Ikpa Etip Egebe Ijet
Ebi Iburu
1
Gwun̄ Awaji îmin igak ebi nriran ukot ikaan̄
1 Me ukot ikaan̄, Awaji îtumu ikọ inyi ebi nte nte kiji owuwa mgbọ, me oniin̄ òkup esese esese, sa me otu ebi nriran. 2 Ire, me mgburudun̄ usen chi, Awaji ìyaka initumu ikọ inyi eji inan̄a me otu Gwun̄ kan̄, ogwu îgobobe ibe ikana ogwukaan̄ otutuuk inu geelek me ìrot. Sa me ubọk Gwun̄ kan̄ yi si ke îrom otutuuk linyọn̄ keyi. 3 Ujamgbugbo eyi òkitoon̄ me lek Gwun̄ yi ìre ujamgbugbo eyi Awaji. Inu geelek Awaji orebe ke ọmọ ore, kpesan̄a, kpetap. Ọmọ ìkisa ikọ kan̄ eyi òkaan̄ unye ibeme otutuuk linyọn̄, inyi ikup ike îkupbe. Mgbọ îgwọkbe ijo otutuuk ebilene isan̄a, ifofo emen inyọn̄, mè isiki ikweek me irek umin mè unye, me agan̄ ubọk ulom eyi Awaji ogwu òkakaan̄ unye òchichit otutuuk unye geelek.
Gwun̄ Awaji îmin igak ebi osat Awaji
4 Gwun̄ Awaji îmin enenen igak ebi osat Awaji, mije, erieen̄ eyi Awaji onyibe ọmọ, eyi òrere “Gwun̄,” îmin enenen igak eyi ebi osat.
5 Mije, ìre kpasi ogwu osat ke Awaji otumu inyi ibe,
“Owu ìre Gwun̄ n̄a, cherekeyi ke emi nkana Nte kwun̄”a?
Sà ìre kpasi ogwu osat ke Awaji otumu ikọ ofolek ibe,
“Emi mâre ogwu Ute, ọmọ môre Gwun̄ n̄a”b?
6 Ofifi si, mgbọ Awaji oboria adasi Gwun̄ enerieen̄ kan̄ inu me linyọn̄, îtumu ibe,
“Ebi osat Awaji etọbọ ebum enyi ọmọ.”c
7 Inu Awaji otumube ofolek ebi osat ìre ikeyi,
“Awaji îrọ inyi ebi osat kan̄ ekegwat kubọk efet,
mè isa ema si irọ ebi ikwaan̄
ìkakaan̄ unye kubọk alọm ukan̄.”d
8 Ire, Gwun̄ kan̄ ke îtumu inu ofolek ibe,
“Owu Awaji, ogboon̄ ubọọn̄ kwun̄
môkup ire mgbọ ikakaan̄ge itata!
Unen oyerebet ore okuba ubọọn̄ owu obokisa ikpulu ebi kwun̄.
9 Owu oma ata irọrọ, mè icha inu ikpak.
Mije keyi ke Awaji, ogwu òrere
Awaji kwun̄ otoon̄ owu ubọk me ibot,
mè inyi owu ikpele unwọọn̄,
mè inyi owu irek umin òbebene igak
eyi otutuuk ebi melek kwun̄.”e
10 Awaji îtumu si ibe,
“Bene me ibebene, owu Okaan̄-ene me
lek kwun̄ otọbọ ọdọ otutuuk linyọn̄,
mè isa ubọk kwun̄ irom otutuuk isinyọn̄.
11 Otutuuk inu chi mêjijaka ita kpai,
ire, owu òbokpọkpọ ikup ubọk owu okupbe.
Otutuuk kiban̄ mêkana oka, mè igwak ita kubọk ekwut.
12 Owu môkat ema kubọk ekwut,
mè inwene ema kubọk ekinwene ofọnti.
Ire, owu òkup ubọk owu okupbe,
òkakinwenwene, òkakikan, òkakikwu.”f
13 Ìre kpasi ogwu osat ke Awaji otumu inyi ibe,
“Siki kweek irek me agan̄ ubọk ulom n̄a,
mege ire mgbọ mâsabe ebi ochicha kwun̄
irọ inu ibene ukot inyi owu?”g
14 Ire ikeya, ìre keke ke ebi osat Awaji ere? Ema ìre ekwukwu ìkisi ikwaan̄ inyi Awaji, ebi Awaji oriabe inu ibe enesi ikwaan̄ enyi ebi mêbọkọbe unyan̄a eyi Awaji.