4
Ugwem òkineme Awaji
1 Me òta kan̄, bọn Nte n̄a, eji mîjeen̄ enyi ubọk enyi ebesa ikiluk ugwem òkineme Awaji, enyi ekekiluk si ikeya. Mgbọ keyi, eji ekisa me erieen̄ Okaan̄-ene Jisọs iriaak enyi, mè ikirọ enyi inye ibe enyi ekeluk si ugwem ya efo isi egak ikeya. 2 Mije, enyi mîriọọn̄ nteme eji enyibe enyi inan̄a me unye Okaan̄-ene Jisọs.
3 Îre nkeek Awaji ibe enyi esun̄ lek kinyi esese, mè esan̄a lek esan̄a me ugwem barabat. 4 Îre si nkeek Awaji ibe ene geelek ikween̄ itetet lek kan̄ ikaan̄ me oniin̄ òkakaan̄ ulibi, mè oniin̄ òkukup me mbuban. 5 Awaji ìkaweek ibe ene geege iyaka lek kan̄ inyi ijo ulọk eyi barabat kubọk ebi ekariọọn̄ge Awaji ekirọ. 6 Ìkaweek si ibe ene geege isa me ugwem barabat irọ ikeme ogwu ngwan̄ me emen kè Jisọs Karais. Kubọk eji ewuukbe lek itumu inyi enyi, mè itaba enyi ubọk me utọn̄, Okaan̄-ene môsulu ene geelek òrọrọ ojelek ijo inu keyi osusut. 7 Awaji ìkagwen eji ibe eji eneluk ugwem barabat. Ire, ìgwen eji ibe eji eneluk ugwem òkup me mbuban. 8 Eya orọ, ene geelek òjijit nteme keyi ìkajit ebilene, ìjit Awaji ogwu ònyinyi enyi Ekwukwu Mbuban kan̄.
9 Mgbọ yi, ìkayaka ìkup me uyọt ibe ene geege ige ikpa inyi enyi nteme ofolek ikakaan̄ imumechieen̄ ngwan̄ mè ngwan̄ me etete kinyi, mije, Awaji me lek kan̄ îwuuk lek ijeen̄ enyi ibe enyi ekemun̄ lek kinyi me chieen̄. 10 Me atikọ si, enyi mîmun̄ otutuuk ebi ìchechieek me lek kè Jisọs Karais me chieen̄ me otutuuk agan̄ Mesidonia. Ire, eji ekirọ enyi inye ibe enyi ekemun̄ ema me chieen̄ si efo isi egak ikeya.
11 Me otutuuk ugwem kinyi, ìkiweek iluluk ugwem esuuk esuuk, ikatap chieen̄ me lek inu ikarege enyi lek. Ikare si ebi ugbek, ìkisa ubọk kinyi ìsi ikwaan̄, inyi enyi ekekaan̄ inorie erie, kubọk eji ewuukbe lek itumu inyi enyi. 12 Sa me ikeyi, enyi mêkirọ otutuuk uyọrọlek kinyi me ekasage ìkpọ ene geege chieen̄, mè isa me ikeya ikaan̄ ulibi me isi ebi ekachieekge me lek kè Jisọs Karais.
Inunu eyi Okaan̄-ene obokpọk inu
13 Bọn Nte n̄a, eji ekiweek ibe enyi eriọọn̄ otutuuk atikọ ofolek ebi ìkwakwaan̄, inyi enyi ekakifieek ejit kubọk ebi ofifi ife ebi ekakaan̄ge ikpọchieen̄ ekirọ. 14 Eji mîchieek ibe ke Jisọs îkwu, mè ikpọk ijomo me mkpa. Ikeya si, eji mîchieek ibe ke Awaji môria ebi geelek ìchechieek me lek kè Jisọs mè ikwaan̄, inyi egọọk Jisọs egbaan̄ enu mgbọ Jisọs môgwube ikom inu. 15 Igọọk me lek ikọ Okaan̄-ene me lek kan̄ otumube, eji ekitumu inyi enyi mgbọ keyi ibe ke ìkare eji ebi mêkupbe me ugwem ire Usen Okaan̄-ene môgwube ikom inu ebedasi ichichini ọmọ. Îre ebi ìkwakwaan̄ ebedasi ichichini ọmọ sabum ebi ìkup me ugwem. 16 Usen ya isire, Okaan̄-ene me lek kan̄ mônan̄a me emen inyọn̄ isibi. Mgbọ môkinan̄a isibi, ida ge môtaan̄ ukpo inyi ulook, ogwu ibot ebi osat mônyinyi ida, otita Awaji môkekitaan̄. Ebi ìchechieek me lek kè Jisọs Karais mè ikwu mênenidasi ijomo me mkpa. 17 Ema isijomo isan̄a, mênenikpulu eji, ebi mêkupbe me ugwem ire Usen ya, isan̄a mgbọ yaage isa isi ichichini melek kiban̄ me emen oduku inyọn̄, inyi eji egọọk esi echichini melek Okaan̄-ene me emen efet. Ikeya ke eji melek kan̄ ebeluk ire mgbọ ikakaan̄ge itata. 18 Eya orọ, ìkisa ikọ chi ìkat lek kinyi ejit.