27
Nàpmá eq séng luî,nghutbun dang hkâtaí;
hkâsu mù gâ le, ra-nyí hkaû má
haî dùt lò râ lé lháng nàng a sé nghut ri.
2 Yhûmsing gùng yhûmsing é nhut mai a hkya-ôn é za,
góyùq shèq hkya-on sháng gàq;
yhûmsing é nhutwuî mai a nghut,
gótû rayùq shèq hkya-on sháng gàq.
3 Lùqgòk gi, lai luî,
se-muî gi, wòlai dùt kôlhang,
nghâ sû nhik soq sup é gi,
haû í ja htoq má je yhang laî ri.
4 Nhikjum yô é gi, ashop é dùt mù,
nhikmó-yô é gi, ladu laî byùq ri;
nghut kôlhang, manôn hkyô lé gi,
ó yùq wá wó ûng râ lhú?
5 Haq chyitdàp nyi é htoq má,
de de mhoqshit le gi, je ge ri.
6 Luzúm rayùq dàm tap byî é gi, jujúm myìt nghut ri;
nghut kôlhang, gyè hpó gi,
bo-puq myo myo puq byî mhaû ri.
7 Zô gyî to bê sû gi,
byo-î lé lháng a ron lo nghut ri;
zò-mut sû gi, hkô é zô le lháng,
chuî nghâm é wó gyô ri.
8 Yhâng é yhûm mai
sô nghoq ló byùq é byù rayùq gi,
nghoqsut mai dâng nghoq ló byùq é nghoqzo eq du ri.
9 Namngón xû eq namngón jung a-mùn gi,
i‑myìt lé lhoqngón byî é su,
sansêng é myìt mai hpàqchyî sê byî é,
luzúm hpô é nguì ngón chyitdàp myìt gi,
i‑myìt lé lhoqnguî ngón nhang ri.
10 Náng é luzúm eq náng wâ é luzúm lé,
hkâkâng pyâm to;
nàng wuîhke jamjau hui zô é hkûn,
nunggu nungmâng yhûm má hkâ-ê;
náng nâm mâ é yhûmkyochang gi,
we we má nyi tô é gu-mang hpô htoq je ge ri.
11 Ngá zo ê, hpàqchyî bò mù,
ngá é i‑myìt lé gabú nhâng àq;
haû jáng, ngò gi, ngo lé wú tiq é yùq hkangmó lé,
wó tû taí râ nghut lhê.
12 Nhik gying sû gi, wuîhke hkyô lé myàng mù,
haq koi pyâm ri; nghut kôlhang,
ngòk sû gi, haú shut xoq sô ê mù,
ihkyùp ê hui zô ri.
13 Byù bíng lé chyîn wò bo yù su é buhîng lé, yu pyám byi aq;
maigan myhí lé wò bo yù su chyáng mai,
danghtum htûm tô é zè yu chung to aq.
14 Nàpsûn noq le toq mù, yhâng é yhûmkyochang lé,
htê mó èq shimân dang taí sû gi,
nhîng é dông sôn pyám râ nghut lhê.
15 Mabyòq htoq nau é i-kun myhí gi, maú wo é nyí lé,
zòq zòq gyó nyi é maucham su nghut nyi ri.
16 Yhang lé lhoqzîm wú é gi,
laì lé lhoqzîm é su le,
lòq èq xû lé kyaq zuî é su le nghut nyi ri.
17 Jòqtoq yhangchang suî htoq lhûm é su,
byù le rayùq eq rayùq lhoqkûng lhûm é nghut lhê.
18 Hkohúm gâm lé wú gôn é sû gi,
hkohúm-shi myàng zo râ nghut lhê;
yhûmsîng hpó lé wú gôn é sû gi,
xânghpoq nge wó râ nghut lhê.
19 Wuì gi, yhûmsing myòqdong lé
myàng nhang é su,
byù rayùq é i‑myìt gi, yhang hkâsû é nghut é lé
wó myâng nhang ri.
20 Mosumhkung eq htên byòq hkyô gi,
hkâ-nhám le nhik dìk a sê é su,
byu é myòqjí le, hkâ-nhám lháng nhik dìk a sé nghut ri.
21 Ngùn lé gi, bunghkyûng mai jên yu ri;
hîng lé gi, myi-au mai jên yu ri;
nghut kôlhang, byù lé gi,
hkya-ôn é dông mai chyam wú é nghut lhê.
22 Nghâ sû lé, nàng,
xûm má gùq eq rahá htung kôlhang,
yhang ngha é hkyô lé
wó htûng hkyut pyám byi râ a nghut.
23 Náng é sau hpûng é hkyô lé rago sé shoq kut mù,
náng é no myang lé rago wú zúng aq.
24 Hkâsu mù gâ le, sùtzè wó é hkyô gi,
ahtum abyùq wó gingtîng nyi é a nghut;
xânghpoq nge wó jánmaú gi,
pyàt bán hkangmó wó jòq gîng nyi é a nghut.
25 Mhan lé yâm yù jáng,
mhan nú dum nyún lô mù,
bùm mâ é mhan-haq hpoqnòq wó yâm tsîng yu é hkûn,
26 sau pé gi, náng é mèbû é matú nghut mù,
bainám pé gi, náng é yò hpau dùt râ nghut lhê.
27 Náng é matú le, náng é yhûmbyù wui matú le,
náng é langchyáng myhî pé é matú le,
bainám naú lùq shoq nàng wó râ nghut lhê.