2
Nteme ofolek ikpele unyan̄a eyi Awaji onyan̄abe ebilene
1 Eya orọ, îgbe ibe eji egbala chieen̄ etet ikọ chi eji enọbe enye, inyi inu geege ikaben eji ìnan̄a me lek atikọ chi. 2 Mije, Awaji îjeen̄ ibe ke etip ebi osat elookbe ebi nte nte kiji ukot ikaan̄ ìre atikọ, mè isulu ebi ìrọrọ ilọ, mè ebi ìjijit etip ya osusut ògbegbe ema. 3 Ire ikeya, ìre eji ebejeje inwọnọ osusut, ire eji ikpọ ikpele unyan̄a keyi ilọ chieen̄? Okaan̄-ene Jisọs Karais me lek kan̄ odasi isa etip unyan̄a keyi inilook ebi ene, sabum ebi ìnọnọ me otu kan̄ enirọ inye inyi eji ibe ke unyan̄a ya ìre atata. 4 Awaji me lek kan̄ si îrọ inye ibe ke unyan̄a ya ìre atikọ, sa me inu ukechieen̄, mè uyeke uyeke inu, mè unye ikwaan̄ òkup esese esese echi îrọbe, mè uche echi Ekwukwu Mbuban ochebe inyi ebi ene, me ene me ene, ubọk òneme ọmọ.
Jisọs onyan̄a ebilene, inyi enekpulu linyọn̄
5 Ìkare ebi osat ke Awaji osun̄ ibe enekpulu linyọn̄ eyi òkinu me isi, eyi eji ekitumu ikọ ofolek. 6 Ire, ege me ere ge me Ikpa Mbuban ibe,
“Ìre keke ke ogwu ebilene ore,
eyi owu okikeek inu ofolek kan̄?
Sà ìre gwun̄ ebilene ikike ke owu okikpọ chieen̄ me lek ikeyi?
7 Owu orom ọmọ isiki me irek sọnja igak ebi osat,
mè ikwuun̄ ọmọ okpibot ubọọn̄ eyi ujamgbugbo mè itọn̄,
8 mè irọ ọmọ ogwu òkikpulu otutuuk inu geelek.”a
Mije Awaji orọbe ọmọ ogwu òkikpulu otutuuk inu, ìsibi ibe ke kpunu inu geege eyi Awaji ikatapge me irak kan̄. Ire, me mgbọ keyi, eji mîmun̄ ibe ke ìkare otutuuk inu ke ebilene ekikpulu. 9 Awaji îrọ mè Jisọs Karais isiki igak ebi osat sọnja mgbọ, inyi inikwu mkpa mije otutuuk ebilene sa me atata nnwọn eyi Awaji. Eji mîmun̄ ibe ke Awaji îkwuun̄ ọmọ okpibot ubọọn̄ eyi ujamgbugbo mè itọn̄, mije mkpa ya eyi ọmọ okwube.
10 Otutuuk inu geelek ìnan̄a me ubọk Awaji ogwu òrorom ema inyi lek kan̄. Eya orọ, îgbe, mè itat ibe Awaji isa owuwa ufialek irọ inyi Jisọs Karais iso ifuk, inyi owuwa ebi ene enekana bọn Awaji, mè egọọk ekaan̄ uche me lek ujamgbugbo eyi Awaji sa me lek kan̄. Mije, Jisọs Karais ore ogwu òkinyan̄a ene. 11 Jisọs Karais, ogwu òkirọ inyi ene ikup me mbuban, melek ebi ọmọ okirọ inyi ekup me mbuban, ìre bọn Ute ge. Eya orọ, esip ìkakitet ọmọ igwegwen ema ebi ngwan̄ kan̄. 12 Ikeya ke îtumu inyi Awaji ibe,
“Emi mâtumu owu isibi inyi ebi ngwan̄ n̄a,
mâkọt okwa itọn̄ owu me isi otutuuk ebi ntitiin̄.”b
13 Îtumu si ibe,
“Emi mâtoon̄ ejit me lek Awaji,”c
mè itumu si ibe,
“Kpọ, emi ire ogwu, melek nsabọn Awaji onyibe emi.”d
14 Ubọk ebi Jisọs ogwenbe nsabọn cha erebe ebi ìkakaan̄ akpalek mè eje ikike, Jisọs îgọọk si ema ikaan̄ akpalek ebilene, inyi ọmọ ikwu mkpa, mè isa me mkpa kan̄ ijijaka Yọk, ogwu òkakaan̄ unye eyi mkpa, 15 mè isa me ikeya irọ inyi otutuuk ebi ìkitet ukpook mkpa me otutuuk ugwem kiban̄ esibi me usun̄, mè ekaan̄ lek kiban̄. 16 Me atikọ, ìkare ebi osat ke Jisọs okirọ inu chi isa itap ubọk inyi. Îre bọn owot iman kè Ebereyam ke îkitap ubọk inyi. 17 Mije keyi, îgbe ibe ọmọ ikana ikup ubọk ebi ngwan̄ kan̄ ekupbe me oniin̄ geelek, inyi ọmọ ikana ogwu òban Awaji, ogwu ògbegbe utoon̄-ejit me isisi ikwaan̄ inyi Awaji, mè ikikaan̄ ejit nsan me lek ebilene. Sa me ikeyi ke ọmọ môrọ esuuk me ibot ebilene mije ijo inu kiban̄. 18 Mgbọ keyi, ọmọ môkọt itap ubọk enenen inyi ebi geelek ìkup me emen ntọ-mkpọ, mije, ọmọ me lek kan̄ îbọkọ ufialek mgbọ Yọk otọbe ọmọ ikpọ.