Gyung So Laiká 33

Isira-elaq Byù Pê É Gyunghkyô Pé

Mosheq eq Arun shuî-û é a-ô má ahpúng hpúng kut luî, Egutuq ming mai htoq lo é Isira-elaq byu pê é gyunghkyô pé gi, a-ô mâ é eq rajung za nghut lhê. 2 Mosheq gi, haû Yhûmsîng Garai hkunmó hkyô tô é eq rajung za, yhángmòq é gyunghkyô abun pé lé tsing kâ hkyô tô ri. Yhángmòq é gyunghkyô pé gi, a-ô mâ é eq rajung za nghut lhê.

3 Isira-elaq byu pé gi, Lhoqlhai Poî htang nyí, sânghî lhôhkyap raxe ngo nyí nyí má, Ramese wà mai, Egutuq byù bànshoq bâng é myòq hí mai a gyùq a kyûm yhang yán htoq lô bekô nghut ri. 4 Haú u lé, Egutuq byu pé gi, haû Yhûmsîng Garaî èq sat pyám byî é yhángmòq é zo-mún bànshoq lé myhup yhûm nyi bum akô nghut ri. Haû Yhûmsîng Garai gi, yhángmòq é hparà pé lé lháng ung pyám bê nghut ri.

5 Haû Isira-elaq byu pé gi, Ramese wà mai htòt mù, Suhkut má wàp xuq akô nghut ri. 6 Yhángmòq gi, Suhkut mai htòt mù, yòso ló htâng é mâ é Ehtam má wàp xuq akô nghut ri. 7 Yhángmòq gi, Ehtam mai htòt mù, Balaq Zehpon é buìhtoq hkyam shut mâ é Pi Hahirot shut lhing taû lé luî, Migidola nàm má wàp xuq akô nghut ri. 8 Yhángmòq gi, Pi Hahirot mai htòt mù, nhông agùng mai laî byìt luî, yòso má jé kômù, Ehtam Yòso má sum nyí sô é htâng, Mara má wàp xuq akô nghut ri. 9 Yhángmòq gi, Mara mai htòt mù, Elim má jé akô; Elim jowò má wuìbúm raxe í búm htoq mù, byùm gàm nyhit xê gàm yùq é nghut luî, haú má wàp xuq akô nghut ri.

10 Yhángmòq gi, Elim mai htòt mù, Nhông Nè yàm má wàp xuq akô nghut ri. 11 Yhángmòq gi, Nhông Nè mai htòt mù, Sin Yòso má wàp xuq akô nghut ri. 12 Yhángmòq gi, Sin Yòso mai htòt mù, Dophka má wàp xuq akô nghut ri. 13 Yhángmòq gi, Dophka mai htòt mù, Alusha má wàp xuq akô nghut ri. 14 Yhángmòq gi, Alusha mai htòt mù, Rehpidim má wàp xuq akô; haû gi, shiwa byu pé shuq râ wuì a jòq é jang nghut ri.

15 Yhángmòq gi, Rehpidim mai htòt mù, Sinaq Yòso má wàp xuq akô nghut ri. 16 Yhángmòq gi, Sinaq Yòso mai htòt mù, Kibrot Hatawa má wàp xuq akô nghut ri. 17 Yhángmòq gi, Kibrot Hatawa mai htòt mù, Hazerot má wàp xuq akô nghut ri. 18 Yhángmòq gi, Hazerot mai htòt mù, Ritma má wàp xuq akô nghut ri. 19 Yhángmòq gi, Ritma mai htòt mù, Rimon Perezi má wàp xuq akô nghut ri. 20 Yhángmòq gi, Rimon Perezi mai htòt mù, Lipna má wàp xuq akô nghut ri. 21 Yhángmòq gi, Lipna mai htòt mù, Risa má wàp xuq akô nghut ri. 22 Yhángmòq gi, Risa mai htòt mù, Kehelahta má wàp xuq akô nghut ri. 23 Yhángmòq gi, Kehelahta mai htòt mù, Shehpa Bùm má wàp xuq akô nghut ri. 24 Yhángmòq gi, Shehpa Bùm mai htòt mù, Harada má wàp xuq akô nghut ri. 25 Yhángmòq gi, Harada mai htòt mù, Mahkelot má wàp xuq akô nghut ri. 26 Yhángmòq gi, Mahkelot mai htòt mù, Tahat má wàp xuq akô nghut ri. 27 Yhángmòq gi, Tahat mai htòt mù, Tera má wàp xuq akô nghut ri. 28 Yhángmòq gi, Tera mai htòt mù, Mithka má wàp xuq akô nghut ri. 29 Yhángmòq gi, Mithka mai htòt mù, Hashimona má wàp xuq akô nghut ri. 30 Yhángmòq gi, Hashimona mai htòt mù, Moserot má wàp xuq akô nghut ri. 31 Yhángmòq gi, Moserot mai htòt mù, Bene Yakan má wàp xuq akô nghut ri. 32 Yhángmòq gi, Bene Yakan mai htòt mù, Hora Hagitgat má wàp xuq akô nghut ri. 33 Yhángmòq gi, Hora Hagitgat mai htòt mù, Yobahta má wàp xuq akô nghut ri. 34 Yhángmòq gi, Yobahta mai htòt mù, Abrona má wàp xuq akô nghut ri. 35 Yhángmòq gi, Abrona mai htòt mù, Ezi-on Gebera má wàp xuq akô nghut ri. 36 Yhángmòq gi, Ezi-on Gebera mai htòt mù, Zin Yòso mâ é Kadesha má wàp xuq akô nghut ri. 37 Yhángmòq gi, Kadesha mai htòt mù, Edom maukyo mâ é Hora Bùm má wàp xuq akô nghut ri.

38 Haû Isira-elaq byu pé Egutuq ming mai htoq lo é htâng myi xê zan zàn, lha-mó ngo hkyap hkyap, lhôxân nyí má, hkyangjong Arun gi, haû Yhûmsîng Garai hkunmó hkyô é eq rajung za Hora Bùm má dòq ló luî, shi byùq bê nghut ri. 39 Arun gi, Hora Bùm má shi byùq é hkûn, chyungxe zànwut 123 zân bò bê nghut ri.

40 Haú hkûn, Hkanan Maupyî Mau má nyi é, Arat wà mó mâ é Hkanan byù hkóhkâm hpó gi, Isira-elaq byu pé jé dòq lo nyi é hkyô lé wó gyô ri.

41 Haû Isira-elaq byu pé gi, Hora Bùm mai htòt mù, Zalamona má wàp xuq akô nghut ri. 42 Yhángmòq gi, Zalamona mai htòt mù, Punon má wàp xuq akô nghut ri. 43 Yhángmòq gi, Punon mai htòt mù, Obot má wàp xuq akô nghut ri. 44 Yhángmòq gi, Obot mai htòt mù, Moba maukyo mâ é Iye Abarim má wàp xuq akô nghut ri. 45 Yhángmòq gi, Iye Abarim mai htòt mù, Dibon Gat má wàp xuq akô nghut ri. 46 Yhángmòq gi, Dibon Gat mai htòt mù, Alamon Diplatim má wàp xuq akô nghut ri. 47 Yhángmòq gi, Alamon Diplatim mai htòt mù, Nebo bùm nàm mâ é Abarim bùm pé má wàp xuq akô nghut ri. 48 Yhángmòq gi, Abarim bùm mai htòt mù, Yerihko tû-tap, Yodan làng yàm mâ é Moba pá má wàp xuq akô nghut ri. 49 Yhángmòq gi, Moba pá haú má, Yodan làng yàm cháng luî, Bet Yeshimot mai Abela Shitim jé shoq wàp xuq akô nghut ri.

50 Haû Yerihko tû-tap, Yodan làng yàm mâ é Moba pá má, Yhûmsîng Garai mai Mosheq taî é gi, 51 “Isira-elaq byu pé lé dang nyô mù, yhángmòq lé, ‘Núngmòq gi, Yodan làng gû dàp mù, Hkanan mau má wang ló é hkûn, 52 haú mau má nyi é byù bànshoq lé núngmòq é hí mai hkat htoq pyám keq. Yhángmòq kyûng tô é azòng pé lé le, yhángmòq nyhê yui saî htoq tô é hparà lhô pé lé le, bànshoq lhoqhkyop pyám mù, yhángmòq é myhang é hparà noq jowò pé bànshoq lé le lhoqhtên pyám keq. 53 Ngò gi, núngmòq sing yù râ matú maumyî haû byî to bê nghut é yánmai, núngmòq gi, maumyî haú lé sing yù mù, haú má nyì keq. 54 Núngmòq é a-myû koq má cháng mù, hkyîn shosé shê luî, maumyî haú lé gàm keq. Byù myô é koq lé gi, silî wunlî maumyî myo shoq gàm byi mù, byù shaû é koq lé gi, shau za gàm byi keq. Ó yùq le, hkyîn shosé she âng é eq rajung za maumyî myang gàm yù râ nghut lhê. Núngmòq é îchyí îwâ pê é a-myû up pé má cháng luî, maumyî haú lé gam yù keq.

55 Nghut kôlhang, haú mau má nyi é bang lé núngmòq a hkat htoq pyâm é nghut jáng, núngmòq nyì nhang tô é haú bang gi, núngmòq é myòq má zû kyâng nho é myòqwàng eq núngmòq é nàmcham má htaû kyâng nho é su dùt kôrâ nghut lhê. Yhángmòq gi, núngmòq nyi é mau má núngmòq lé gyè taû kut lô kôrâ nghut lhê. 56 Haú hkûn, Ngò gi, yhángmòq lé kut râ nghû hen tô é hkyô, núngmòq lé kut râ nghut lhê.’ nghû àq.” ga taî ri.