ZAHKARIQ
Laiká
(Zechariah)
Haû Yhûmsîng Garaî Chyáng Lhing Taû Lò Râ Matú Ji É Hkyô
1
Dari hkóhkâm kut é í zan zàn, lha-mó shit hkyap má, Ido é yhang shu, Berehki-a é yhang zo, myìqhtoi Zehkariq chyáng haû Yhûmsîng Garaî é mungdang jé ri; haû gi,2 “Haû Yhûmsîng Garai gi, núngmòq é îchyí îwâ pé lé gyai yhang nhikjum yo bê nghut ri. 3 Haû mù, mingbyû wuì lé taí aq; haû Wum-o a-tsam dìk shoq bò Sû Yhûmsîng Garai shî su ga taî ri; ‘Ngá chyáng lhing taû lò keq.’ ga haû Wum-o a-tsam dìk shoq bò Sû Yhûmsîng Garai taî pyo ri; ‘Haú hkûn, Ngò gi, núngmòq chyáng lhing taû lé râ nghut lhê.’ ga haû Wum-o a-tsam dìk shoq bò Sû Yhûmsîng Garai taî ri. 4 ‘Haû Wum-o a-tsam dìk shoq bò Sû Yhûmsîng Garai shî su ga taî ri; núngmòq é agè ashop hkyô eq núngmòq é ashop é nyì yàp sâmlai mai Ngá chyáng lhing taû lò keq.’ gâ ri ga hí hkun lhê é myìqhtoî pé taî pyô kôlhang, Ngá é dang lé a gyô é eq Ngo lé a tâm gyo kô é, núngmòq é îchyí îwâ pé su hkâdùt kó; haû gi, Yhûmsîng Garai taî pyo ri. 5 Núngmòq é îchyí îwâ pé gi, ahkuî hká má kó lhú? Myìqhtoî pé gi, ahtum abyùq chyungxe dui nyi é nghut akô lhú? 6 Nghut kôlhang, Ngá é duìnhâng zoshâng myìqhtoî pé lé Ngò hkunmó hkyô tô é Ngá é mungdang pé eq Ngá é târâ wàng hkunmó pé gi, núngmòq é îchyí îwâ pê chyáng jé bê, a nghut kó lhí?
Haû mù, yhángmòq gi, myìt lhîng wó kôluî, ‘Haû Wum-o a-tsam dìk shoq bò Sû Yhûmsîng Garai gi, kut râ matú Yhang myìt hpyit to bê é eq rajung za, ngá-mòq é hkyô pé eq nyì yàp sâmlai mai hui zo gíng é lé kut byi bê nghut ri.’ ga taî akô.” gâ ri.
Myìqhtoi Hpô É Shing-rán
7 Dari hkóhkâm kut é í zan zàn, Shebat lhôhkyap nghut é, lha-mó raxe rahkyap hkyap, í xe myi nyí nyí má, Ido é yhang shu, Berehki-a é yhang zo, myìqhtoi Zehkariq chyáng haû Yhûmsîng Garaî é mungdang jé ri.
8 Ngò gi, myín lé shing-rán myang ri; wú aq; myang nê jî é byù rayùq ngá é hí má nyi tô é lé ngò myang ri. Yhang gi, langhkaû mâ é muritu shigâm pê é gyoro má yàp tô ri. Yhâng é htâng má gi, ne é, muí é eq hpyu é myang pé yàp tô bum ri.
9 Haú hkûn, Ngò gi, “Ngá yhûmsîng ê, shí pé gi, haî nghut lhê lhú?” nghû myi jáng, ngò eq dáng nyo nyi é maumang lagyo gi, “Haú pé haî nghut é lé, ngò, nang lé tûn shit râ nghut lhê.” ga tû taî ri.
10 Haû mù, muritu shigâm pê é gyoro má yàp tô é byù haû gi, “Shí bang gi, myìdàm gón má sô ê râ matú, haû Yhûmsîng Garai nhang kat é bang nghut lhê.” ga taî sân kyô ri.
11 Haú bang le, “Ngá-mòq gi, myìdàm gón má ê jé mù, mingkan gón gi, bánno luî, nguì ngón nyi é lé myang ri.” ga, haû muritu shigâm pê é gyoro má yàp tô é, Yhûmsîng Garaî é maumang lagyo lé hkyang shit akô nghut ri.
12 Haú hkûn, haû Yhûmsîng Garaî é maumang lagyo gi, “Wum-o a-tsam dìk shoq bò Sû Yhûmsîng Garai ê, shî nyhit xê zàn yhang, Nàng nhikjum yô é Yerusalem wá mó eq Yudaq ming mâ é wà pé lé, hkâ-myháng jé shoq shogyo nhikmyin hkyô a shit é nyì râ lhú?” ga taî ri. 13 Haû mù, haû Yhûmsîng Garai gi, ngò eq dáng nyo nyi é maumang lagyo lé ngón za nyò mù, nhiktíng dang pé taî ri.
14 Haú hkûn, ngò eq dáng nyo nyi é maumang lagyo gi, ngo lé, “Dang shí lé htê mó èq taî pyô àq; haû Wum-o a-tsam dìk shoq bò Sû Yhûmsîng Garai shî su ga taî ri; ‘Ngò gi, Yerusalem wà mó eq Zi-un Bùm lé gyai yhang nhik htûng ri; 15 nghut kôlhang, Ngò gi, nyì ngón yùqyò bûn é byù myû wuì lé gyai yhang nhikjum yô ri. Hkâsu mù gâ le, Ngò gi, Ngá é byu pé lé ra-tsuí za nhikjum yo jáng, yhángmòq gi, lai shoq zing-rî akô nghut ri.’ gâ ri.
16 Haû mù, haû Yhûmsîng Garai shî su ga taî ri; ‘Ngò gi, shogyo nhikmyin hkyô shit râ matú Yerusalem wà mó má dum taû ê bê nghut mù, haú má Ngá é yhûm saî saí râ nghut lhê. Haû mù, Yerusalem wà mó xuq é jowò lé tuî èq ké râ nghut lhê.’ gâ ri; haû gi, Wum-o a-tsam dìk shoq bò Sû Yhûmsîng Garai taî pyo ri.
17 Htê mó èq ru taî pyô shi aq; haû Wum-o a-tsam dìk shoq bò Sû Yhûmsîng Garai shî su ga taî ri; ‘Ngá é wà pé gi, agùn agó wó bûm kôrâ nghut lhê; haû Yhûmsîng Garai gi, Zi-un Bùm lé nhik dum tíng byi mù, Yerusalem wà mó lé dum hkyin yù râ nghut lhê.’ gâ ri.” ga taî ri.
Hkyuî Myi Hkyuî Eq Lòqmú Kung Bang Myi Yuq
18 Haú hkûn, ngò wú kat le, hkyuî myi hkyuî ngá é hí má jòq tô é lé myang ri. 19 Ngò gi, ngò eq dáng nyo nyi é maumang lagyo lé, “Shí pé gi, haí jung lhú?” nghû myi jáng, Yhang gi, ngo lé, “Hkyuî shí pé gi, Yudaq mau, Isira-elaq mau eq Yerusalem wà mó bang lé lhoqpyo pyâm é hkyuî pé nghut ri.” ga tû taî ri.
20 Hau htâng, haû Yhûmsîng Garai gi, ngo lé, lòqmú kung bang myi yuq lé tûn shit ri. 21 Ngò gi, “Shí bang haî lé kut kôrâ lhú?” nghû myi jáng, Yhang gi, “Hkyuî shí pé gi, ó a wám tu wú shoq, Yudaq mau bang lé lhoqpyo pyám kôlhang, shî lòqmú kung bang gi, hkyuî haú pé lé tân kyuq nghâ râ matú lé mù, Yudaq mau lé htim luî, haú mâ é byu pé lé lhoqpyo pyâm é, gótû byù myû wui é hkyuî haú pé lé dú hkyô pyám râ bang nghut ri.” ga tû taî ri.