Yerusalem Wà Mó Lé Shimân Byi Râ Matú Yhûmsîng Garai Danghtum Htûm Tô É Hkyô
8
Haû Wum-o a-tsam dìk shoq bò Sû Yhûmsîng Garaî é mungdang ngá chyáng jé ri.2 Haû Wum-o a-tsam dìk shoq bò Sû Yhûmsîng Garai shî su ga taî ri; “Ngò gi, Zi-un Bum é matú gyai yhang nhik a shî byi nghut ri; Ngò gi, yhâng é matú, Ngá é i-myìt tsû shoq nhik a dik byi nghut ri.” gâ ri.
3 Haû Yhûmsîng Garai shî su ga taî ri; “Ngò gi, Zi-un Bùm má taû ló mù, Yerusalem wà mó má nyi nyì râ nghut lhê. Haú hkûn, Yerusalem wà mó lé gi, Jujúm é Wà ga râ nghut mù, haû Wum-o a-tsam dìk shoq bò Sû Yhûmsîng Garaî é bùm lé gi, Chyoiyúng Bùm ga râ nghut lhê.” gâ ri.
4 Haû Wum-o a-tsam dìk shoq bò Sû Yhûmsîng Garai shî su ga taî ri; “Myhî mang hpô mâng pé gi, chyungxe i-pyàt hîng mù, yhûmsing lòq má dumbáng chûng luî, Yerusalem wà mó mâ é hkyô pé má dum zung tô bùm kôrâ nghut lhê. 5 Wà hkyô pé má gi, yùqzo byìzô pé byíng shoq gyâkûn bùm kôrâ nghut lhê.” gâ ri.
6 Haû Wum-o a-tsam dìk shoq bò Sû Yhûmsîng Garai shî su ga taî ri; “Múzó shí hkat gi, nyi myìt gyó tô é byù shí bâng é matú, haú ahkyíng má maúhpo su dùt râ nghut kôle, Ngá é matú maúhpo dùt râ lhú?” gâ ri; haû gi, Wum-o a-tsam dìk shoq bò Sû Yhûmsîng Garai taî pyo ri.
7 Haû Wum-o a-tsam dìk shoq bò Sû Yhûmsîng Garai shî su ga taî ri; “Ngò gi, Ngá é byu pé lé, buìhtoq hkyam eq buìwàng hkyam mâ é mîngdán pé mai hkyi yù râ nghut lhê. 8 Ngò gi, yhángmòq lé, Yerusalem wà mó má nyì râ matú shuî lò râ nghut lhê; haû mù, yhángmòq gi, Ngá é byù dùt luî, Ngò gi, yhángmòq é jujúm é eq díngmán é Garai Gasang dùt râ nghut lhê.” gâ ri.
9 Haû Wum-o a-tsam dìk shoq bò Sû Yhûmsîng Garai shî su ga taî ri; “Ahkuî, ‘Noqkuq yhûm wó saí sháng gàq, núngmòq é lòq wum lhoqhtan to keq.’ gâ é dang lé gyo keq. Haû gi, Wum-o a-tsam dìk shoq bò Sû Yhûmsîng Garaî é yhum é a-pûn awang lé xuq é nyí má bo lom é myìqhtoî pé taî é dang le nghut ri. 10 Haú buìnyì pê é hí má, byu pê é matú zuihpau le a wó, shigu gaunyhaú nghô chung é le a nyì; gye pê é yánmai, htoq ló wang lò kut é bang le ngón hkyô a jòq nghut ri; haî mù gâ le, Ngò gi, rayùq eq rayùq, yhûmsing é yhûmkyochang lé htuqhtíng nhang é yánmai nghut lhê. 11 Nghut kôlhang, ahkuî, Ngò gi, nyi myìt gyó tô é byù shí bang lé, laî ló bê hkûn kut é su, a kut lo râ nghut lhê.” gâ ri; haû gi, Wum-o a-tsam dìk shoq bò Sû Yhûmsîng Garai taî pyo ri.
12 Hau htoq agó, “Kyô myui gi, rago yùq yúng mù, tsibyiq nuî gi, ashi zui luî, myigùng gi, kyôshi myuishi lhoqhtoq byi mù, mauhkûng gi, nghân lhoqhkyó byi râ nghut lhê. Ngò gi, haú pé bànshoq nyi myìt tô é byù shí bang lé sing yù nhâng râ nghut lhê. 13 Yudaq a-myû eq Isira-elaq a-myû wuì ê, núngmòq gi, gótû byù myû wui chyáng nhîng pyâm é hui zo kô é su, Ngò gi, núngmòq lé hkyi yù râ nghut mù, núngmòq gi, shimân jeju dùt kôrâ nghut lhê. Hkâgyùq kó; núngmòq é lòq wum lhoqhtân keq.” le gâ ri.
14 Haû Wum-o a-tsam dìk shoq bò Sû Yhûmsîng Garai shî su ga taî ri; “Ngò gi, núngmòq é îchyí îwa mai Ngo lé nhikmó lhoq yo kô é hkûn, nùngngham a wó é za núngmòq chyáng byò dan byò sho hkyô jé nhâng râ matú myìt hpyit yu é eq rajung za,” ga, haû Wum-o a-tsam dìk shoq bò Sû Yhûmsîng Garai taí mù, 15 “ahkuî, Ngò gi, Yerusalem wà mó eq Yudaq mau lé ge é hkyô dum kut byi râ matú myìt hpyit to bê nghut lhê. Hkâgyùq kó. 16 Núngmòq châng kut e ló râ gi, shí pé nghut lhê; rayùq eq rayùq tengmán é dang taî lhum keq; núngmòq é wà hkum má, tengmán é eq gè réng é dông târâ hpyit keq; 17 Núngmòq ó yùq le, yhûmsing é yhûmkyochang lé ashop é dông hkâhaq hên kó; a têng é dông dakâm râ lé hkâ-myìt nguì kó. Shí pé bànshoq lé Ngò a ngui é nghut lhê.” ga le haû Yhûmsîng Garai taî pyo ri.
18 Haû Wum-o a-tsam dìk shoq bò Sû Yhûmsîng Garaî é mungdang ngá chyáng jé ri.
19 Haû Wum-o a-tsam dìk shoq bò Sû Yhûmsîng Garai shî su ga taî ri; “Lha-mó myi hkyap hkyap má le, ngo hkyap hkyap má le, nyhit hkyap hkyap má le, raxê hkyap hkyap má le, zoshuq tûm é pé gi, Yudaq byu pê é matú, gabú byam chyû é, gabú myìt ngón é eq gabú myìt ngui é poî dùt râ nghut lhê. Haû mù, tengmán hkyô eq nguì ngón hkyô lé chyitdàp keq.” gâ ri.
20 Haû Wum-o a-tsam dìk shoq bò Sû Yhûmsîng Garai shî su ga taî ri; “Byù myû wuì eq wà pé mâ é byu pé myo myo gi, lé lo bùm shi kôrâ nghut lhê. 21 Wà rawà mâ é byu pé gi, gówâ má ê mù, ‘Haû Yhûmsîng Garai lé ê dûng tôngbán râ matú le, Wum-o a-tsam dìk shoq bò Sû Yhûmsîng Garai lé hô râ matú le, radá dâm e ló sháng, ngò le ê râ nghut lhê.’ ga taî bùm kôrâ nghut lhê. 22 Haû mù, gótû a-myû byù myo myo eq wúm htan é byù myû wuì gi, haû Wum-o a-tsam dìk shoq bò Sû Yhûmsîng Garai lé hô râ matú eq Yhang lé dûng tôngbán kôrâ matú, Yerusalem wà mó má lé lo bùm kôrâ nghut lhê.” gâ ri.
23 Haû Wum-o a-tsam dìk shoq bò Sû Yhûmsîng Garai shî su ga taî ri; “Haú buìnyì pé má, myíng gótû tû mu é, gótû byù myû wuì mâ é byù raxê yùq gi, Yudaq byù rayùq é buhîng htâng má zuî to mù, ‘Garai Gasang gi, núngmòq eq rahá nghut nyi ri gâ é hkyô lé ngá-mòq wó gyo bê nghut é yánmai, núngmòq eq rahá ngá-mòq lé bo ê nhâng àq.’ ga taí kôrâ nghut lhê.” gâ ri.