Târâ Ràp-rá Hkyô Eq Shogyo Nhikmyin Hkyô
7
Hkóhkâm Dari ùp é myí zan zàn, Hkesile gâ é lhôhkyap gau hkyap hkyap, myi nyí nyí má, haû Yhûmsîng Garaî é mungdang Zehkariq chyáng jé ri. 2 Behtela wà byu pé gi, Sharezera eq Regem-Melek rahá yhángnhik é byu pé lé nhang kat mù, haû Yhûmsîng Garai lé jeju ê dung nhâng luî, 3 haû Wum-o a-tsam dìk shoq bò Sû Yhûmsîng Garaî é yhûm mâ é hkyangjông pé eq myìqhtoî pé lé, “Ngá-mòq gi, zànwut myo myo kut nyi é su, lha-mó ngo hkyap hkyap má, ngaùhkyûng ngaùyang kut yón luî, zoshuq túm ra râ lhú?” ga myí nhang kat akô nghut ri.4 Haú hkûn, haû Wum-o a-tsam dìk shoq bò Sû Yhûmsîng Garaî é mungdang ngá chyáng jé ri; haû gi, 5 “Mingbyû wuì bànshoq eq hkyangjông pé lé shî su nghû myi aq; ‘Núngmòq, shî nyhit xê zàn yhang, lha-mó ngo hkyap hkyap eq nyhit hkyap hkyap má, zoshuq túm luî ngaùhkyûng ngaùyang kut kô é gi, gè gè yhang, Ngá é matú zoshuq túm kô é nghut lhê lhú? 6 Núngmòq zo shuq kô é hkûn, yhûmsing é matú za zo shuq kô é nghut lhê, a nghut kó lhú? 7 Dang shí pé gi, Yerusalem wà mó eq hau é awui ayàm mâ é wà pé má, byu pé nyì ngón yùqyo nyì mù, Maupyî mau eq buìwàng hkyam bùmhkyî pá pé má, byù nyi bum é hkûn, hí lhê é myìqhtoî pé dông haû Yhûmsîng Garai taî pyo é mungdang nghut lhê, a nghut kó lhí?’ gâ ri.” gâ é nghut ri.
8 Haû Yhûmsîng Garaî é mungdang gi, Zehkariq chyáng dum jé ri; haû gi, 9 “Haû Wum-o a-tsam dìk shoq bò Sû Yhûmsîng Garai shî su ga taî ri; ‘Tengmán é târâ ràp-rá hkyô cháng keq; rayùq eq rayùq, shogyo nhikmyin hkyô eq jeju tûn shit lhum keq. 10 Chuimó chuízo, byù bíng pé eq asho awuî é bang lé hkâzìk zo kó. Rayùq eq rayùq, agè ashop é hkyô hkâhtung lhum kó.’ gâ ri.
11 Nghut kôlhang, yhángmòq gi, a tâm gyo kó nghut ri; yhángmòq gi, i-myìt htan é mai nùnghtáng shut lhik ló kôluî, yhûmsing nohkyap lé xaû pyâm bum akô nghut ri. 12 Yhángmòq gi, târâ lé le, haû Wum-o a-tsam dìk shoq bò Sû Yhûmsîng Garai mai, Yhâng é So èq hí lhê é myìqhtoî pé dông hun kat é mungdang pé lé le, a wó gyo loshoq, yhûmsing é i-myìt lé paihpoi lùqgòk su lhoqhtan pyâm akô nghut ri. Haû mù, Wum-o a-tsam dìk shoq bò Sû Yhûmsîng Garai gi, gyai yhang nhikjum yo bê nghut ri.
13 ‘Ngò wùt é hkûn, yhángmòq a gyo kó nghut ri; haû mù, yhángmòq wùt jáng le, Ngò gyo byi râ a nghut.’ ga, haû Wum-o a-tsam dìk shoq bò Sû Yhûmsîng Garai taî ri. 14 ‘Ngò gi, yhángmòq a sê é gótû byù myû wui chyáng yhángmòq lé laìlhíng mai lhoqpyo hâng kat bê nghut mù, yhángmòq gi, haú má byù bíng dùt bekô nghut ri. Haû mù, yhángmòq tô pyâm tô é mîngdán gi, byù a sô lai loshoq chamchyuîyuì dùt to bê nghut ri. Yhángmòq gi, nguì ngón é mîngdán haú lé chamchyuîyuì kut pyâm to bekô nghut ri.’ ga le taî ri.” gâ ri.