2
lha-mó nyhit hkyap hkyap, í xe ra-nyí nyí má, myìqhtoi Hagai dông haû Yhûmsîng Garaî é dang dum jé ri; haû gi, 2 “Shelatila é yhang zo, Yudaq ming zau Zerubabela lé le, Yozadak é yhang zo hkyangjong mó Yoshuq lé le, nyi myìt gyó tô é mingbyû wuì lé le, dang nyô mù, yhángmòq lé, shî su nghû taí keq; 3 ‘Yhûm shî mâ é hí lhê é hpungwup shingkang lé myang wú é sû, núngmòq chyáng ó yùq nyi myìt tô ashî lhú? Ahkuî haû hkâsu dùt ri lhú? Haû gi, núngmòq é myòq hí má haî le a nghut é su dùt byùq ri lhú? 4 Nghut kôlhang, Zerubabela ê, ahkuî wum-o lhoqkíng aq.’ ga haû Yhûmsîng Garai taî pyo ri. ‘Yozadak é yhang zo hkyangjong mó Yoshuq ê, wum-o lhoqkíng aq. Mingbyû wuì bànshoq bang ê, wum-o lhoqkíng keq.’ ga haû Yhûmsîng Garai taî pyo ri. ‘Haû mù, mú kut keq. Hkâsu mù gâ le, Ngò gi, núngmòq eq rahá nghut nyi lhê.’ ga haû Wum-o a-tsam dìk shoq bò Sû Yhûmsîng Garai taî pyo ri. 5 Hau htoq agó, ‘Haû gi, núngmòq Egutuq ming mai htoq lo é hkûn, Ngò, núngmòq eq tô tô é dangshikaq nghut lhê. Hau htoq agó, Ngá é Sô gi, núngmòq chyáng xoq nyi nyi é nghut lhê. Hkâgyùq kó.’ ga le taî pyo ri.6 Haû Wum-o a-tsam dìk shoq bò Sû Yhûmsîng Garai shî su ga taî ri; ‘A myáng má, Ngò gi, mauhkûng eq myìdàm htoq lé le, wuìshuq lung-aû eq myigùng lé le, dum lhoqnhún râ nghut lhê. 7 Ngò gi, gótû byù myû bànshoq lé lhoqnhún râ nghut mù, gótû byù myû wui é hpaudap jung sùtzè pé jé wang lò râ nghut lhê; haú hkûn, Ngò gi, yhûm shí má hpungwup shingkang lhoqpyíng râ nghut lhê.’ ga haû Wum-o a-tsam dìk shoq bò Sû Yhûmsîng Garai taî ri. 8 ‘Haû ngùn gi, Ngá é nghut lhê; hîng gi, Ngá é nghut lhê.’ ga haû Wum-o a-tsam dìk shoq bò Sû Yhûmsîng Garai taî pyo ri. 9 ‘Ahkui lhê é yhûm shî mâ é hpungwup shingkang gi, hí lhê é yhûm mâ é hpungwup shingkang htoq je hkìk râ nghut lhê.’ ga haû Wum-o a-tsam dìk shoq bò Sû Yhûmsîng Garai taî ri. ‘Ngò gi, jowò shí má nguì ngón hkyô tô to râ nghut lhê.’ ga haû Wum-o a-tsam dìk shoq bò Sû Yhûmsîng Garai taî pyo ri.” gâ é nghut ri.
A Sanséng Bâng É Matú Shimân Jeju Pé
10 Dari ùp é í zan zàn, lha-mó gau hkyap hkyap, í xe myi nyí nyí má, myìqhtoi Hagai dông haû Yhûmsîng Garaî é mungdang jé ri; haû gi, 11 “Haû Wum-o a-tsam dìk shoq bò Sû Yhûmsîng Garai shî su ga taî ri; ‘Hkyangjông pé lé târâ hkyô myî wú aq; 12 Rayùq yùq, yhâng é buhîng dúng mai chyoiyúng é sho lé htup yu ló é hkûn, buhîng dúng hau èq mùk, xun, tsibyiq wing, tsanlun xû eq gótû zoshuq pé lé záng é nghut jáng, haú pé gi, chyoiyúng râ lhú?’ gâ ri.” gâ é nghut ri.
Hkyangjông pé gi, “A chyoiyúng nghut ri.” ga tû taî akô.
13 Haû jáng, Hagai gi, “Shî màng lé záng luî a sanséng dùt é byù rayùq, haú pé mâ é rajung jung lé záng é nghut jáng, haû a sanséng dùt byùq lhê, a nghut lhí?” ga taî ri.
Haú hkûn, hkyangjông pé gi, “Nghut lhê; haû gi, a sanséng dùt byùq lhê.” ga tû taî akô.
14 Haú hkûn, Hagai gi, “Haû Yhûmsîng Garai taî pyo é gi, ‘Byù myû shî eq mingbyû wuì shí bang gi, Ngá é myòq hí má haû eq rajung za nghut nyi ri. Yhángmòq kut é haî nghut kôle, yhángmòq nhông byî é chyûnghuq haí jung le, a sanséng kó nghut ri.
15 Haû nghut jáng, hkû-nyí mai shí dông rago myìt wú keq; haû Yhûmsîng Garaî é noqkuq yhûm má, lùqgòk rachâm htoq racham a ke shî é buìnyì pé lé myìt tû wú keq. 16 Haú ayòq abun má, gùq í xê bùng htoq é gùq bùm má lé sû gi, raxê bùng za myang yu ri; tsibyiq wing htûng ngo xê yù râ matú, tsibyiq pyik jang má lé é sû gi, í xê htûng za myang yu ri. 17 Ngò gi, núngmòq zui saî é lòqmú lòqzó bànshoq lé, gùqji zô é, mhungzúng zuí nhang é eq lìkwò gyó nhang é wúm èq bàt kôlhang, núngmòq gi, Ngá chyáng a lhing lò shi kó nghut ri.’ gâ ri; haû gi, Yhûmsîng Garai taî pyo ri. 18 Hau htoq agó, ‘Haû mù, shí dông myìt wú shi keq; lha-mó gau hkyap hkyap, í xe myi nyí nyí nghut é hkû-nyí mai, haû Yhûmsîng Garaî é noqkuq yhum é a-pûn awang xuq hi é buìnyì lé myìt tû wú keq. 19 Gùqchyî má gùq bo akô lhú? Ahkuî jé shoq, tsibyiq nuî, hkohúm gâm, lungshi gàm eq tsanlun gàm má ashi a zui nghut ri.
Nghut kôlhang, hkû-nyí mai, Ngò gi, núngmòq lé shimân byi râ nghut lhê.’ le gâ ri.” ga taî ri.
Yhûmsîng Garaî É Lòqtsung Dizìk Nghut É Zerubabela
20 Lha-mó gau hkyap hkyap, í xe myi nyí nyí má, haû Yhûmsîng Garaî é mungdang Hagai chyáng dum jé ri; haû gi, 21 “Yudaq ming zau Zerubabela lé taî kyo aq; Ngò gi, mauhkûng eq myigùng lé lhoqnhún râ nghut lhê. 22 Ngò gi, hkóhkâm tángmyhâng pé lé tu mhuq pyám mù, maigan hkóséng ming pê é a-tsam lé bàt hkyop pyám râ nghut lhê. Ngò gi, gyèlhêng pé eq haú pé má ji bang lé tu mhuq pyám mù, myang pé eq myangji ji bang gi, yhûmsing é gu-mang hpô é sham èq zân sat lheq pyâm é hui râ nghut lhê.
23 Haû Wum-o a-tsam dìk shoq bò Sû Yhûmsîng Garai taî pyo é gi, ‘Shelatila é yhang zo, Ngá é duìnhâng zoshâng Zerubabela ê, haú buìnyì má, Ngò gi, nang lé shuî yù râ nghut lhê.’ gâ ri. Hau htoq agó, ‘Ngò gi, nang lé, Ngá é lòqtsung dizìk su dùt nhâng râ nghut lhê; hkâsu mù gâ le, Ngò gi, nang lé hkyin yu to bê nghut lhê.’ ga le, haû Wum-o a-tsam dìk shoq bò Sû Yhûmsîng Garai taî pyo ri.” gâ ri.