Isira-elaq Byu Pé Htên Byòq Hui Râ Hkyô
9
Ngò gi, hkungga gyàp nàm má Yhûmsîng yàp tô é lé myang ri; Yhang gi,“Zìng pûn pé nún bûm shoq, zìng hpyo pé lé bàt hkyop mù,
shiwa byù bànshoq bâng htoq má hut gyun nhâng keq;
nyi myìt to bang lé gi, Ngò sham èq sat pyám râ nghut lhê.
Rayùq le wó hpâng râ a nghut;
rayùq le wó lùt râ a nghut.
2 Yhángmòq gi, mosumhkung jé shoq dong du kôlhang,
Ngá é lòq gi, yhángmòq lé haú mai she htoq yû râ nghut lhê;
yhángmòq gi, mauhkûng htoq má dòq ló kôlhang,
Ngò gi, yhángmòq lé haú mai lhoqhkyô yù râ nghut lhê.
3 Yhángmòq gi, Hkarimela bùm gùng má haq to kôlhang,
Ngò gi, yhángmòq lé haú mai châng ho chyup htoq râ nghut lhê.
Yhángmòq gi, Ngá é myòq hí mai wó hpang lùt râ matú,
wuìshuq lung-aû chuq má haq tô bùm kôlhang,
Ngò gi, haú má yhángmòq lé hte râ matú lhângmuì mó lé hkunmó hkyó râ nghut lhê.
4 Yhángmòq gi, yhángmòq é gye pê èq shúm byû dông chyup shuî ló é hui kôlhang,
Ngò gi, haú má yhángmòq lé sat pyám râ matú shâm lé hkunmó hkyó râ nghut lhê.
Ngò gi, yhángmòq lé, jeju byi râ a nghut é za,
dàm byi râ matú wú râ nghut lhê.” ga taî ri.
5 Haû Wum-o a-tsam dìk shoq bò Sû Yhûmsîng Garai nghut é, Yhûmsîng gi,
myìdàm htoq lé záng jáng, haû gi, nyé yuî luî,
haú má nyi é lhúnglhâng bang gi, yón ngau bùm kôrâ nghut lhê;
ra-mau gón gi, Nile Wuìlàng su ûm toq lô mù,
Egutuq ming mâ é wuìlàng su dum kân ló byùq râ nghut lhê;
6 Yhang gi, mauhkûng htoq má Yhâng é yhûm mó lé saí mù,
myìdàm htoq é a-pûn awang lé xuq tô ri;
Yhang gi, wuìshuq lung-aû mâ é wuì lé wùt yû mù,
myìdàm htoq má hut hkyô kat ri;
Yhâng é myìng gi, Yhûmsîng Garai nghut ri.
7 “Isira-elaq byu pé ê, núngmòq gi,
Ngá é matú Hkusha byu pé su nghut lhê, a nghut kó lhí?” ga,
haû Yhûmsîng Garai taî pyo ri.
“Ngò gi, Isira-elaq byu pé lé Egutuq ming mai,
Hpilisiti byu pé lé Hkaptora ming mai,
Aram byu pé lé Kira ming mai, shuî htoq lo é nghut lhê, a nghut lhí?
8 Gè gè yhang, haû Ahko Ahkáng lhúnglháng wó Sû Yhûmsîng Garai Ngò gi,
yubàk mara bo é mîngdán lé wú nyi é nghut mù,
haú lé myìdàm htoq mai lhoqhtên pyám râ nghut lhê;
nghut kôlhang, Ngò gi, Yakup é awùt ashîn pé lé,
chyut yhang lhoqhtûm pyám râ a nghut.” ga,
haû Yhûmsîng Garai taî pyo ri.
9 “Hkâsu mù gâ le, Ngò gi, hkunmó hkyó râ nghut mù,
chîn lé shaí má shaî é su,
gótû byù myû wuì bànshoq bâng chyáng Isira-elaq byu pé lé shaí râ nghut lhê;
chînjap lháng myigùng má gyó râ a nghut.
10 ‘Dìk shoq hpu zo hkyô gi, ngá-mòq lé châng hkyit râ a nghut,
ngá-mòq eq hui râ le a nghut.’ ga taî é,
Ngá é byu pé mâ é yubàk dàp bang bànshoq gi,
sham èq shî kôrâ nghut lhê.
Isira-elaq Byu Pé Dum Kô Myhang Lo É Hkyô
11 Haú buìnyì má,
Ngò gi, Dawiq é lêng gyòp byùq bê lùmhkaû jowò lé dum xuq râ nghut mù,
hau é byòq byùq bê wàhkûm pé lé saî saí luî,
byòq yèq tô é lé saî saí râ nghut mù,
hí lhê su yhang, haú lé saî saî to râ nghut lhê;
12 haû jáng, Isira-elaq byu pé gi,
Edom mau mâ é nyi myìt tô é bang lé le,
gótû byù myû wuì bànshoq mâ é Ngá é myìng wùn bang lé le,
wó sing yù râ nghut lhê.” ga,
haú hkyô lé kut râ Sû Yhûmsîng Garai taî pyo ri.
13 Haû Yhûmsîng Garai taî pyo é gi,
“Yò hpuq sû gi, kyô shu sû lé, tsibyiq nâng pyeq sû gi, ho sû lé,
wó hkyit lhûm é buìnyì pé jé râ nghut lhê.
Tsibyiq wing asik gi, bùm pé mai yui htoq râ nghut mù,
shi wing gi, kong pé mai yui htoq râ nghut lhê.
14 Haú hkûn, Ngò gi, Ngá é Isira-elaq byu pé lé, shúm zung é mai shuî htoq lô râ nghut lhê.
Yhángmòq gi, byòq yèq to bê é wà pé lé saî xuq mù, haú má nyì kôrâ nghut lhê.
Yhángmòq gi, tsibyiq hkyâm pé saí mù, tsibyiq wing pé shuq kôrâ nghut luî,
hkyâm pé saí mù, haú mâ é ashi pé zo kôrâ nghut lhê.
15 Ngò gi, Isira-elaq byu pé lé, yhángmòq é maumyî má xuq to râ nghut mù,
Ngò, yhángmòq lé byî tô é maumyî mai,
yhángmòq lé hkâ-nhám le dum nut htoq pyám râ a nghut lo.” ga,
núngmòq é Garai Gasang nghut é, haû Yhûmsîng Garai taî ri.