajang râ nghut lhê. Haú hkûn, núngmòq ho nyi é Yhûmsîng gi, dàn lòq tung, Yhâng é noqkuq yhûm má lé jé râ nghut lhê; núngmòq myìt ô nau nyi é dangshikaq eq sêng é lagyo gi, lé râ nghut lhê.” ga, haû Wum-o a-tsam dìk shoq bò Sû Yhûmsîng Garai taî ri.2 Nghut kôlhang, Yhang lé é buìnyì lé, ó yùq wó jân to râ lhú? Yhang htoq shit é hkûn, ó yùq wó yàp to râ lhú? Hkâsu mù gâ le, Yhang gi, zè bat zo su é myi su le, machyaq wing su le dù râ nghut lhê. 3 Yhang gi, ngùn lé nyhê jên yu é, zè bat zo sû su zùng mù, hîng eq ngùn lé nyhê jên yu é su, Lewiq byu pé lé lhoq sân-yúng yû râ nghut lhê. Haú hkûn, yhángmòq gi, díngmán é hkyô mai Yhûmsîng Garai lé hkungga nhông byi kôrâ nghut lhê. 4 Haú hkûn, Yudaq byu pé eq Yerusalem wà mó byu pê é hkungga pé gi, góhkûn lhê é buìnyì zànwut pé má su, Yhûmsîng Garaî é matú hàp yù gíng é hkungga pé dùt râ nghut lhê.
5 “Haû mù, Ngò gi, núngmòq chyáng le târâ jéyáng râ matú lé lô mù, myòqheq hpàqchyî kut bang, su-myi sulàng lú bang, dâkam mhaú bang, langchyâng pê é mú zui hpau lé mhaú zô é bang, chuimó chuízô pé lé zìk zo zìk shuq é bang, núngmòq chyáng nyi é byù bíng pé lé târâ ràp-rá hkyô a shit é bang eq Ngo lé a gyùq hkúnggâ é bang lé htuqhtîng é sàksé, hân za tûn shit râ nghut lhê.” ga, haû Wum-o a-tsam dìk shoq bò Sû Yhûmsîng Garai taî ri.
Xê Gàmbùm Mâ É Ragàmbùm Lé A Byî É Dông Dangshikaq Lé Lhoqhpyoq Pyâm É Hkyô
6 “Ngò Yhûmsîng Garai gi, a htaî lhik é nghut lhê. Haû mù, Yakup é awùt ashín pé núngmòq gi, lhoqhtên pyâm é hui zô é a nghut. 7 Núngmòq gi, núngmòq é îchyí îwâ pê é i-pyàt mai yhang, Ngá é târâ wàng hkunmó pé lé a châng é za tô pyám bekô nghut ri. Ngá chyáng lhing taû lò keq; haú hkûn, Ngò, núngmòq chyáng lhing tau râ nghut lhê.” ga, haû Wum-o a-tsam dìk shoq bò Sû Yhûmsîng Garai taî ri.
“Nghut kôlhang, núngmòq gi, ‘Ngá-mòq hkâsu kut lhing tau râ lhú?’ ga myî akô nghut ri.
8 Xângzo byù gi, Garai Gasang lé hpyoq zo hpyoq shuq ge kut lhê lhú? Nghut kôle, núngmòq gi, Ngo lé hpyoq zo hpyoq shuq bekô nghut ri.
Nghut kôlhang, núngmòq gi, ‘Nang lé ngá-mòq hká dông hpyoq zo hpyoq shuq é lhú?’ ga myî akô.
Xê gàmbùm mâ é ragàmbùm eq hkungga pé mai hpyoq zo hpyoq shuq akô nghut ri. 9 Núngmòq gi, Ngo lé hpyoq zo hpyoq shuq bekô nghut é yánmai, núngmòq byù myû gón gi, nhîng pyâm é hui zo bekô nghut ri. 10 Ngá é yhûm má zoshuq wó jòq to râ matú, xê gàmbùm mâ é ragàmbùm bànshoq lé Ngá é sùt-púnglhúng má kat to keq. Haú dông mai Ngo lé chyam wú keq; haú hkûn, Ngò gi, mauhkûng hkohot hkum hpóng mù, núngmòq lé, kat jang lháng a ngo loshoq, shimân jeju hut hkyó byi râ, a hut hkyó byi râ lé, myàng kôrâ nghut lhê.” ga, haû Wum-o a-tsam dìk shoq bò Sû Yhûmsîng Garai taî ri. 11 “Ngò gi, núngmòq é kyôzo muilhum lé a zô pyám râ matú dinggám pé lé hkûm pyám râ nghut mù, núngmòq é hkyâm mâ é tsibyiq nuî mâ é ashi pé lé, a myhíng shi-má yòq gyó pyám nhâng râ a nghut.” ga, haû Wum-o a-tsam dìk shoq bò Sû Yhûmsîng Garai taî ri. 12 “Haú hkûn, Núngmòq gi, shimân jeju wó bang nghut ri ga, gótû byù myû wuì bànshoq bang taí kôrâ nghut lhê; hkâsu mù gâ le, núngmòq é mîngdán gi, wú myìt ô naù nhô zâ é mîngdán dùt râ nghut lhê.” ga, haû Wum-o a-tsam dìk shoq bò Sû Yhûmsîng Garai taî ri.
Garai Gasang Lé Isira-elaq Byu Pé Nghutbûn É Myìt Mai Taî Htuqhtîng É Hkyô
13 Haû Yhûmsîng Garai taî é gi, “Núngmòq gi, Ngo lé, myìt myhâng nghutbûn é myìt mai taî htuqhtíng bekô nghut ri.
Nghut kôlhang, núngmòq gi, ‘Nang lé ngá-mòq haí jung taî htuqhtîng é lhú?’ ga myî akô nghut ri.
14 Núngmòq gi, ‘Garai lé dójaú é hai a-kyû a bò nghut ri. Yhang sang é dang pé lé cháng luî, haû Wum-o a-tsam dìk shoq bò Sû Yhûmsîng Garaî é hí má iyon yon bang su nyì kô é ru nghut le gi, ngá-nhúng hai a-kyû wó bê lhú? 15 Nghut kôlhang, ahkuî, haû myìt myhâng nghutbûn é bang lé shimân jeju wó bang ga ngá-nhúng taî nyi é nghut lhê. Gè gè yhang, agè ashop é hkyô kut bang gi, kô myhang bum ri; yhángmòq gi, Garai Gasang lé chyam wú kôlhang, wó lùt bum akô nghut ri.’ ga taî akô nghut ri.” gâ ri.
Nyi Myìt Gyó Tô É Jujúm Bang
16 Haú hkûn, haû Yhûmsîng Garai lé gyùq hkúnggâ é bang gi, rayùq eq rayùq nyo lhûm bum akô; haû Yhûmsîng Garai gi, gyô yù mù, gyo byi bê nghut ri. Haû mù, haû Yhûmsîng Garai lé gyùq hkúngga luî, Yhâng é myìng lé hkúngga bang eq séng luî, Yhâng é hí má myìtbun jihpán laiká ding kâ to bê nghut ri.
17 Haû Wum-o a-tsam dìk shoq bò Sû Yhûmsîng Garai taî é gi, “Haú hkyô lé Ngò kut é buìnyì má, yhángmòq gi, Ngò sing é sùtzè dùt râ nghut mù, Ngò gi, îwâ é múzó zui saî nyi é yhang zo lé, îwa mai shogyo nhikmyin mù, lhoqlhut yu é su, yhángmòq lé lhoqlhut yù râ nghut lhê. 18 Haú hkûn, núngmòq gi, díngmán bang eq agè ashop é bang a du lhum kô é hkyô lé le, Garai Gasang lé dójaú bang eq a dójaú bang a du lhum kô é hkyô lé lé, dum myàng kôrâ nghut lhê.” gâ ri.