3
Pọọlu îria Timọti isi Teselonaika
1 Eya orọ, mgbọ eji ekakọtge ìyaka ìme inunu inimun̄ enyi, eji etutumu ifieek ibe, kpan̄asi eji kpebemumun̄ enyi isi mè isi, ke eji gaalek mêkup me ama Atens, 2 mè isan̄a Timọti gwun̄ Nte kiji, òrere ogwu usun̄ Awaji mije ilolook ata etip kè Karais, iria ibe inu me lek kinyi. Eji eria ọmọ inu ibe initap ubọk inyi enyi, inyi enyi ekọt ekeke enye me emen ichechieek kinyi, mè inyi si enyi nteme, 3 inyi ene geege me lek kinyi ikanan̄a ìrọn̄ mije ufialek chi ebi ene ekisa irọ ikeme enyi. Enyi me lek kinyi mîriọọn̄ ibe ke irọrọ ikeme eyi ebi ene ekirọ ikeme eji ìre inu Awaji odọmọbe isun̄ inyi eji. 4 Mgbọ eji ekupbe melek kinyi, sabum ufialek cha onibebene, eji mîdasi ikitumu inyi enyi ibe ke sọnja mgbọ, ebi ene mêsulu eji osusut. Ike enyi eriọọn̄be, ikọ kiji ya îrọ si iso, eji mîbọkọ si osusut kubọk eji ewuukbe lek itumu. 5 Mije keyi, emi ǹkayaka ìkọt ìkup me nkariọọn̄ge ubọk enyi ekupbe. Ufieek-owot n̄a me lek kinyi ìre, usini mgbọ ke ogwu ntọ-mkpọ ya îra inunu initọ enyi ikpọ, mè irọ inyi otutuuk ikwaan̄ eji esibe me etete kinyi ichep me ikike. Mije keya ke nria Timọti inu me lek kinyi.
Timọti îsa ata ukpatu ika
6 Mgbọ yi, Timọti înan̄a me lek kinyi ika inu, mè inikpa inyi eji ibe ke enyi ekpọkpọ ikeke inye me emen ichechieek kinyi mè imumechieen̄ kinyi. Îtumu si ibe ke enyi kpewuuk eji mgbọ geege; ke òkilọk enyi si imumun̄ eji kubọk îkilọk eji imumun̄ enyi. Echi ìre atalek ata ukpatu inyi eji. 7 Eya orọ, bọn Nte n̄a, me emen ufialek kiji mè irọrọ ikeme eyi ebi ene ekirọ ikeme eji, eji kpeyaka ikaan̄ ufieek-owot geege me lek kinyi. Ichechieek kinyi îkat eji ejit. 8 Mgbọ keyi, eji mîbene igat ata ugwem, mije eji eriọọn̄be ibe ke enyi mîkeke inye me emen Okaan̄-ene. 9 Eji kpebekọt itọn̄ Awaji isan̄a mije unwọọn̄ eji ekaan̄be me ibot kinyi me isi Awaji. 10 Eji ekisa otutuuk ejit kiji iriaak uriaak eririeen̄ mè ikarek ibe Awaji irọ inyi eji ekọt emun̄ enyi isi me isi, mè esa irek keya enyi enyi nteme eyi enyi ekakaan̄ge-nu ofolek ichechieek enyi echieekbe.
11 Mgbọ yi, kè Awaji ogwu Nte kiji me lek kan̄, mè Okaan̄ kiji Jisọs isan̄a oniin̄ isibi, ubọk eji mêsabe inimun̄ enyi. 12 Kè Okaan̄-ene irọ inyi imumechieen̄ enyi ekaan̄be me lek otutuuk ene ikpọkpọ ikimin, mè ikeke inye, kubọk imumechieen̄ eji ekaan̄be me lek kinyi ominbe, mè ikeke inye. 13 Kè Okaan̄-ene isa me ikeyi irọ inyi enyi ekeke enye me ejit kinyi, mè ekup me mbuban, mè ekakaan̄ nrọ-nlọ geege me emen ugwem kinyi me isi Awaji ogwu Nte kiji, me mgbọ Okaan̄-ene Jisọs mônube, ọmọ mè ebi eyi kan̄.