3
Jisọs îmin igak Mosis
1 Eya orọ, bọn Nte n̄a ebi ìkup me mbuban, ebi ìgọgọọk ikaan̄ uche me lek igwen eyi emen inyọn̄, ìkeek inu ofolek kè Jisọs, ogwu òrere ogwu otuchieen̄, mè ogwu òban Awaji ogwu eji echieekbe me lek, mè ikitumu ikọ ofolek. 2 Jisọs îrọ otutuuk inu geelek Awaji ogwu ògogobo ọmọ iria inu obe ọmọ irọ, kubọk Mosis si orọbe otutuuk ikwaan̄ Awaji obe ọmọ irọ me otutuuk emen ototun̄ ukan̄ eyi Awaji. 3 Ogwu ònama uwu okikaan̄ umin igak uwu înamabe. Ikeya si ke Jisọs ogbe ikakaan̄ umin enenen igak Mosis. 4 Mije, uwu geelek, îre ebilene ekinama. Ire, ogwu òkinama otutuuk inu geelek ìre Awaji. 5 Mosis îrọ otutuuk ikwaan̄ geelek Awaji obe ọmọ irọ kubọk ogwu ikwaan̄ me otutuuk ototun̄ ukan̄ Awaji, mè itumu inu ofolek inu Awaji obotumu me mgbọ òkup me isi. 6 Ire, Karais, Gwun̄ ògbegbe utoon̄-ejit, ore ogwu òkikpulu ototun̄ ukan̄ Awaji. Eji ere ebi ototun̄ ukan̄ Awaji ya, mè ire eji itet ikpọchieen̄ ya eyi eji ekisa igugo lek ikaan̄ inye, kpetet ukpook.
Ogwu òkekeke inye melek Jisọs mônin̄ isiki-efuuk eyi Awaji
7 Eya orọ, kubọk Ekwukwu Mbuban otumube,
“Chereyi, ire enyi inọ ida kan̄,
8 ikatet ejit kinyi ìnye, kubọk enyi erọbe
mgbọ enyi enyebe ibot inyi Awaji,
mè itọ ọmọ ikpọ me emen èwê.
9 Ere ya ke ebi nte nte kinyi etọ emi ubọk me isi,
mè itọ emi ikpọ,
mè imun̄ si ikwaan̄ nsibe otutuuk akọp acha ini.
10 Îre mije keya ke nnaan̄ ejit inyi ebi ukot keya,
mè itumu ibe ke ife cha ekpọkpọ ikije ilọ mgbọ geelek,
mè ijit igọgọọk oniin̄ n̄a.
11 Eya orọ, nnyanyan̄a ibot me unaan̄-ejit,
mè itumu ibe ke ema kpebenin̄ emen
isiki-efuuk nsun̄be iban ebi n̄a.”a
12 Eya orọ, bọn nte n̄a, ìgbala chieen̄, inyi ene geege me etete kinyi ikakaan̄ ejit ijo inu, mè una ichechieek, mè ìsa me ikeya ìgwu ìkom ìnan̄a ìtele Awaji ogwu òkup me ugwem. 13 Ire, ogwu ikup, ikitap ogwu melek kan̄ efuuk me emen usen geelek eyi mêkọtbe igwen “Chereyi,” inyi ulọk irọrọ ijo inu ikafiaan̄ enyi ìto, mè enyi ekana ebi unye-ibot, ebi ejit onyebe ikup gboi. 14 Mije, ire eji itet utoon̄-ejit ya eji ekaan̄be bene me karake ibebene inye isi ire òta, eji ìre ebi ìkigọọk Karais igbaan̄ inu irọ. 15 Ikeya ke Ikpa Mbuban otumu ibe,
“Chereyi, ire enyi inọ ida kan̄, ikatet ejit kinyi ìnye,
kubọk enyi erọbe mgbọ enyi enyebe ibot inyi Awaji.”b
16 Ìre ebi owa enọ ida Awaji, mè inye ibot? Îre otutuuk ife cha ebi Mosis okpulube isa inan̄a me ido Ijipiti isibi. 17 Ìre ebi owa ke Awaji onaan̄ ejit inyi otutuuk akọp acha ini? Îre ebi ìrọrọ ilọ, mè ikwaan̄ irurọn̄ọ ikana me emen èwê. 18 Ìre ebi owa ke Awaji onyan̄a ibot inyi ibe ke kpebenin̄ isiki-efuuk kan̄? Îre ife cha ebi ìnyenye ibot inyi Awaji. 19 Eya orọ, eji mîmun̄ ibe ke ife cha kpekọt inin̄ emen isiki-efuuk eyi Awaji osun̄be inyi ebi kan̄, mije una ichechieek kiban̄.