Isira-elaq Byu Pê É Gye Pé Lé Târâ Jéyáng Râ Hkyô
9
Myìqhtoi dang.Haû Yhûmsîng Garaî é mungdang gi, Hadirak mau lé htuqhtîng é nghut ri;
mungdang haû gi, Damasikuq wà má dìk lò râ nghut lhê.
Hkâsu mù gâ le, gótû byù bànshoq eq Isira-elaq a-myû up bànshoq gi,
haû Yhûmsîng Garai lé wú tô akô nghut ri.
2 Haû eq maukyo nghut é Hamat mau le,
Turuq wà eq Sidon wà le, hpàqchyî bò kôlhang wú kôrâ nghut lhê.
3 Turuq wà gi, yhûmsing é matú gingtíng gyèwap saî to mù,
ngùn lé hpuílhup su,
hîng lé hkyô pé mâ é hkabap su, bum zang to bê nghut ri.
4 Nghut kôlhang, haû Yhûmsîng Garai gi,
yhang sing é sùtzè pé lé yu pyám byi mù,
yhâng é wum-o a-tsam lé wuìshuq lung-aû má lhoqhtên pyám râ nghut luî,
wà haû gi, myî èq nyhê hkyô pyâm é hui râ nghut lhê.
5 Ashikelon wà gi, haú hkyô lé myàng mù, gyùq byùq râ nghut lhê;
Gaza wà le, myàng luî nán shoq myìt nò râ nghut lhê;
Ekron wà le, yhâng é myòqbyù hkyo é malaî hoq hpû é hui râ nghut lhê.
Gaza wà mâ é hkóhkâm gi, htûm byùq mù,
Ashikelon wà gi, chamchyuîyuì dùt byùq râ nghut lhê.
6 Byù myû nyó é byu pé gi, Ashidot wà má nyì kôrâ nghut mù,
Ngò gi, Hpilisiti byu pé nghutbûn é hkyô lé lhoqhtûm pyám râ nghut lhê.
7 Ngò gi, sui lé, yhángmòq é nhut mai,
hkûm tô é zoshuq pé lé, yhángmòq é zuì gyoro mai choq yû râ nghut lhê.
Nyi myìt gyó tô é bang gi, ngá-nhûng é Garai Gasang eq sêng byùq râ nghut mù,
Yudaq byù myû mâ é rakoq dùt byùq râ nghut luî,
Ekron wà gi, Yebusi byu pé su dùt byùq râ nghut lhê.
8 Nghut kôlhang, Ngò gi, gyè mòqmó pé lhom htuqhtîng pyám râ matú,
Ngá é noqkuq yhûm lhînghkyùq má gyèwap xuq mù zúng to râ nghut lhê.
Zìk zo zìk shuq bang gi, hkâ-nhám le, Ngá é byu pé lé wó zìk zo râ a nghut lo;
hkâsu mù gâ le, ahkuî, Ngò yhang wú nyî bê nghut lhê.
Zi-un Bum É Hkóhkâm Lé Lo É Hkyô
9 Zi-un Byìzo ê, gyai yhang gabú byam chyu aq!
Yerusalem Byìzo ê, gabú garu aq!
Wú aq, náng é hkóhkâm gi, náng chyáng lé lo ri;
yhang gi, díngmán é eq wó ûngmyuq sû nghut ri;
yhang gi, i-myìt lhoqnyhum é myìt bò mù,
loze zìng shuî é loze zo nghut é,
loze htoq má jî tô ri.a
10 Ngò gi, Ehprim mai gyèlhêng pé lé,
Yerusalem wà mó mai majan myang pé lé, lhoqhtûm pyám râ nghut lhê;
gyè chûng lai lé le, lhoqhkyop pyám râ nghut lhê.
Yhang gi, gótû byù myû wuì lé, nguì ngón hkyô taî pyo kyo mù,
wuìshuq lung-aû ralhum mai wuìshuq lung-aû gólhum jé shoq le,
Uhprat Wuìlàng mai myìdàm htoq htáng shoq le, ùp râ nghut lhê.
11 Zi-un ê, nàng eq tô tô é Ngá é dangshikaq suî é yánmai,
Ngò gi, nàng eq sêng é htóng byu pé lé,
wuì a bo é dong hkaû mai lhoqlhut kat râ nghut lhê.
12 Myìt myòqbyu nyi é htóng byu pé ê,
núngmòq é gingtíng gyèwap shut taû ló keq;
Ngò gi, núngmòq lé jeju í tú byi râ nghû,
ahkuî jáng taî pyo lhê.
13 Hkâsu mù gâ le, Ngò gi, Ngá é lai lé su Yudaq lé chûng mù,
Ehprim lé myoshi dùt nhâng râ nghut lhê.
Zi-un ê, Ngò gi, náng é yùqzô pé lé,
Grik byu pé lé htim râ matú myìt lhoqtoq râ nghut mù,
nang lé, sârhe pê é shâm su dùt nhâng râ nghut lhê.
Yhûmsîng Garai Htoq Shit Râ Hkyô
14 Haú hkûn, haû Yhûmsîng Garai gi, yhángmòq é ahtoq má htoq shit mù,
Yhâng é myoshi gi, maulhap hpyat é su htoq râ nghut lhê.
Haû Ahko Ahkáng lhúnglháng wó Sû Yhûmsîng Garai tut mùt mù,
maupyî hkyam mâ é laìlhíng mó eq lé lô râ nghut lhê;
15 haû Wum-o a-tsam dìk shoq bò Sû Yhûmsîng Garai gi,
yhángmòq lé mâgum yù râ nghut lhê.
Yhángmòq gi, lhoqhtên pyám râ nghut mù,
lùqcham tseshî pê èq wó ung pyám kôrâ nghut lhê.
Yhángmòq gi, tsibyiq wing shuq wùt é su,
wùt garû bùm kôrâ nghut lhê;
yhángmòq gi, hkungga gyàp achyûn pé má ko gyun râ nghut é sui hkoq su,
sui dàp byíng bûm kôrâ nghut lhê.
16 Yhángmòq é Garai Gasang nghut é, haû Yhûmsîng Garai gi,
haú nyí má, Yhâng é byu pé lé,
sau zúng sû, yhâng é sau hpúng lé hkyi yu é su, hkyi yù râ nghut lhê.
Yhángmòq gi, Yhâng é mîngdán má,
jánmaú mâ é lungsêng pé su wìk wìk dùq kôrâ nghut lhê.
17 Yhángmòq gi, hkâ-í yhang gè réng mù,
gyai yhang wú yúng é dùt kôrâ nghut lhê!
Gùqzò gi, zorâm wuì lé,
tsibyiq wing asik gi, zo-myi wuì lé,
kô myhâng nhâng râ nghut lhê.