Su-myi Sulàng Lú Hkyô Eq Séng Luî Sidìq Byî É Hkyô
5
Ngá zo ê,ngá é hpàqchyî byéng-yá lé,
myìt lòm tung tâm gyo mù,
ngá é myìt bóng dang pé lé,
rago yhang gyo yù àq;
2 haû nghut jáng, nàng gi,
náng é ge myìt hpyit a-tsam lé,
wó chung zing to mù,
náng é nhutwuî má,
hpàqchyî wó hkong to râ nghut lhê.
3 Hkâsu mù gâ le,
shiwa myhî é nhutwuî mai,
byo-î duî gyó nyî mù,
yhâng é dang gi,
xu htoq chyut é nghut ri.
4 Nghut kôlhang, ló htáng má,
yhang gi, sanghko su yhang hkô é
hpuzo mù, shámsó í shut htoq é shâm su, htoq râ nghut lhê.
5 Yhâng é hkyî gi,
shî‑nò hkyô shut gyó ló mù,
yhâng é hkyîbyè gi,
mosumhkung shut nyâng za
shuî e ló ri.
6 Yhang gi, chyungxe duì hkyô lé,
myìt lháng a myìt wú nghut ri;
yhâng é hkyô pé gi,
agoí agùq nghut kôlhang,
yhang gi, haú pé lé a sé nghut ri.
7 Haû mù, ahkuî, ngá zô pé ê,
ngá é dang lé gyo keq;
ngò taî é dang mai,
hkâlhik ló byùq kó.
8 Haû sû é myiwe lé,
we we mai koi pyám aq;
yhâng é hkum yâm shut,
hkâchyâng ê;
9 haû a nghut jáng, nàng gi,
náng é wum-o a-tsam mó lé,
góyùq chyáng àp byî pyâm é dùt mù,
náng é chyungxe zànwut lé,
byù jûm chyáng,
àp byî pyâm é dùt râ nghut lhê;
10 byù bíng pé gi, náng é sùtzè mai,
nyì ngón yùqyò kômù,
gótû yùqge é yhûm bang gi,
nàng zuî hkyik tô é mai,
wó bûm kôrâ nghut lhê.
11 Náng é i-pyàt htûm ló nyî mù,
náng é gùngsho eq,
gùngdu wôm ló nyi é hkûn,
nàng iyon yon luî,
12 “Ngò gi, mhoqshit é dang lé,
a nguì kut pyám bu‑nhung lhî!
Ngá i‑myìt nhiklhum gi,
lhoqjo lhoqdíng byî é dang lé,
he-ngìk pyám bê myhî-nhung lhî!
13 Ngò gi, ngá é sará pê dang lé,
a cháng kut mù,
ngo lé mhoq kyo bâng é dang lé,
a gyo kut pyâm é nghut lhê.
14 Ngò gi, shiwa hpông é agùng má,
htên byòq râ za nghut byùq bu‑nhung!”
ga taí râ nghut lhê.
15 Yhûmsing é wuì tíng dong mâ é wuì eq,
yhûmsing é wuìbúm mâ é wuì lé,
shuq nyî àq.
16 Náng é wuìlàng zo mâ é wuì lé,
byù zîng é jowò má yui myín nhâng râ lhú?
Náng é wuìlàng pé mâ é wui lé,
shiwa byù zîng é jang pé má,
yui myín nhâng râ lhú?
17 Haú pé gi, náng é za nghut nyî sháng gàq,
góbang eq hkâ-nhám le hkâhúm nhâng.
18 Náng é wuìbúm gi,
shimân byî é hui sháng gàq;
nàng gi, náng é zorâm pyàt hkun é,
yhûmsîng myhí eq gabú byam chyû nyì sháng gàq.
19 Yhang gi, chyitdàp é xat pyá zo su le,
jeju byî é xat zîng su le nghut nyî mù,
yhâng é naú èq, hkâ-nhám le,
nang lé nhik lhoqdìk byi sháng gàq;
yhâng é chyitdàp myìt èq, hkâ-nhám le,
nang lé lângnghoq yu nyì sháng gàq.
20 Ngá zo ê, haî mù, shiwa myhî èq,
nang lé shúm kut yu nyi lhê lhú?
Haî mù, nàng gi,
góyùq yhang myî é tanghkoí má,
po lèq nyi lhê lhú?
21 Hkâsu mù gâ le,
byù rayùq é hkyô pé bànshoq gi,
haû Yhûmsîng Garaî é
myòq hí má chyat nghut mù,
Yhang gi, haú yùq é hkyô
bànshoq lé chyam lìk wú ri.
22 Agè ashop su é agè ashop é múzó gi,
yhang lé yhang nhê yù mù,
yhâng é yubàk tui pé gi,
yhang lé tuî zing tô râ nghut lhê.
23 Yhang gi, mhoqshit é a hkam yu é yánmai,
shi byùq râ nghut mù,
yhûmsîng lûm ngòk luî,
sô nghoq byùq râ nghut lhê.