Yudaq Byu Pé Lé Yhûmsîng Garai Wú Gon Râ Hkyô
10
Mau mún gyó nám lé mau wô râ matú, haû Yhûmsîng Garai lé dung keq;maulhap hpyat é laìdun mó lé nhang kat é Sû gi, haû Yhûmsîng Garai nghut ri.
Yhang gi, byù bànshoq bang lé mau wo hkyó byi mù,
yùq hkangmó lé, yò pé má hôwa yùq htoq byí nhang ri.
2 Hparà hpôlhô péa gi, mhaú dang taí mù,
bùt hpyit bang gi, mhaû é shing-rán myang bum akô nghut ri;
yhángmòq gi, a têng é yhupmòq pé lé taî kyo mù,
akôm má nhiktíng byî akô nghut ri.
Haû mù, mingbyû wuì gi, sau su hkyô nghoq wún mù,
sau zúng sû a nyi é yánmai hpu zô nyi bum akô nghut ri.
3 “Ngò gi, sau zúng bang lé nhikmó-yo mù,
zau wuî lé dam byi râ nghut lhê;
hkâsu mù gâ le, haû Wum-o a-tsam dìk shoq bò Sû Yhûmsîng Garai gi,
Yhâng é sau hpúng nghut é, Yudaq byu pé lé wú gon mù,
yhángmòq lé, majân nyí mâ é myang gê mó su dùt nhâng râ nghut lhê.
4 Yudaq mai, ahkyàk é htúngchyûn lùqgòk, zúm mâ é sangchyam,
majan má chung é lai eq ùp é zau yùq hkangmó, htoq lô râ nghut lhê.
5 Zau yhángmòq gi, majan mâ é sarhê mó pé su dùt mù,
wà hkyô pé mâ é hkabap yô má yhángmòq é gye pé lé nâng pyeq pyám kôrâ nghut lhê.
Haû Yhûmsîng Garai gi, yhángmòq eq rahá nghut nyi é yánmai,
yhángmòq gi, gyè zan kôrâ nghut mù,
myang ji jî é gye pé lé hoq lhoqhpu kôrâ nghut lhê.
6 Ngò gi, Yudaq byu pé lé wum-o lhoqkíng byi mù,
Yosep é up bang lé hkyi yù râ nghut lhê.
Ngò gi, yhángmòq lé shogyo nhikmyîn é yánmai,
yhángmòq lé shuî taû yù râ nghut lhê.
Yhángmòq gi, Ngo èq a he-ngìk pyâm é hui bang dông dùt nyì râ nghut lhê;
hkâsu mù gâ le, Ngò gi, yhángmòq é Garai Gasang nghut é, haû Yhûmsîng Garai nghut mù,
yhángmòq é dang lé tu byi râ nghut lhê.
7 Ehprim byu pé gi, sarhê mó pé su dùt kôrâ nghut mù,
yhángmòq é i-myìt pé gi, tsibyiq wing shuq gyî tô é su gabú kôrâ nghut lhê.
Yhángmòq é zodù wuì gi, haú lé myàng mù, gabú byam chyu kôrâ nghut lhê;
yhángmòq é i-myìt nhiklhum gi, haû Yhûmsîng Garai má gabú byam chyu kôrâ nghut lhê.
8 Ngò gi, yhángmòq lé nhut yang chîn é dông wùt mù,
shuî tsîng to râ nghut lhê.
Gè gè yhang, Ngò gi, yhángmòq lé hkyi xe yù mù,
hí lé myo kô é su lhoqmyo râ nghut lhê.
9 Ngò gi, yhángmòq lé byù myû wui chyáng lhoqpyo hâng kat kôle,
yhángmòq gi, mau we ming má Ngo lé myìtbun kôrâ nghut lhê.
Yhángmòq le, yhángmòq é zodù wuì le, wó nyi myìt gyó to mù,
wó dum taû lò kôrâ nghut lhê.
10 Ngò gi, yhángmòq lé Egutuq ming mai shuî taû lò mù,
Asuri ming mai shuî tsîng yù râ nghut lhê.
Ngò gi, yhángmòq lé, Gile-at mau eq Lebanon mau má shuî lò râ nghut mù,
haú má, yhángmòq é matú jowò lháng a ngo dùt râ nghut lhê.
11 Yhángmòq gi, wuîhke jamjau nghu é wuimau mai laî byìt kôrâ nghut lhê;
Ngò gi, wuìshuq lung-aû mâ é wuìlhêng mó bàt zîm pyám râ nghut mù,
Nile Wuìlàng mâ é nìk é wuì pé lé kân byùq nhâng râ nghut lhê.
Asuri ming mâ é nghutbun hkyô gi, byìt gyó byùq mù,
Egutuq ming mâ é ùp é dumbáng gi, htûm byùq râ nghut lhê.
12 Ngò gi, yhángmòq lé, haû Yhûmsîng Garaî chyáng mâ é wum-o lhoqkíng byi râ nghut mù,
yhángmòq gi, Yhâng é myìng mai myang nyì yàp kôrâ nghut lhê.” ga,
haû Yhûmsîng Garai taî pyo ri.