Edom Mau Lé Htuqhtîng É Myìqhtoi Dang
35
Haû Yhûmsîng Garaî é mungdang ngá chyáng jé é gi, 2 “Byù zo ê, Se-ira Bùm shut myòqdong hû mù, haú lé htuqhtîng é myìqhtoi htoi aq; 3 haû mù, ‘Haû Ahko Ahkáng lhúnglháng wó Sû Yhûmsîng Garai shî su ga taî ri; Se-ira Bùm ê, Ngò gi, nang lé htuqhtîng lhê; Ngò gi, Ngá é lòq lham luî, nang lé htuqhtíng mù, nang lé chamchyuîyuì tô sâ to râ nghut lhê. 4 Ngò gi, náng é wà pé lé htên byòq nhâng râ nghut mù, nàng gi, chamchyuîyuì dùt to râ nghut lhê. Haú hkûn, Ngò gi, haû Yhûmsîng Garai nghut é lé, nàng sé râ nghut lhê.5 Nàng gi, Isira-elaq a-myû lé góhkûn mai a naù a wom dùt nyì mù, yhángmòq é yubàk marâ é matú ló htâng é mara dam byî é hui zo râ ahkyíng nghut é, wuîhke jamjau hpu zô é u má, yhángmòq lé shâm má àp pyám bê nghut é yánmai, 6 Ngò rû dui nyi é eq rajung za, Ngò gi, nang lé, byù sat sui shûn hkyô má àp byî pyám râ nghut mù, byù sat sui shûn hkyô gi, nang lé châng hkat râ nghut lhê; nàng gi, byu sat sui shûn hkyô lé a nguì a kut é yánmai, haû gi, nang lé châng hkat râ nghut lhê; haû Ahko Ahkáng lhúnglháng wó Sû Yhûmsîng Garai shî su ga taî pyo ri. 7 Ngò gi, Se-ira Bùm lé, chamchyuîyuì tô sâ pyám râ nghut mù, haú mai ê ê lò lò kut é bang lé lhoqhtûm pyám râ nghut lhê. 8 Ngò gi, náng é bùm pé má byù màng lhoqpyíng râ nghut lhê; sham èq sat huî é bang gi, náng é kong pé má le, náng é langhkaû pé má le, náng é langhkung bànshoq má le, lêng lèq tô bùm râ nghut lhê. 9 Ngò gi, nang lé, ahtum abyùq chamchyuîyuì kut pyám râ nghut lhê; náng é wà pé má gi, byù nyì râ a nghut. Haú hkûn, Ngò gi, haû Yhûmsîng Garai nghut é lé, nàng sé râ nghut lhê.
10 Ngò, Yhûmsîng Garai gi, mîngdán haû í lhuma má nyi tô é nghut kôlhang, “Byù myû shî í myû eq mîngdán shî í lhum gi, ngá-nhûng é dùt byùq râ nghut mù, ngá-nhúng haú pé lé sing yù râ nghut lhê.” ga nàng taî é yánmai, 11 Ngò rû dui nyi é eq rajung za, Ngò gi, nàng yhángmòq lé a nguì mù, nàng tûn shit é, mânon é hkyô eq nhikjum yô é hkyô má cháng luî, nang lé lató hpuq râ nghut lhê; nang lé Ngò târâ jéyáng é hkûn, Ngá gûng Ngò, yhángmòq lé htoq shit râ nghut lhê; haû Ahko Ahkáng lhúnglháng wó Sû Yhûmsîng Garai shî su ga taî ri. 12 Haú hkûn, “Isira-elaq bùm pé gi, tô sâ tô é hui bê nghut mù, zô myui pyám râ matú ngá-nhúng lé byî tô bê nghut ri.” ga, bùm haú pé lé htuqhtíng mù, nàng rhoî dang taî é bànshoq lé Ngò, Yhûmsîng Garai wó gyo bê nghut é hkyô lé, nàng sé râ nghut lhê. 13 Núngmòq gi, Ngo lé htuqhtîng é dông nghutbun dang taí luî, a nô pyâm é za Ngo lé htuqhtîng é dang taî akô nghut ri; haú hkyô pé lé Ngò wó gyo bê nghut lhê. 14 Haû Ahko Ahkáng lhúnglháng wó Sû Yhûmsîng Garai shî su ga taî ri; myìdàm htoq gón gabú byam chyû nyì kô é u, Ngò gi, nang lé chamchyuîyuì kut pyâm to râ nghut lhê. 15 Nàng gi, Isira-elaq é silî wunlî maumyî chamchyuîyuì dùt byùq é hkûn, gabú byam chyu bê nghut é yánmai, Ngò gi, haû eq rajung za nang lé kut pyám râ nghut lhê. Se-ira Bùm ê, nàng eq Edom mau gón gi, chamchyuîyuì dùt byùq râ nghut lhê. Haú hkûn, Ngò gi, haû Yhûmsîng Garai nghut é lé, yhángmòq sé kôrâ nghut lhê.’ nghû taí aq.” gâ ri.