2
Ikwaan̄ Pọọlu osibe me Teselonaika
1 Bọn Nte n̄a, enyi me lek kinyi mîriọọn̄ ibe ke inunu eji enube me lek kinyi ìkachep me ikike. 2 Eji mîmun̄ owuwa ufialek, mè ibọkọ ikpele esip me ama Filipai, kubọk enyi eriọọn̄be. Ire, mgbọ eji enube ama kinyi, Awaji înyi eji unye eji esabe ikọt ikeke ida otutuuk ikpele ufialek ebi ene eweekbe isasa ikput ikwaan̄ kiji me ama kinyi. Eji mîsa si unye ya ichieek mkpa ilook enyi ata etip eyi Awaji. 3 Ikọ eji etumube inyi enyi ìkakaan̄ inu òlọlọ me emen. Eji kpekaan̄ ofifi ekiket geege me ejit isa itumu. Eji kpetutumu si ikọ ya isasa ifiaan̄ enyi. 4 Ire, Awaji îtoon̄ eji ejit me lek, mè iyaka ata etip kan̄ itap eji me ubọk ibe eji ekelook. Eya orọ, eji kpetumu ikọ kiji ibe ineme ebilene. Ire, eji etumu ibe ineme Awaji ogwu òrọriọọn̄ ijọn̄ ijọn̄ ejit kiji. 5 Kubọk enyi eriọọn̄be, eji kpetumu unin̄i otu ikọ inyi enyi. Eji kpesa si ulọk ebek ikpoko inu, mè ifiaan̄ ikitumu utop utop ikọ isa ichit. Awaji ore ogwu ata-ikọ inyi eji. 6 Eji kpeweek ibe ene geege, mè ìre enyi mè ìre ebi ofifi ife, etọn̄ eji.
7 Me atikọ, eji kubọk ebi otuchieen̄ kè Karais, eji mîkaan̄ unen idodo ibe enyi ekekpọ eji chieen̄ me lek. Ire, kpan̄asi ikeya, eji eyaka inigọgọọk enyi iluk esuuk esuuk kubọk ata uga òkigbala chieen̄ ikpọ asa nsabọn kan̄. 8 Bak me lek ulọk eji ekaan̄be me lek kinyi, eji kpeche ata etip eyi Awaji gaalek inyi enyi, eji mîsa me ubelejit iche si lek kiji igbaalek inyi enyi, mije, eji mîmun̄ enyi me chieen̄ enenen. 9 Bọn Nte n̄a, eji mîriọọn̄ ibe ke enyi kpewuuk kwulukwulu kiji mè unye ikwaan̄ eji ekisi mgbọ eji egọọkbe enyi iluk, mè ikilook enyi ata etip eyi Awaji. Mgbọ ya, eji ekisi ikwaan̄ eririeen̄ mè ikarek ikisa ikpọ lek kiji, inyi eji ekasa ufialek eyi akpalek kiji geege ìkeme enyi.
10 Enyi ìre ebi ata-ikọ inyi eji, ikeya si ke Awaji ore ogwu ata-ikọ inyi eji ibe ke otutuuk mgbọ eji elukbe me etete kinyi ebi ìchechieek me lek kè Jisọs Karais, ke eji mîsun̄ lek kiji me mbuban, mè ikirọ ata irọrọ, mè ikiluk ugwem eyi ikakaan̄ge nrọ-nlọ geege me emen. 11 Enyi mîriọọn̄ si ibe ke eji ekaan̄ ugwem me lek kinyi, me ene me ene, kubọk ute okikaan̄ me lek ebi bọn. 12 Eji mîkinyi enyi nteme, mè ikitap enyi efuuk me emen, mè ikirọ enyi inye ibe enyi ekeluk ugwem eyi òbokineme Awaji ogwu ògwegwen enyi, inyi enyi enekaan̄ uche me ugbana eyi mkpulu kan̄, mè ujamgbugbo kan̄.
13 Eji mîkitọn̄ Awaji mgbọ geelek, mije, mgbọ eji etumube ikọ Awaji inyi enyi, eyi enyi ebọkọbe itap, enyi kpebọkọ itap kubọk ikọ ebilene. Ire, enyi ebọkọ itap kubọk ikọ Awaji, mije, ikọ Awaji ke îre me atikọ. Ikọ yi si òkisi ikwaan̄ me emen kinyi ebi ìchechieek me lek kè Jisọs Karais. 14 Bọn Nte n̄a, inu yaage òrọrọ enyi orọ ebi ntitiin̄ Awaji, ìrere ebi eyi Jisọs Karais, me ido Judia. Ike enyi ebọkọbe ufialek me ubọk ebi ido kinyi, ikeya si ke ebi ntitiin̄ Awaji cha ebọkọ ufialek me ubọk ebi Ju, òrere ebi kiban̄. 15 Îre ebi Ju chi ekpan̄ Okaan̄-ene Jisọs, mè ikpan̄ ebi nriran kiban̄, mè ilap eji si isibi. Ife chi mîrọ inu ònanaan̄ Awaji ejit, mè irọ ikeme otutuuk ebilene, 16 mije ema ekputbe eji ibe eji ekasi ìtumu ikọ Awaji ìnyi ebi ekarege ebi Ju mè ebiba egọọk ekaan̄ unyan̄a. Ojelek ijo inu kechi ema ekirọ mgbọ geelek orọ inyi ijo kiban̄ ikpọkpọ iwa ijot ere. Mgbọ keyi unaan̄-ejit Awaji îrọn̄ ikeme ema!
Pọọlu îweek isisi imun̄ ebi Teselonaika
17 Bọn Nte n̄a, sọntiik mgbọ yi eji enan̄abe itele enyi, îlọk eji enenen iyayaka imun̄ enyi, ubọk geelek ibe ke eji etele enyi me akpalek gaalek, ìkare me ekiket. Mije keyi, eji mîsa lek me owuwa oniin̄ ikọkọt inimun̄ enyi isi mè isi. 18 Eji mîweek ikpọkpọk inu me lek kinyi. Emi me lek n̄a Pọọlu nsa lek owuwa mgbọ inunu, ire, Yọk ìkachieek eji enu. 19 Îre mije kinyi ke eji mêkaan̄ ikpọchieen̄, mè unwọọn̄, mè ikaan̄ si inu isasa ibaan̄ alọm eyi ntim-mkpan̄ me isi Okaan̄ kiji Jisọs mgbọ mônube. 20 Enyi, me atikọ, ere itọn̄ mè unwọọn̄ eyi eji ekaan̄be.