Yhûmsîng Garaî É Bùm
4
Ló htâng é buìnyì pé má,haû Yhûmsîng Garaî é noqkuq yhûm jòq é bùm gi,
bùm pé mâ é je ló myhang é bùm dùt to râ nghut mù,
kong pé bànshoq htoq má wàq toq tô é hui râ nghut luî,
byu pé gi, haú má yán wang e bùm kôrâ nghut lhê.
2 Byù myû wuì myo myo gi, lé lô kômù,
“Lé keq; haû Yhûmsîng Garaî é bùm nghut é,
Yakup é Garai Gasâng é noqkuq yhûm má dòq ê sháng.
Yhang gi, Yhâng é hkyô má ngá-nhúng ge so râ matú,
ngá-nhúng lé Yhâng é hkyô pé lhom mhoq kyo râ nghut lhê.” ga taí kôrâ nghut lhê.
Hkâsu mù gâ le, haû târâ gi, Zi-un Bùm mai htoq lô râ nghut mù,
haû Yhûmsîng Garaî é mungdang gi, Yerusalem wà mó mai htoq lô râ nghut lhê.
3 Yhang gi, byù myo myô é gyoro má târâ jéyáng râ nghut mù,
we we má nyi é a-tsam mó bo é byù myû wuì lé târâ hpyit byi râ nghut lhê.
Yhángmòq gi, yhángmòq é shâm pé lé, yò hpuq shâmtoq long bàt htoq mù,
yhángmòq é lhâm pé lé, gòknghe bàt htoq kôrâ nghut lhê.
Byù ra-myû gi, gó-myû lé sham èq htim râ a nghut lo;
yhángmòq gi, majan zan hkyô mhoq byi kôrâ a nghut lo.
4 Yùq hkangmó gi, yhûmsing é tsibyiq nuî ô má le,
yhûmsing é hkohúm gâm ô má le, zúng kôrâ nghut mù,
yhángmòq lé kyuq é byù ó le nyì râ a nghut lo;
hkâsu mù gâ le, Wum-o a-tsam dìk shoq bò Sû Yhûmsîng Garai gi, haú hkyô lé taí bê nghut ri.
5 Gótû byù myû wuì bànshoq bang gi,
yhûmsing é hparà pê é myìng mai so kôrâ nghut lhê;
nghut kôlhang, ngá-mòq gi, ngá-mòq é Garai Gasang nghut é,
haû Yhûmsîng Garaî é mying mai ahtum abyùq sô nyì râ nghut lhê.
Yhûmsîng Garai Htung É Hkyô
6 Haû Yhûmsîng Garai taî pyo é gi,
“Haú buìnyì má, Ngò gi, hkyî hten bang lé shuî tsîng yù mù,
shúm zûng huî é bang eq Ngò mai hpu zo nhang é bang lé
zùp zing nhâng râ nghut lhê.
7 Ngò gi, hkyî hten bang lé, Ngá é nyi myìt gyó tô é bang dùt nhâng mù,
we we má hkat kat huî é bang lé, wum-o bo é byù myû dùt nhâng râ nghut lhê.
Haû Yhûmsîng Garai gi, Zi-un Bùm má,
haú nyí mai ahtum abyùq yhángmòq lé ùp râ nghut lhê.
8 Sau hpúng lé zúng é mâchya nghut é,
Zi-un Byìzô é gingtíng jowò ê,
hí lé ùp é ahko ahkáng lé nàng dum wó râ nghut lhê;
hkóhkâm ùp é ahkáng ayá gi, Yerusalem Byìzô chyáng jé râ nghut lhê.” gâ ri.
9 Nàng, ahkuî, haî mù ngau garû nyi lhê lhú?
Náng chyáng hkóhkâm a nyi é nghut lhê lhú?
Náng é hpàqchyî byi sû shi byùq mù,
zo hkû nò no é sû su, no hpu zô é huî nyi lhê lhú?
10 Zi-un Byìzo ê, zo hkû nò no é myiwe myhí su,
hkê-nho hpu zo aq;
hkâsu mù gâ le, ahkuî lháng, nàng gi,
wà mai htoq luî pá mau má wàp ê xuq râ nghut lhê.
Nàng gi, Babelon wà mó má ê râ nghut mù,
haú má hkyi xe yu é hui râ nghut lhê.
Haú má, Yhûmsîng Garai gi, nang lé,
náng é gye pê é lòq mai hkyi htoq yû râ nghut lhê.
11 Nghut kôlhang, ahkuî lháng, byù myû myo myo gi,
nang lé chôm htim râ matú zùp zing kômù,
“Zi-un wà mó gi, agòt a-û dùt é hui zo sháng gàq;
yhang lé wú mù ngá-nhúng nhik dìk sháng gàq!” ga taî bum akô nghut ri.
12 Nghut kôlhang, yhángmòq gi,
haû Yhûmsîng Garai myìt é hkyô lé a sé kô é htoq agó,
Yhang htung é hkyô lé a sê gyo kó nghut ri;
Yhang gi, yhángmòq lé, gùqgyó pé lé su,
chyârâng má bum zang to bê nghut ri.
13 “Zi-un Byìzo ê, toq luî, gùq bàt àq;
hkâsu mù gâ le, Ngò gi, nang lé jòqtoq hkyuî pé byi mù,
gyi hkôdòq pé byi râ nghut luî,
nàng gi, byù myû myo myo lé bàt hkyop pyám râ nghut lhê.” ga Yhûmsîng Garai taî ri.
Nàng gi, yhángmòq é ashop é dông wó é sùtzè lé, haû Yhûmsîng Garaî é matú,
yhángmòq wó é zè pé lé, myìdàm htoq bànshoq é Yhûmsing é matú,
àp nhong pyám râ nghut lhê.