5
Ikukup me mbem-lek ire mgbọ Okaan̄-ene mônube
1 Bọn Nte n̄a, ìkakup me uyọt igege ikpa inyi enyi ofolek mgbọ, mè ìyaka ire ibot mgbọ, inu chi mômọnọbe irek, 2 mije, enyi me lek kinyi mîriọọn̄ ibe ke Usen Okaan̄-ene obokpọk inu ìbonu me uwuuk-lek kubọk ogwu inọ okinu me uwuuk-lek. 3 Mgbọ ebi ene mêkitumu ibe, “Eji mîkaan̄ esuuk! Eji mîkaan̄ utelelek!” mgbọ ya ke mfiat mè mkpa obonu inyi ema me uwuuk-lek kubọk uman otet nwa-owot. Kpunu ene geege me lek kiban̄ òbonwọnwọnọ.
4 Ire, enyi bọn Nte n̄a, Usen ya ìkponu enyi me uwuuk-lek kubọk ogwu inọ okinu, mije, enyi kpekup me emen udun. 5 Otutuuk kinyi ebi ìchechieek me lek kè Jisọs Karais ekup me emen utoon̄, mè ikije me utoon̄ ikarek. Eji kpekup me emen udun eririeen̄. 6 Eya orọ, eji ekalalaak, kubọk ebi ekariọọn̄ge Okaan̄-ene ekilaak. Kpan̄asi ikeya, eji ekup me ọkpọchieen̄, mè ekup si me mbem-lek mgbọ geelek. 7 Mije, ebi geelek ìkilalaak, ekilaak me eririeen̄, ebi geelek ìkinwọ miin̄ isa si, ekinwọ isa me eririeen̄. 8 Ire, eji ebi ìkije me ikarek, eji ekup me mbem-lek, mè emọnọ ichechieek melek imumechieen̄ kubọk nroon̄ akọn̄ eyi ekisa ikwek ejit, mè emọnọ ikpọchieen̄ eyi eji ekaan̄be me lek òjot òjot unyan̄a kiji eyi òkup me isi, kubọk okpibot akọn̄. 9 Awaji ìkagobo eji ibe eji enebọkọ osusut unaan̄-ejit kan̄. Ire, ìgobo eji inyi eji enekaan̄ unyan̄a enan̄a me lek Okaan̄ kiji Jisọs Karais, 10 ogwu òkwukwu mkpa me ibot kiji, inyi eji enegọọk ọmọ eluk ere mgbọ geelek, mè ìre eji ekukup me ugwem, mè ìre eji ekwukwu, mgbọ ọmọ mônube. 11 Eya orọ, ìkikat ebi melek kinyi ejit, mè ìkitap si ubọk ìbene ebi melek kinyi ìgwuun̄ me emen ichechieek, kubọk enyi ekirọ mgbọ keyi.
Òta nteme mè amọn
12 Bọn Nte n̄a, eji ekibeek enyi ibe enyi esa ulibi ògbegbe enyi ebi ìkisi ikwaan̄ ikọ Awaji me etete kinyi, òrere ebi Awaji ogobobe ibe eketeme enyi nteme. 13 Ìkinyi ema ulibi òmimin ichit, mè ìkimun̄ ema me chieen̄, mije ikwaan̄ ema ekisi. Ìluk me esuuk melek ebi melek kinyi. 14 Bọn Nte n̄a, eji ekibeek enyi ibe, soso, ìtaba ebi geelek ìrere ugbek ubọk me utọn̄, mè ìkat ebi ukpook owot ejit. Ìtap ubọk ìnyi ebi ichechieek kiban̄ owọbe, mè ìkaan̄ ukarajit me lek ene geelek. 15 Ìmun̄ ibe ke ene geege ìkarọ ogwu ngwan̄ useen̄ ijo inu. Ire, me mgbọ geelek, ìkiben me ejit ikakaan̄ ata ejit me lek ebi melek kinyi mè ebi ofifi ife si.
16 Ìkinwọọn̄ unwọọn̄ mgbọ geelek, 17 mè ìkiriaak uriaak mgbọ geelek. 18 Ìkinyi Awaji itọn̄ me emen inu geelek òsisibi inyi enyi, mije, eyi ore inu Awaji okiweek me ubọk kinyi, enyi ebi ìrere ebi eyi Jisọs Karais.
19 Ikakput Ekwukwu Mbuban ibe ikasi ikwaan̄ kan̄. 20 Ikamọnọ nriran ebi eyi Awaji ekiben inyi enyi kubọk inu ikike. 21 Ire, ìwọlọ inu geelek ìkpọ, mè ìtet echi òrere atata me lek ìnye, 22 mè ìsan̄a lek kinyi me lek ijo inu geelek.
23 Kè Awaji me lek kan̄, ogwu òkinyi ene esuuk, isun̄ otutuuk lek kinyi me mbuban, me irọ inyi ekwukwu kinyi, mè ibot ejit kinyi, mè anam akpalek kinyi ikakaan̄ nrọ-nlọ geege me emen mgbọ Okaan̄-ene Jisọs Karais môgwube ikom inu. 24 Awaji ogwu ògwegwen enyi môrọ otutuuk inu chi ijot, mije, ọmọ îgbe utoon̄-ejit, ọmọ ìkare ogwu ofiaan̄.
25 Bọn Nte n̄a, ìriaak Awaji me ibot kiji. 26 Ìtọp otutuuk bọn Nte kiji amọn ìnyi emi. Ìkat ema, mè itọp ema amọn me imumechieen̄.
27 Nsa erieen̄ Okaan̄-ene ibeek enyi, ikalọlọ ifufuk ikpa yi inyi otutuuk bọn Nte kiji enọ.
28 Atata nnwọn eyi Okaan̄ kiji Jisọs Karais ikup inyi enyi!