Kê É Tui Chung É Byù Rayùq
2
Ngò dum tu wú kat le, kê é tui chung tô é byù rayùq ngá hí má nyi tô é lé myang ri. 2 Ngò gi, “Nàng hká ló lhê lhú?” nghû myi jáng, yhang gi, ngo lé, “Yerusalem wà mó hkâlhám làm mù, hkâhíng hing é lé wó sé shoq, wà haú lé ké râ matú e ló lhê.” ga tû taî ri.3 Haú hkûn, ngò eq dáng nyo nyi é maumang lagyo gâng ló é u, gótû maumang lagyo gi, yhang lé, lé hui mù, 4 “Dìn àq; zorâm zo haú lé, ‘Yerusalem wà mó gi, byù mòqmó eq shigu gaunyhaú myo myo nyi tô é yánmai, wàhkûm a jòq é wà dùt byùq râ nghut lhê. 5 Hkâsu mù gâ le, Ngò gi, wà hau é lhînghkyùq má myi xêwâm dùt râ nghut lhê.’ nghû taî kyo aq. ‘Ngò gi, wà hkaû má, wà hau é hpungwup shingkang dùt râ nghut lhê.’ ga haû Yhûmsîng Garai taî pyo ri.” gâ ri.
6 “Gaì! Gaì! Mautsûng mau mai hpâng keq.” ga haû Yhûmsîng Garai taî pyo ri. “Hkâsu mù gâ le, Ngò gi, núngmòq lé, mauhkûng ô mâ é myi chyûn shut hkat pyo kat bê nghut lhê.” ga haû Yhûmsîng Garai taî pyo ri.
7 “Gaì, Babelon Byìzo eq rahá chôm nyi é Zi-un ê, toq hpâng àq ô!” le gâ ri. 8 Hkâsu mù gâ le, Wum-o a-tsam dìk shoq bò Sû Yhûmsîng Garai shî su ga taî ri; “Núngmòq lé záng é sû gi, Yhâng é myòqjí lé chun é su dùt bang núngmòq lé záng bê nghut é yánmai, núngmòq lé hpyoq zo hpyoq shuq é a-myû wuì lé htuqhtíng râ matú, Hpung bô Su èq ngo lé yhángmòq chyáng nhang kat é htâng má, 9 ngò gi, ngá é lòq tû mù, yhángmòq lé hkyak yhang htuqhtíng râ nghut mù, yhángmòq é jùn pé gi, yhángmòq lé hpyoq zo hpyoq shuq râ nghut lhê. Haú hkûn, núngmòq gi, haû Wum-o a-tsam dìk shoq bò Sû Yhûmsîng Garaî èq ngo lé nhang kat é hkyô lé sé kôrâ nghut lhê.
10 Zi-un Byìzo ê, gabú mahkôn hkôn mù, gabú garu aq. Hkâsu mù gâ le, Ngò gi, lé lô mù, náng chyáng lé nyi nyì râ nghut lhê.” gâ ri; haû gi, Yhûmsîng Garai taî pyo ri. 11 Hau htoq agó, “Haú buìnyì má, gótû byù myû wuì myo myo gi, haû Yhûmsîng Garaî chyáng lé xoq kôrâ nghut mù, Ngá é byù dùt bùm kôrâ nghut lhê. Ngò gi, núngmòq chyáng nyì râ nghut mù, núngmòq gi, haû Wum-o a-tsam dìk shoq bò Sû Yhûmsîng Garaî èq ngo lé núngmòq chyáng nhang kat é hkyô lé sé kôrâ nghut lhê. 12 Haû Yhûmsîng Garai gi, chyoiyúng é mîngdán má, Yhâng é gàmbùm dông Yudaq lé sing yù mù, Yerusalem wà mó lé dum hkyin yù râ nghut lhê. 13 Waxâng zo wuî lhúnglhâng bang ê, haû Yhûmsîng Garaî é hí má zim za nyì keq; hkâsu mù gâ le, Yhang gi, Yhâng é chyoiyúng jowò mai toq lô bê nghut ri.” le gâ ri.