Yodan Làng Buìhtoq Hkyam Shut Mâ É A-myû Up Pé
32
Rubin up bang eq Gat up bang gi, no hpúng eq sau bainám hpúng pé gyai myo kô é nghut mù, Yazera maumyî eq Gile-at maumyî má shigu gaunyhaû pê é matú mhan yô htuk é lé myàng kôjáng, 2 Mosheq, hkyangjong Ele-aza eq shiwa byù hpúng é ushuq pê chyáng lé kômù, 3-4 “Isira-elaq byu pê hí má haû Yhûmsîng Garai lhoqhtên pyâm é wà pé nghut é, Atarot, Dibon, Yazera, Nimra, Heshibon, Ele-ale, Sebam, Nebo eq Be-on pé gi, shigu gaunyhaû pê é matú mhan yô htuk ri; náng é duìnhâng zoshâng wuì ngá-mòq gi, shigu gaunyhaú myô lhê. 5 Náng é hí má ngá-mòq myòqdong wó é nghut jáng, náng é duìnhâng zoshâng ngá-mòq lé maumyî shí pé sing yù nhâng laq. Ngá-mòq lé Yodan làng hé hpoq shut hkâshuî dàp ló lo.” ga dûng akô nghut ri.6 Haû mù, Mosheq gi, Rubin up bang eq Gat up bang lé, “Núngmòq é gu-mang wuì Isira-elaq byu pé majan ê zân nyi é u, núngmòq gi, shî má nyi gyó to kôrâ lhú? 7 Núngmòq gi, haî mù luî, Isira-elaq byu pé lé, haû Yhûmsîng Garai byî é maumyî shut dàp ló râ má myìt wum châng lhoqhkyui byî akô lhú? 8 Núngmòq é îchyí îwâ pé le, maumyî shî lé ê wú râ matú, Kadesha Barine-a mai yhángmòq lé nhang kat é hkûn shî su kut bekô nghut ri. 9 Yhángmòq gi, Eshihkola Langhkaû má dòq ê kômù, maumyî shî lé byu wú kô é htâng má, Isira-elaq byu pé lé, haû Yhûmsîng Garai yhángmòq lé byî é maumyî shut wang ló râ má myìt wum lhoqhkyui byî kô é nghut lhê. 10 Haú nyí, Yhûmsîng Garai nhikjum yo luî, dâkam é gi, 11-12 ‘Haû i-myìt nhiklhum bànshoq èq Yhûmsîng Garaî htâng cháng su nhik nghut é, Kenizi koq mâ é Yehpuna é yhang zo Hkalep eq Nun é yhang zo Yoshuq mai lai luî, Egutuq ming mai htoq lo é bang mâ é, í xê zàn bò bê é rayùq lháng, Abraham, Isak eq Yakup lé Ngò danghtum htûm tô é maumyî lé wó myâng kôrâ a nghut; hkâsu mù gâ le, yhángmòq gi, i-myìt nhiklhum bànshoq èq Ngá htâng a cháng kó nghut ri.’ gâ ri. 13 Haû Yhûmsîng Garai gi, Isira-elaq byu pé lé nhikjum yô é nghut mù, Yhâng é hí má agè ashop hkyô kut é bang lhúnglháng htûm byùq shoq, yhángmòq lé myi xê zàn yhang yòso má yông lhing wún nhang ri.
14 Ahkuî le, Isira-elaq byu pé lé haû Yhûmsîng Garai je riyhang nhikjum yo râ dông, je agè ashop hkyô kut é bang núngmòq gi, núngmòq é îchyí îwâ pê é hkô má yàp to bekô nhung lhî! 15 Yhâng htâng châng é mai núngmòq hkyô nghoq ló byùq é nghut jáng, Yhang gi, byù shí bang bànshoq lé yòso má radàm dum tô pyâm to râ nghut mù, núngmòq gi, yhángmòq lé lhoqhtên pyâm é bang dùt byùq râ nghut lhê.” ga taî ri.
16 Haú hkûn, yhángmòq gi, yhâng chyáng huî lé kômù, “Ngá-mòq gi, shî má, ngá-mòq é shigu gaunyhaú pê é matú hkup pé saí mù, ngá-mòq é myiwe wuì eq zodù wui matú wà mó xuq to nau ri. 17 Nghut kôlhang, ngá-mòq gi, Isira-elaq byu pé lé, yhángmòq nyì râ jowò má shuî jé shoq, majan zan râ matú shâm lhâm chûng mù, yhángmòq é hí má e ló byi râ nghut lhê. Haú u má, ngá-mòq é myiwe wuì eq zodù wui gi, shí mau mâ é byu pê chyáng mai mâgum yu é hui râ matú, gingtîng é wà mó pé má nyi to râ nghut lhê. 18 Ngá-mòq gi, Isira-elaq byu pé bànshoq bang yhángmòq é silî wunlî maumyî lé a wó hàp yù yù, ngá-mòq é yhûm shut taû ló râ a nghut. 19 Ngá-mòq gi, Yodan làng hé hpoq má yhángmòq eq rahá hai silî wunlî maumyî lé le hàp yù râ a nghut; hkâsu mù gâ le, ngá-mòq gi, Yodan làng buìhtoq hkyam má ngá-mòq é silî wunlî maumyî wó bê nghut lhê.” ga taî akô nghut ri.
20 Haû hkûn, Mosheq gi, yhángmòq lé, “Núngmòq gi, haú dông kut mù, majan zan râ matú shâm lhâm chûng luî, haû Yhûmsîng Garaî é hí má e ló mù, 21 haû Yhûmsîng Garai mai Yhâng é gye pé lé Yhâng é hí mai hkat htoq pyâm é hkûn jé shoq, núngmòq shâm lhâm chûng bang bànshoq, haû Yhûmsîng Garaî é hí má Yodan làng hé hpoq shut gû dàp ê kô é nghut jáng, 22 maumyî haú lé Yhûmsîng Garai wó ung yu é hkûn, núngmòq gi, Yhûmsîng Garaî é hí má le, Isira-elaq byu pê é hí má le, wò mai wó lùt luî, maumyî shî má ge taû lò râ nghut mù, haû Yhûmsîng Garaî é hí má maumyî shî lé núngmòq wó sing yù râ nghut lhê.
23 Nghut kôlhang, núngmòq haú dông a kut kô é nghut jáng, núngmòq gi, haû Yhûmsîng Garai lé mara shut kôrâ nghut mù, núngmòq é mara gi, núngmòq lé mara dàm hui zo nhâng râ nghut é lé, hkyak sê to keq. 24 Núngmòq é myiwe wuì eq zodù wui matú wà mó pé xuq mù, núngmòq é sau bainám pê é matú hkup pé saí keq; nghut kôlhang, núngmòq danghtum htûm tô é eq rajung za le kut keq.” ga taî ri.
25 Gat up bang eq Rubin up bang gi, Mosheq lé, “Ngá-mòq é yhûmsîng nàng hkunmó hkyô é eq rajung za, náng é duìnhâng zoshâng ngá-mòq kut râ nghut lhê. 26 Ngá-mòq é zodù wuì eq yhûmsîng myhî pé, ngá-mòq é sau hpúng pé eq no hpúng pé gi, Gile-at mâ é wà mó pé má nyi to kó sháng gàq. 27 Nghut kôlhang, náng é duìnhâng zoshâng ngá-mòq gi, ngá-mòq é yhûmsîng nàng taî é eq rajung za, shâm lhâm chung é yùq hkangmó, majan zan râ matú, haû Yhûmsîng Garaî é hí má gû dàp e ló râ nghut lhê.” ga taî akô nghut ri.
28 Haú hkûn, Mosheq gi, yhángmòq eq séng luî, hkyangjong Ele-aza, Nun é yhang zo Yoshuq eq Isira-elaq a-myû up bâng é yhûmhtu ushuq pé lé hkunmó hkyô ri; 29 haû gi, “Gat up bang eq Rubin up bang mâ é shâm lhâm chung é yùq hkangmó, majan zan râ matú, haû Yhûmsîng Garaî é hí má núngmòq eq rahá Yodan làng gû dàp kô é nghut jáng, núngmòq gi, maumyî haú lé wó sing yu é hkûn, yhángmòq lé Gile-at maumyî sîng nhâng ra râ nghut lhê. 30 Nghut kôlhang, yhángmòq gi, núngmòq eq rahá shâm lhâm chûng mù a bo gû dàp e é nghut jáng, Hkanan mau má, núngmòq eq rahá maumyî sing yù râ nghut lhê.” gâ é nghut ri.
31 Gat up bang eq Rubin up bang gi, “Náng é duìnhâng zoshâng ngá-mòq gi, haû Yhûmsîng Garai taî é eq rajung za kut râ nghut lhê. 32 Ngá-mòq gi, shâm lhâm chûng mù, haû Yhûmsîng Garaî é hí má Hkanan mau shut châng dàp ê râ nghut lhê; nghut kôlhang, ngá-mòq sing yù râ silî wunlî maumyî gi, Yodan làng shí hpoq nghut râ nghut lhê.” ga tû taî akô nghut ri.
33 Haû mù, Mosheq gi, Amori byu pê é hkóhkâm Sihon é mîngdán eq Bashan hkóhkâm Oga é mîngdán lé le, hau é awui ayàm mâ é maumyî eq wàhtum pé lé le, Gat up bang, Rubin up bang eq Yosep é yhang zo Manase koq rahkyam lé àp byî ri.
34 Haû mù, Gat up bang gi, Dibon, Atarot, Aro-era, 35 Atirot Shohpan, Yazera, Yokbeha, 36 Bet Nimra eq Bet Haran pé lé gingtîng é wà dông xuq mù, yhángmòq é sau bainám hpúng pê é matú hkup pé lé saî akô nghut ri. 37 Rubin up bang gi, Heshibon, Ele-ale eq Kiri-ahtim lé saî xuq mù, 38 myìng htaî pyám bê é Nebo, Balaq Me-on eq Sipma pé lé le saî xuq akô. Yhángmòq gi, dum saî xuq to bê wà mó haú pé lé wà myìng htaî myhîng akô nghut ri.
39 Haû Manase é yhang zo Mahkira é awùt ashín pé gi, Gile-at mau má ê mù, haú lé ê ung yù luî, haú má nyi é Amori byu pé lé hkat htoq pyâm akô nghut ri. 40 Haû mù, Mosheq gi, Manase é awùt ashín nghut é, Mahkira a-myû koq lé Gile-at mau byî é nghut luî, yhángmòq gi, haú má nyì bekô nghut ri. 41 Manase é awùt ashín Ya-ira le haú mau mâ é wà pé lé wó sing yù mù, hau pé lé, Hawot Ya-ira ga myhîng ri. 42 Noba ga sû le, Kenat wà mó eq hau é awui ayàm mâ é wà pé lé wó sing yù mù, yhâng é myìng má cháng luî, Noba ga myhîng ri.